JUAN 6:28-40

²⁸Wɨnets ja ja̱a̱ꞌy tyiktøødøø jøts ja tnɨmaadyøø ja nwɨndsønꞌa̱jtɨm: ―¿Tits øøts ɨdøꞌøn nduꞌump jøts ja yiktuꞌunt pønɨ midi døꞌøn ja Dios chøjkpy jøts øøts ja nduꞌunt?

²⁹Jøts nwɨndsønꞌa̱jtɨm Jesús ja yꞌadsoojɨdøø: ―Midi mduꞌundɨp, jaꞌ Dios chøjkpy jøts ja xjanchja̱wɨdɨt pøn ja tø tkexy.

³⁰Jøts ja tja̱a̱ktyimdyɨɨbyøjktøø, yɨdeꞌen tnɨmaadyøø ja nwɨndsønꞌa̱jtɨm Jesús: ―¿Ti ejxa̱ꞌa̱nts mbɨkta̱ꞌa̱kp midi øø nꞌejxp jøts myikjanchja̱wɨt? ¿Ti døꞌøn mduꞌump? ¿Ti døꞌøn myikꞌøyɨp?

³¹Ojtsxɨ adøm ja nꞌa̱ptøjk tjøøꞌkxtɨ ja jɨɨꞌkxy jam aba̱k etjotp sa̱m ja Dios kyajpxy wya̱ꞌa̱ñɨn ku ja ñimy: “Ojts Dios ja tsa̱pkaaky ja tyukayɨdɨ midi tsoꞌomp tsa̱jpjøtpy.”

³²Wɨnets ja nwɨndsønꞌa̱jtɨm Jesús ja ojts yɨdeꞌen yꞌadsøyɨdɨ: ―Janch øts ɨdøꞌøn nwa̱ꞌa̱ñ ku mee nnøjmɨ: Jøts kidi ja Moisésɨp jaꞌ, kidi jaꞌajɨp ja ojts myøꞌøyɨdɨ ja tsa̱pkaaky midi tsoꞌomp jap tsa̱jpjøtpy, pø ja Dios Teetyxɨ jaꞌ pøn tya̱jkp tyimyjaꞌabɨ tsa̱pkaaky midi tsoꞌomp tsa̱jpjøtpy.

³³Ja tsa̱pkaaky midi Dios yajkpy, jaꞌ ɨdøꞌøn tø kyɨda̱ꞌa̱ky jap tsa̱jpjøtpy. Jaꞌats yajkpy ja kunuuꞌkxy jujkyꞌa̱jtɨn pøn jaty ya̱ na̱xwiiñꞌa̱jttɨp, pøn ya̱ yjanchja̱ꞌwɨdɨp.

³⁴Wɨnets ja tnɨmaadyøø ja nwɨndsønꞌa̱jtɨm: ―Teety, møøyꞌejtɨk øøts yøꞌøbɨ tsa̱pkaaky.

³⁵Jøts nwɨndsønꞌa̱jtɨm Jesús ja ojts ñɨɨꞌmxyɨdɨ: ―Øts ɨdøꞌøn jaꞌ sa̱m ja tsa̱pkaaky midi tmøøpy ja ja̱a̱ꞌy ja kunuuꞌkxy jujkyꞌa̱jtɨn. Pønɨ pøn ø xnɨmemp, pøn ø xpabøkp, nɨjuunɨ yuuj xøøw ja tkaꞌext; pønɨ pøn ø xjanchja̱ꞌwɨp, nɨjuunɨ tøødsɨ ja tkagupøkt.

³⁶Jadeꞌents sa̱m tø nnøjmɨdɨ, kaꞌ mee xjanchja̱wɨ øy mee tø xjaꞌixy.

³⁷Nɨdukɨꞌɨyɨ øts ja xnɨmendɨ pøn øts ja Dios Teety xagødøjkɨp; jøts jaꞌadɨ pøn øts ɨdøꞌøn jadeꞌen xnɨmendɨp, kaꞌ øts ja mɨba̱a̱t ngajxpɨdsimy.

³⁸Kajaꞌajɨp øts jap tsa̱jpjøtpy tø nnɨdsøøñ jøts øts ja ngøꞌømwɨnma̱a̱ꞌñ nyiktuꞌunt, pø jaꞌ Dios Teetyxɨ øts ja yjaꞌ nduujnɨp pøn ø xkajxp.

³⁹Jøts jaꞌ ɨdøꞌøn ja chøjkpy jøts ø nɨ tuꞌugɨn ngaꞌejxɨgøꞌøty pøn jaty øts ja tø xagødøkɨ, jøts øts ja nyikjujkpyøktɨt ku wyɨnaty ja na̱xwiiꞌñɨt kyøjxnɨt.

⁴⁰Jøts nay jaꞌ ja chøjkpy jøts nɨdukɨꞌɨyɨ tpa̱a̱ttɨt ja jujkyꞌa̱jtɨn midi xemɨkøjxp pønɨ pøn tꞌejxtɨp tnɨja̱ꞌwɨdɨp, pønts tpabøktɨp ja Dios Uꞌnk, jøts øts ja ñɨyikjujkpyøktɨp ku na̱xwiiꞌñɨt kyøxt.