JUAN 5:9-15

⁹Jøts nay jatyɨ chøøjky ja ja̱a̱ꞌy, ojts tyikpɨdɨꞌɨky midi ja jam tyama̱a̱py jøts ja ojts yøꞌøchoꞌonɨ. Jøts kumɨ pooꞌkxɨn xøøwts wyɨnaty,

¹⁰wɨnets ja israelɨt ja̱a̱ꞌy tnɨmaadyøø ja ja̱a̱ꞌy pøn wyɨnaty tø myøkpiky: ―Pooꞌkxɨn xøøwxɨ ya̱m; jøts kaꞌap pya̱a̱tꞌatyɨ xtsømwɨdett yø mma̱a̱bajt.

¹¹Xjats ja tꞌadsøøy: ―Jaꞌ ø tø xnøjmɨ pøn ø tø xyiktsøꞌøky: “Yikpɨdøꞌøk yø mma̱a̱bajt jøts mnøjkxnɨt.”

¹²Jøts ja yiknɨma̱a̱y: ―¿Pøn ɨdøꞌøn tø mnɨɨꞌmxyɨ: “Yikpɨdøꞌøk yø mma̱a̱bajt jøts mnøjkxnɨt”?

¹³Jøts ja ja̱a̱ꞌy pøn ɨdøꞌøn wyɨnaty tø chøꞌøky, kaꞌap ja tnɨja̱wɨ pønɨ pøn ɨdøꞌøn ja wyɨnaty tø yiktsøꞌøgyɨ. Jøts janch may ja̱a̱ꞌyts jam, jøts ja nwɨndsønꞌa̱jtɨm Jesús tøyɨm ja jam wyɨnaty choꞌonɨ.

¹⁴Jøts ja nwɨndsønꞌa̱jtɨm Jesús jadɨgojk tpa̱a̱jty ja ja̱a̱ꞌy jap tsa̱ptøjkjøtpy midi ja wyɨnaty tø tyiktsøꞌøky, jøts ja tnɨma̱a̱y: ―Øyɨm yikxon xmadoꞌot, ejx ɨdøꞌøn ɨxa tø mdsøꞌøky, kidi mꞌukpøktyunɨ jøts kidi ti mjatyɨ ku jawaanɨ kaꞌøy mdyimyꞌukja̱jtnɨt.

¹⁵Wɨnets ja ñijkxy pøn tø chøꞌøky, jøts ja ojts ttukmadøy ja israelɨt ja̱a̱ꞌy, jøts kudam ɨdøꞌøn ja yjaꞌajɨ ja Jesús, pøn ja wyɨnaty tø yiktsøꞌøgyɨ.