Juan 5:6-44

⁶Jesús billano ie bɨ́inana cɨode. Afémɨe are jaiai nɨnómona daɨí dɨnomo íllana onóillano, Jesús íena daɨde: —¿Jíllobicaiacadɨo? —daɨde.

⁷Ɨráredɨmɨe uai ote: —Ocuíraɨma, cue cánoitɨmɨe iñede, jaɨnoi bagua meífomo jáɨnoimo cuena ñuitállena. Nágarui cue jáiacana llezica jɨáɨmɨe nano fueñe jáɨnoimo dúcɨde, —daɨde.

⁸Jesús íena daɨde: —Caifo náidacai. O bɨ́irallu llɨɨno. Mai maca, —daɨde.

⁹Afe llezica afémɨe jíllobicaide. Iemo ie bɨ́irallu llɨ́ɨnuano macáoicaide. Aferui ocózinaillarui.

¹⁰Jira judíuaɨ jíllotagamɨena daɨde: —Birui jae ocózinaillarui. O bɨ́irallu rocánollena omo rairuírede, —daɨdíaɨoɨ.

¹¹Afémɨe uai ote: —Cue jíllotatɨmɨe cuena daɨde: “O bɨ́irallu llɨɨno; mai maca,” —daɨde.

¹²Iemo íena jɨcánotiaɨoɨ: —¿Bu ona “o bɨ́irallu llɨɨno, mai maca” daɨna? —daɨdíaɨoɨ.

¹³Mei íadɨ afémɨe ie jíllotatɨmɨena onóñede, aillo comɨnɨ dɨnomo íllaza. Ua Jesús jae jáideza.

¹⁴Afe mei Jesús gaɨríraco eromo íena baizájillano daɨde: —Mai eroi. Birui jae jíllodɨo. Meine fɨénidɨfuena fɨnóñeno iri, jamánomo fɨgóñede raa omo jíriñeillena, —daɨde.

¹⁵Iemo afémɨe judíuaɨmo Jesús íena jíllotatɨmɨe lluájide.

¹⁶Ie jira judíuaɨ Jesuna duere fɨnóllena racádiaɨoɨ; íena fáiacadiaɨoɨ, ocózinaillaruimo aféfuiaɨ fɨ́nua jírari.

¹⁷Mei Jesús íaɨoɨna daɨde: —Cue Moo Juzíñamui jaca nanómona biruimo táɨjɨde, jira cue nane táɨjɨdɨcue, —daɨde.

¹⁸Iemona judíuaɨ jamánomo íena fáiacadiaɨoɨ; nɨbaɨ ocózinaillarui ocuícafue afémɨe jáanote. Ie emódomo afémɨe Juzíñamui izóidɨmɨena dama fɨnótate, “Juzíñamui cue Moo” ie daɨna jira.

¹⁹Ie mei Jesús íaɨoɨna daɨde: —Uáfuena ómoɨna dáɨitɨcue, mei Juzíñamui Jitódɨcueza, dama cue jítaina izói mɨnɨ́cana fɨnónidɨcue. Dama cue Moo Juzíñamui fɨnócafue cue cɨona izói birui fɨnódɨcue. Nana cue Moo fɨnócafue afe izói nana fɨ́nofɨredɨcue; ie Jitódɨcueza.

²⁰Ua Moo Juzíñamui nana ie fɨ́nuafue ie Jitomo ácatate, Moo ie Jitó izíruilla jira. Ie emódomo jamánomo áillue fɨnóllɨfue íemo ácataite, omoɨ fáɨgacaillena.

²¹Mei Moo Juzíñamui tɨ́idɨno cáadɨnona itátateza, ua cáallɨnona íaɨoɨmo ite; daje izói ie Jitó nana afémɨe oíacaiganomo cáallɨnona ite.

²²Moo Juzíñamui buna jɨcánoñede íena duere fɨnótallena, mei íadɨ nana afe jɨcánolle rɨ́ino ie Jitomo iga.

²³Daɨí nana comɨnɨ Moo ñue jacɨ́ruilla izói, afe izói ie Jitona ñue jacɨ́ruitiaɨoɨ.

²⁴Uáfuena ómoɨna dáɨitɨcue: cue uaina cacádɨmɨemo, dáanomo cuena orédɨmɨena ɨ́ɨnotɨmɨemo ja ziiño cáatatɨnona ite. Afémɨe duere fɨnóbiñeite, tɨ́illanomona ja baɨ fɨnona jira; jae cáananomo dúcɨde.

