JUAN 6:45-68

⁴⁵Lo liber ne wkaa profet re: “Dëdyuzh yneluu yrandxee mén.” Por neguin yrandxee mén ne rkagyedyag xdiiz Dëdyuzh no ne rseed ne rneluu Dëdyuzh, lo noo ylenza men.

⁴⁶’Nakdeto ne nuu mén che wii Dëdyuzh, sinke nonchee men ne wruu lo Dëdyuzh, laa men guin nak ne che wii Dëdyuzh.

⁴⁷Nligue yna noo lo de, mén ne rlaleedx noo che rap men gyelembán ne nunk luzhdet.

⁴⁸Noo nak gyëtxtil ne rguu gyelembán.

⁴⁹Xpenkwlal de, mase wu men maná denbidx, per wet ke men.

⁵⁰Per le gyëtxtil ne rzëët noo lo de gyeybaa wruu we; mén ne gu we, zap men gyelembán ne nunk luzhdet.

⁵¹Noo nak gyëtxtilmbán ne wruu gyeybaa; men ne gu gyëtxtilree, zap men gyelembán ne nunk luzhdet. Gyëtxtil ne rdee noo ledpee noo nako; ydee noo we chen gap mengyëzlyu gyelembán ne nunk luzhdet.

⁵²Orguin wzelo men-Israel rulsaa men diiz, re men: ―¿Pezee gak yniiz ménree led men gu be?

⁵³Wke Jesus, re Ne: ―Nligue yna noo lo de, belne gudet de led Men ne wdxiid wak Mén no belne goodet de xren men, gapdet de gyelembán ne nunk luzhdet.

⁵⁴Per le men ne gu led noo no ne goo xren noo, zap men gyelembán ne nunk luzhdet; noo yneban men chene che lultim dxe.

⁵⁵Porke led noo nak merpee gyelwu, no xren noo nak merpee ne roo mén.

⁵⁶Men ne gu led noo no ne goo xren noo, men guin syemper zu kon noo, noo syemper zu kon laa men.

⁵⁷Laa Xuz noo wxaal noo, mbán me, no zegne mbán noo por laa me, zenga ke men ne gu led noo, por noo gap men gyelembán ne nunk luzhdet.

⁵⁸Noo gyëtxtil ne wruu gyeybaa rzëët noo; gyëtxtilree nakdeto zegnak maná ne wu xpenkwlal de, porke mase wu meno, per wet ke men; per le men ne gu gyëtxtilree ne rzëët noo, zap men gyelembán ne nunk luzhdet.

⁵⁹Yra neree wneluu Jesus mén lenydo-Capernaum.

⁶⁰Chene wluzh won yra xpén Jesus neree, ndalyaa men re: ―Axtegue ne gakdetlel rnii men; ¿txu ykagyedyag ne rnii men?

⁶¹Wdee Jesus kwent ne re men zenga, lex re Ne lo men: ―¿Pe rzaknyaan de neree ne na noo lo de?

⁶²¿Pagoxleg tsuu lextoo de belne kwii de gyeep Men ne wdxiid wak Mén ledne wuu men chekwlo?

⁶³Laa Espíritu Sant rseleedx gyelembán lo mén; belne yëtet Espíritu Sant, bat ykyiindet noze mén. Yra diiz ne wzëët noo lo de yra de, espíritu nako no le gyelembán.

⁶⁴Per nuu de gardet ylaleedx noo. Re Jesus zenga porke axtegue chekwlo che nan Ne gan txuzh rlaleedxdet Ne no gan txuzh ydekwent Ne.

⁶⁵No re Ne lo men: ―Por neguin na noo lo de ne rut gakdet ylenza lo noo belne yxaaldet Xuz noo men.

⁶⁶Kwlote nga ndalyaa men ne che nak xpén Jesus wsalzaan men Ne, wanaldetre men Ne.

⁶⁷Lex wnabdiiz Ne lo yra chibtxup xpén Ne, re Ne: ―¿Pe no de rlaan gya?

⁶⁸Wke Simon-Bëd, re Simon-Bëd: ―Dechey, ¿txu lo nak ne tsa noo? Si nonchee xdiiz de nak ne rseleedx gyelembán ne nunk luzhdet.