Juan 6:19-40

¹⁹Due baɨ jáidiaɨoɨmo Jesús nocaemo áɨnozillana cɨódiaɨoɨ. Jaɨnoi emódodo macade. Iemo jacɨ́ruitiaɨoɨ.

²⁰Mei jira íaɨoɨna daɨde: —Cueza, omoɨ jacɨ́ruiñeno, —daɨde.

²¹Iemona caɨmare nocaemo íena llɨ́ɨnotiaɨoɨ. Iemona íaɨoɨ jáillɨnomo nitaca izói jarire dúcɨdiaɨoɨ.

²²Jɨáɨrui meífodo jorai enéferaimo fɨébidɨmacɨ, llófuegamacɨ daa ite nocaedo jáillana fɨdɨ́diaɨoɨ. Iadɨ Jesús afémacɨri jáiñede.

²³Mei íadɨ biruícana jɨáɨe nocáiaɨ Tiberias jófuemona dúcɨzaide. Ua pan güilla áɨnori Ocuíraɨma Jesús “Ɨere fɨgora” dáɨnamona, ua afénomo dúcɨzaidiaɨoɨ.

²⁴Daɨí Jesús dɨnomo iñénana cɨóillano ie llófuegamacɨ dɨga, afécaiaɨmo jofo jáidiaɨoɨ. Iemona Capernaúmo íena jénuaidiaɨoɨ.

²⁵Jorai ruícaferaimo dúcɨillano, Jesús baitíaɨoɨ. Baillano íena jɨcánotiaɨoɨ: —Llófueraɨma ¿nɨruido benomo dúcɨdɨo? —daɨdíaɨoɨ.

²⁶Jira Jesús daɨde: —Uáfuena ómoɨna dáɨitɨcue, güíllena omoɨ jeɨ́rillamona cuena jénuaɨbitɨomoɨ. Cue fɨnoca cɨ́ofɨnina raa omoɨ onónamona cuena jenóñedɨomoɨ.

²⁷Fúifɨrede güíllemo táɨjɨñeno iri. Mei íadɨ fúiñeite güíllemo táɨjɨiri. Afe güille ómoɨna zíiñona itátaite. Afe bie güille ómoɨmo íitɨcue mei Nanoide Ɨima Jitódɨcueza. Mei ua, omoɨ uáfuena ɨ́ɨnogamɨena jae Moo Juzíñamui jóonegacueza.

²⁸Jira jɨcánotiaɨoɨ: —¿Mɨnɨ́cana fɨ́noitɨcaɨ Juzíñamui jitaille raa caɨ fuitállena? —daɨdíaɨoɨ.

²⁹Jesús uai ote: —Juzíñamui orécamɨena omoɨ ɨ́ɨnollena jitáirede, —daɨde.

³⁰Iemo jɨcánotiaɨoɨ: —¿Mɨnɨca onótaite raa caɨmo ácataredɨo, afe cɨóillano ona caɨ ɨ́ɨnollena? ¿Mɨnɨ́cafue fɨ́noitɨo?

³¹Caɨ jaiáidɨgɨma zaféredɨzicɨmo maná güitíaɨoɨ; Juzíñamui Cuegáuai daɨna izói: “Juzíñamui monámona ana baɨítaga güíllenɨaɨ áfena íaɨoɨ güitátate,” —daɨde.

³²Jesús uai ote: —Uáfuena dáɨitɨcue: monámona baɨide güíllenɨaɨ fecáraɨma Moiséñede. Mei íadɨ uáfuena monámona baɨide güíllenɨaɨ fecáraɨma cue Moo.

³³Juzíñamui fecaca güíllenɨaɨ, monámona ana bitɨ́mɨe. Afémɨe cáaille paana maméidɨmɨe. Afémɨe énɨe itɨ́macɨmo zíiñona cáallɨnona itátaite, —daɨde.

³⁴Iemo íena daɨdíaɨoɨ: —Ocuíraɨma, bie güíllenɨaɨ nágarui caɨ ine, —daɨdíaɨoɨ.

³⁵Jira Jesús daɨde: —Cue cáatate güílledɨcue. Cuemo bitɨ́mɨe jaca júfiruiñeite. Cuemo ɨ́ɨnotɨmɨe jaca nɨnomo jíroacañeite.

³⁶Mei íadɨ ómoɨna cue daɨna izói, cuemo ɨ́ɨnoñedɨomoɨ naɨ cuena cɨódɨomoɨ íadɨ.

³⁷Nana Juzíñamui cuemo fecácamacɨ cuemo bífɨreitiaɨoɨ. Cuemo bífɨreitɨnona jino dótañeitɨcue.

³⁸Uafue, cue comecɨ jitaina izói fɨnóllena, monámona ana biñédɨcue, mei íadɨ cue orédɨmɨe comecɨ jitaina izói ana fɨ́nuaɨbitɨcue.

³⁹Cue Moo, ua cue orédɨmɨe, nana cuemo igánomona buna oni nɨnó báɨiñeillena jítaide. Ua nana afémacɨ íiraɨruido cáadɨnona itátaitɨcue.

⁴⁰Cue orédɨmɨe nana Juzíñamui Jitona cɨódɨmacɨ íena ɨ́ɨnollena jitaide. Daɨí íaɨoɨ ɨ́ɨnuamona zíiñona cáaillɨnona íaɨoɨmo íllana cue orédɨmɨe daje izói jitaide; ie mei íiraɨruido cáadɨnona íaɨoɨna itátaitɨcue, —daɨde.