Juan 5:18-25

¹⁸Ruma waꞌ raj judiꞌabꞌ más xkiya kibꞌ che ukamisaxik ri Jesús, ma e chikiwach rike kupalajij ri taqanik puwi ri qꞌij re uxlanibꞌal. Y na xew ta waꞌ, ma kujunimaj ne ribꞌ rukꞌ ri Dios echiriꞌ kubꞌiꞌij ri Dios e Uqaw.

¹⁹Ekꞌu ri Jesús xubꞌiꞌij chike: «Paqatzij wi kambꞌiꞌij che alaq: Rukꞌajol ri Dios na jinta kꞌo kuꞌan xa pa re Rire; ma xew kuꞌan pachaꞌ ri karilo kuꞌan Ruqaw. Janipa taq ri kuꞌan Ruqaw, jekꞌulaꞌ kuꞌan Rukꞌajol.

²⁰»Ma ri Dios lik kꞌax kunaꞌ Rukꞌajol y kukꞌut kꞌu che ronoje ri kuꞌano. Yey kꞌo ne ri más nimaq taq chak kukꞌut chwach. Y we xuꞌan kꞌu waꞌ, lik kakam ne animaꞌ ralaq che.

²¹Ma jelaꞌ pachaꞌ ri Dios kebꞌukꞌastajisaj ri ekaminaq y kuya kikꞌaslemal, jekꞌulaꞌ Rukꞌajol kuya kꞌaslemal china che ri karaj kuya wi.

²²Yey ri Dios na kuqꞌat tane tzij puwi junoq, ma puqꞌabꞌ Rukꞌajol uyaꞌom wi kuqꞌat tzij pakiwi ri tikawex,

²³chaꞌ jelaꞌ konoje ri tikawex kakiyak uqꞌij Rukꞌajol, jelaꞌ pachaꞌ kakiꞌan che uyakik uqꞌij ri Dios. Yey china ri na kuyak ta uqꞌij Rukꞌajol ri Dios, na kuyak ta kꞌu uqꞌij riꞌ ri Jun xtaqaw lo re, waꞌ e ri Dios.

²⁴»Paqatzij wi kambꞌiꞌij che alaq: China ri lik kuta chi utz ri kambꞌiꞌij riꞌin y kakubꞌiꞌ ukꞌuꞌx rukꞌ ri xtaqaw lo we, riꞌ kꞌo ukꞌaslemal na jinta utaqexik y na kukꞌul ta ri kꞌaxkꞌolil re ri qꞌatbꞌal tzij. Jekꞌulaꞌ, na jinta chi puqꞌabꞌ ri kamik, ma asu xqꞌax chupa ri kꞌaslemal.

²⁵Paqatzij wi kambꞌiꞌij che alaq: Kopon kꞌu ri ora y e chi uqꞌijol waꞌ echiriꞌ ri na jinta kikꞌaslem chwach ri Dios, kakita ruqul Rukꞌajol ri Dios. Yey china taq kꞌu riꞌ ri kakikoj utzij, kꞌo kikꞌaslemal na jinta utaqexik.