Juan 6:43-67

⁴³Hua Jesús onöhuatihuac, hua oquemelfejque: ―Amo xetlajtucö ejqueu entre nemejua.

⁴⁴Nionöque abele huölös noca naja, tlö amo queyulnutzasque noTajtzi öque niechhualtitlanque. Hua naja necyulebitis ipa sölúltimo tunale.

⁴⁵Tlajcuelulpanca ipa libro de tlayulepantejque: “Hua noche inu giente Deus quenmachtisque”. Noche giente tli tiecaque noTajtzi hua quetzecoa de tli quenmachtilo, yejuanu bitze noca.

⁴⁶Amo quejtusneque que canajyeca tieyejtac noTajtzi, cache solamiente naja tli nebitz de Deus, naja quiema netieyejtac noTajtzi.

⁴⁷Melöhuac, melöhuac nemiechelfea: Öque moneltoca quepea nemelestle nochepa.

⁴⁸Naja necaca nepöntzi tli quetiemaca nemelestle.

⁴⁹Nemobiebetcöhua oquecuajque inu maná ipan locör cöne nionöque chönte, pero sötiepa omejmejque.

⁵⁰Cache ini belaja pöntzi tli ohualtemuc de elfecac, tlö canajyeca quecuös de ini nönca pöntzi, amo meques.

⁵¹Naja nepöntzi tli quetiemaca nemelestle que nehualtemuc de elfecac. Tlö canajyeca quecuös de ini nönca pöntzi, nemes nochepa. Hua pöntzi tli naja necmacas, yaja nonacayo, yaja ini nönca nectiemacas para ma quepeacö nemelestle tlöltecpactlöca.

⁵²Yecuöquenu joriojte mocöcamapanabiöya sente ca ocsente, hua oquejtojque: ―Ini nönca tlöcatl, ¿quiene noso tiechmacas inacayo ma tejcuöcö?

⁵³Por inu Jesús oquemelfejque: ―Melöhuac, melöhuac nemiechelfea: Tlö amo nenquecuösque nonacayo de naja que onochi netlöcatl, hua tlö amo nenconisque noyeso, amo nenquepea nemelestle ipa nemoyulo.

⁵⁴Öque quecua nonacayo hua cone noyeso, quepea nemelestle nochepa, hua naja necyulebitis ipa sölúltimo tunale.

⁵⁵Pues nonacayo ica melöhuac tlacuale, hua noyeso melöhuac ötlile.

⁵⁶Öque quecua nonacayo hua cone noyeso seme noca iyes, hua naja neyes ca yaja.

⁵⁷San quiene niechhualtitlanque noTajtzi öque nemoateca, hua naja neneme tiepampa noTajtzi, ejqueu nuyejque öque niechcua, yaja nuyejque nemes nopampa.

⁵⁸Yaja ini nönca belaja pöntzi tli hualtemuc de elfecac, que amo ica quiename inu maná tli oquecuajque nemobiebetcöhua hua omejmejque. Pues öque quecuös ini nönca belaja pöntzi nemes nochepa.

⁵⁹Noche ini nönca sösantle oquejtojque cuöc quenmachtiloöya giente ipan teopanconetzi ompa Capernaum.

⁶⁰Yecuöquenu meyactie de tiemachtejcöhua cuöc oquecajque ini nönca, oquejtojque: ―Lalebes checöjque cate ini nöncate tlajtulte. ¿Öquenu cuale queselis?

⁶¹Pero Jesús quematihuaya ipa tieyulo que tiemachtejcöhua moquejöroöya por tietlajtul, hua oquemelfejque: ―¿Quie beles ini nönca nemiechcualöntea?

⁶²¿Tli noso nenquepensörusque, tlö nenniechejtasque naja tli onochi netlöcatl netlejcus elfecac cöne cachto neyeya?

⁶³Solamiente yejuatzi Espíritu cuale quetiemacalo nemelestle; pues tonacayo amo tli proviecho quetiemaca. Notlajtulhua tli nemiechelfea yejua cate espirituales hua quetiemaca nemelestle.

⁶⁴Cache oncate seque de nemejua tli amo nemoneltoca. Pues Jesús desde ca opie quematihuaya öquemeju amo moneltocaya hua öquenu tieantrecörusquea.

⁶⁵Hua oquejtojque: ―Ipampaju onemiechelfe que nionöque abele huölös ca naja, tlö amo quemacasque noTajtzi para ma iye ca naja.

⁶⁶Cuöc oquejtojque inu, meyactie de tiemachtejcöhua omocuejque, hua ayecmo yajtenemeya tieca.

⁶⁷Yecuöquenu oquemelfejque Jesús inu majtlactle huan ume tiemachtejcöhua: ―¿Nemejua nenqueneque nuyejque nenyösque?