JUAN 6:20-33

²⁰Per re Ne lo men: ―Noo nee, ydxedet de.

²¹Axtegue rzhiilen men yra men ne le Jesus wdee lenbark, no orke guin wdxiin men ledne za men.

²²Nan yra mén ne wyan stebkoo nis ne tendxee bark zu nga. Chene wra gyëël, wyenen men ne lenbark guin za yra xpén Jesus no wyenen men ne zadet Ne yra Ne xpén Ne.

²³Orguin wdxiin txup tson xbark men-Tiberias guex ledne wu men gyëtxtil chene wluzh wdee Jesus dexkyizhtee lo Dëdyuzh.

²⁴Ne wii yra mén guin ne yëtet Jesus nga ni xpén Ne, wdee men lenbark guin za men Capernaum zaye men Ne.

²⁵Chene wdxiin men Capernaum, wzël Jesus lo men, lex re men lo Ne: ―Maxter, ¿pa or wlenza de nee?

²⁶Wke Ne re Ne: ―Nanwen noo ne ryedet de noo por gyelmilaguer ne wii de wlaa noo, sinke noze por ne wu de axtegue wyezaa de.

²⁷Ylaadet de dxiin noze por gyelwu ne rluzh, sinke gulaa dxiin por gyelwu ne rluzhdet ne rguu gyelembán ne nunk luzhdet, laa gyelwuree nak ne yseleedx Men ne wdxiid wak Mén, porke laa Dëdyuzh nak ne wzu men ne yseleedx meno.

²⁸Lex wnabdiiz men, re men: ―¿Pagox rap noo degne ylaa noo chen ylaa noo ne rlaan Dëdyuzh?

²⁹Wke Jesus, re Ne: ―Logne rlaan Dëdyuzh ne ylaa de nak ne ylaleedx de men ne wxaal Dëdyuzh ne zëëd men.

³⁰Lex re men: ―¿Pe gyelmilaguerzhe ylaa de ne kwii noo chen ylaleedx noo de? ¿Pagox run de gan rlaa de?

³¹Xpenkwlal be, maná wu men chene wkaa men denbidx zegne zëëd lo xgyiich Dëdyuzh ledne re: “Wdee men gyëtxtil-gyeybaa wu men yra men.”

³²Orguin re Jesus: ―Nligue yna noo lo de ne let Moisesdet wdee gyëtxtil-gyeybaa wu men, sinke laa Xuz noo nak ne rdee merpee gyëtxtil-gyeybaa ru mén.

³³Porke gyëtxtil ne rdee Dëdyuzh, laa we nga nak ne wruu gyeybaa, rguu we gyelembán lextoo mengyëzlyu.