²⁵Uáfuena ómoɨna dáɨitɨcue: tɨ́idɨno meine cáaillɨrui áɨnozioicaide. Aferui birui. Ua tɨ́idɨno Juzíñamui Jitó úrillana cácaitiaɨoɨ; íemona nana áfena náfuefɨredɨno cáaitiaɨoɨ.

²⁶Mei Moo Juzíñamuimo cáatalle rɨ́ino íteza, daje izói afe cáatalle rɨ́ino ie Jitomo afémɨe itátate.

²⁷Dáanomo comɨnɨ duere fɨnóllena jɨcánua rɨ́ino íemo iga, afémɨe Nanoide Ɨima Jitona jira. Afe Jitódɨcue.

²⁸Afemo fáɨgacaiñeno iri. Nana tɨ́idɨno cue úrillana cacáillɨruimo dúcɨiteza.

²⁹Aféruido raɨáfuaɨmona jino bíitiaɨoɨ. Ñúefue fɨnódɨmacɨ meine cáadɨnona íitiaɨoɨ zíiñona íaɨoɨ íllena; mei íadɨ fɨénidɨfue fɨnódɨmacɨ meine cáadɨnona íitiaɨoɨ, duere íaɨoɨ fɨnóbillena.

³⁰Dama cue comecɨ izói mɨnɨ́cana fɨnónidɨcue. Moo cue ocuilla izói comɨnɨ fɨ́nuafuiaɨ rɨire jɨcánotɨcue. Cue jɨcánuafue jaɨ́cɨna ñue joide; cue jitaina izói jɨcánoñedɨcueza, mei íadɨ cue orédɨmɨe, cue Moo jitaina izói jɨcánotɨcue, afe izói fɨnóllena.

³¹Dama cueri uai cue nabáiadɨ, cue dáɨnana fɨgo uáfuena daɨíñede.

³²Mei íadɨ jɨáɨmɨe cueri uai nabáiraɨma ite. Afémɨe cueri daɨnafue ñue uáfuena facátate. Afena onódɨcue.

³³Juaamo jɨcánuaidɨomoɨ. Afémɨe ie uai úana jaca uafue.

³⁴Mei íadɨ ɨímamona cueri uai nabáillana jɨcáñedɨcue. Daa bíena dáɨitɨcue omoɨ jíllobicaillena.

³⁵Juan egáiñora izóidɨmɨe. Afe egáiñora bóocabillamona egáiñofɨrede. Ie egáiñuanomo nano íanori íllamona ióbicaidɨomoɨ.

³⁶Mei íadɨ jɨáɨe cueri uáfuena facátafue ite. Afefue Juan cueri daɨnafue baɨmo ite. Afe uáfuena facátafue cue fɨnócafuiaɨ. Aféfuiaɨ cue Moo cue fɨnóllena ocuícafuiaɨ daje izói jóoideza. Afe jira afe cue fɨnócafuiaɨ Moo orécacue uáfuena facátate.

³⁷Ie dáanomo Moo, cue orédɨmɨe cueri uai nabaide, mei íadɨ omoɨ ie uaina jaca cacáñedɨomoɨ; ie abɨ cɨ́ocaillana jaca cɨóñedɨomoɨ.

³⁸Ie uaillaɨ omoɨ ɨfócɨmo déiñede, afe Moo orécamɨena omoɨ ɨ́ɨnoñena jira.

³⁹Juzíñamui Cuegáuaillaɨ izire jenoda facádotɨomoɨ; dɨnomo “Zíiñona illɨno báiitɨcaɨ” comécɨmo facáoidɨomoɨza. Uafue, Cuegáuaillaɨ cueri ñue úritiaɨoɨ,

⁴⁰mei íadɨ cuemo bíacañedɨomoɨ afe ómoɨmo zíiñona íllena.

⁴¹Comɨnɨ cuemo nitáacaga jalléinafuiaɨ náfueñedɨcue.

⁴²Mei íadɨ ómoɨna onódɨcue. Juzíñamuina izíruiñedɨomoɨ onódɨcueza.

⁴³Cue Moo cue ória jira bitɨcue, íadɨ cuena llɨ́ɨnoñedɨomoɨ. Jɨáɨmɨe dama ie ória izói bíadɨ afe ɨímana ñue llɨ́ɨnoitɨomoɨ.

⁴⁴¿Omoɨ nɨe izói ɨ́ɨnotɨomoɨ? Danɨ ómoɨmona cáɨmadua uaillaɨ llɨ́ɨnofɨredɨomoɨ; mei íadɨ daade Juzíñamuimona bitɨ́uai, ie cáɨmadua uai jenóñedɨomoɨ. Jira ɨ́ɨnonidɨomoɨ.