Juan 5:3-30

³Y tama e cinco ut champa era chꞌarobꞌ meyra ajmuacobꞌ. Ayan tin mutzꞌur unacꞌut, y ayan tin e tzꞌej uyoc, y ayan tin e chamen ucuerpo. Y tunorobꞌ war ucojcobꞌ tuaꞌ anijquesna e jaꞌ.

⁴Porque ayan ayan e día conda ecmay watar inteꞌ ángel tuaꞌ e Dios tuaꞌ unijques e jaꞌ. Y conda acay anijqui e jaꞌ e ajmuac xeꞌ oꞌchoy bꞌajxan macuir e jaꞌ axin atzꞌacpesna.

⁵Y yajaꞌ chꞌar inteꞌ ajmuac xeꞌ ayanix treinta y ocho año xeꞌ ajmuac.

⁶Entonces conda e Jesús cay uwira e winic y conda cꞌotoy unata cobꞌa año xeꞌ war ucojco e muaquir era, uyare e winic y che: —¿Cꞌani ca itzꞌacpa? che e Jesús.

⁷Y che e ajmuac: —Pues conda anijquesna e jaꞌ mamajchi ayan tuaꞌ utacrien onchoy tama e jaꞌ. Y conda cꞌani onchoy tama e jaꞌ wacchetaca anumuy otronteꞌ que nen, che e ajmuac era.

⁸Entonces che e Jesús: —Achpen xanen, jacha achꞌacteꞌ y cuchu chic, che e Jesús.

⁹Entonces wacchetaca quetpa tzꞌacpesbꞌir e winic y ujachi uchꞌacteꞌ y cay xana tacar. Pero cocha jax era inteꞌ día tuaꞌ e jiriar,

¹⁰y cocha ayan cora winicobꞌ tuaꞌ e Israel xeꞌ war uwirobꞌ tunor era, jaxirobꞌ cay ucꞌayobꞌ e winic y che: —Coner jax e día tuaꞌ e jiriar y ma erer aqꞌueche axin achꞌacteꞌ, che e winicobꞌ era.

¹¹Entonces che e winic: —Tin e utzꞌacpesen uyaren y che: “Jacha achꞌacteꞌ y cuchu chic”, che e winic.

¹²Entonces uyubꞌiobꞌ tuaꞌ e winic y chenobꞌ: —¿Tucꞌa winic xeꞌ cay uyaret y che: “Jacha achꞌacteꞌ y cuchu chic?” che e winicobꞌ era.

¹³Pero e winic machi unata chi umen tzꞌacpesna porque e Jesús satpa ut tujam e sian gente lo que ayan yajaꞌ.

¹⁴Entonces e Jesús utajwi e winic otronyajr macuir e templo y cay uyare cocha era y che: —Iran que tzꞌacpesbꞌiret era. Pero actan tuaꞌ ache más e mabꞌambꞌanir tuaꞌ machi asutpa acꞌaxi inteꞌ muaquir xeꞌ más nojta tamaret, che e Jesús.

¹⁵Entonces ixin e winic tuaꞌ utajwi e winicobꞌ xeꞌ cay ojronobꞌ tacar tuaꞌ uyare que jax e Jesús xeꞌ utzꞌacpes.

¹⁶Y tamar era qꞌuijnobꞌ e nuquir winicobꞌ upater e Jesús umen que jaxir utzꞌacpes e ajmuac tama inteꞌ día tuaꞌ e jiriar. Y tamar era cay xanobꞌ tupat e Jesús.

¹⁷Pero e Jesús uyare e winicobꞌ y che: —Nitata Dios apatna iraj iraj, y nen ubꞌan ucꞌani tuaꞌ impatna iraj iraj, che e Jesús.

¹⁸Y tamar era qꞌuijnobꞌ meyra e winicobꞌ era y cay ubꞌijnuobꞌ tuaꞌ uchamsiobꞌ e Jesús porque jaxir machi war acꞌupseyan tut lo que chꞌar tzꞌijbꞌabꞌir tama uley e Moisés tama e día tuaꞌ e jiriar. Y war aqꞌuijnobꞌ ubꞌan umen que jaxir che que e Dios jax Utata xeꞌ war che que jaxir Dios ubꞌan.

¹⁹Entonces ojron e Jesús y che: —Cꞌani inwareox era que Uyunen e Dios matucꞌa erer uche ubꞌajner, sino que war uche jax taca lo que war uwira uche Utata. Y tunor lo que uwira uche Utata war uche jaxir ubꞌan.

²⁰Y e Tatabꞌir war uyajta ut Uyunen y war uwirse tunor lo que war uche. Y cꞌanto uwirse Uyunen meyra milagro lo que tuaꞌ axin uche este que ixixin ixbꞌacta iwira conda axin uche.

²¹Y cocha e Tatabꞌir usuti ubꞌixqꞌues tin e chamen tuaꞌ uyajcꞌuobꞌ ucuxtar otronyajr, bꞌan erer uche Uyunen ubꞌan taca tin e ucꞌani.

²²Y e Tatabꞌir mamajchi tuaꞌ ubꞌijnu uwira jay cꞌani asatpa o jay cꞌani uchꞌami e cuxtar xeꞌ machi tuaꞌ acꞌapa, porque ixin uyajcꞌu e cꞌotorer era Uyunen tuaꞌ axin ubꞌijnu uwira tunor e gente jay cꞌani asatpobꞌ o jay cꞌani uchꞌamiobꞌ e cuxtar xeꞌ machi tuaꞌ acꞌapa.

²³Y bꞌan uche e Tatabꞌir tuaꞌ atajttzꞌa Uyunen bꞌan cocha atajttzꞌa jaxir. Porque tin e machi war utattzꞌi e Unembꞌir ma cocha erer utattzꞌi e Tatabꞌir ubꞌan, porque jax jaxir xeꞌ uyebꞌta tari e Unembꞌir era.

²⁴’Y cꞌani inwareox que tunor tin e axin uyubꞌi niwojroner y axin acꞌupseyan tamar tin xeꞌ uyebꞌta tarien, ayan ucuxtar xeꞌ machi tuaꞌ acꞌapa. Y machi tuaꞌ asatpobꞌ porque locꞌoyobꞌ tama e chamer y numuyobꞌ tama e cuxtar xeꞌ machi tuaꞌ acꞌapa.

²⁵Cꞌani inwareox que watar e hora xeꞌ jax e hora era conda tunor tin e machi unata chi e Dios cꞌani uyubꞌiobꞌ unuc Uyunen e Dios. Y tunor tin e acꞌotoy uyubꞌiobꞌ unuc e Unembꞌir era cꞌani uchꞌamiobꞌ e cuxtar xeꞌ machi tuaꞌ acꞌapa.

²⁶Porque bꞌan cocha ayan ucꞌotorer e Tatabꞌir tuaꞌ uyajcꞌu e cuxtar, y bꞌan Uyunen ubꞌan que ayan ucꞌotorer tuaꞌ uyajcꞌu e cuxtar.

²⁷Y Uyunen era ajcꞌuna e cꞌotorer tuaꞌ uche juzgar umen e Tatabꞌir cocha jaxir tari tara tor e rum y cuxpa tuaꞌ aquetpa Uyunen e winic.

²⁸Ira ixbꞌacta tamar lo que cꞌani inwareox era, porque acꞌotoy e día conda tunor tin e chamen cꞌani uyubꞌiobꞌ unuc Uyunen e Dios.

²⁹Y tamar era tunorobꞌ cꞌani asujta abꞌixqꞌuesnobꞌ y axin alocꞌoyobꞌ tama umujrirobꞌ. Y tunor tin e cay uchiobꞌ lo que erach tama ucuxtarobꞌ tara tor e rum cꞌani uchꞌamiobꞌ e cuxtar xeꞌ machi tuaꞌ acꞌapa. Pero tunor tin e cay uchiobꞌ e mabꞌambꞌanir tama ucuxtarobꞌ tara tor e rum cꞌani asatpobꞌ, che e Jesús.

³⁰Pues warto oꞌjron e Jesús taca e nuquir winicobꞌ era y che: —Pues nen matucꞌa erer inche nibꞌajner taca. Y tamar era bꞌan cocha war umbꞌi tama Nitata y bꞌan war imbꞌijnu inwira tama tunor. Y tamar era machi cꞌani inware que erach lo que mabꞌambꞌan, y machi cꞌani inware que mabꞌambꞌan lo que erach, porque machi war insicbꞌa tuaꞌ intzayjres nibꞌa sino que war inche bꞌan taca cocha ucꞌani jaxir xeꞌ uyebꞌta tarien.