Juan 4:9-30

⁹Ontò nepela se bayi, so doen ketanem te menge Judiyo te eked dan kaen aw inem diyà te telepagan te menge tege Samarya, aw eked dan heman pegdoma kandan. Yan minikagi se bayi, “Sikona se sakop te Judiya, aw siak se sakop te Samarya. Nengà lay nemoyò ka kanak te wayeg inemen?”

¹⁰Timaba si Jesus, “Aw netegahan no pa aw eden se ibowang te Timanem kamno, aw netegahan no heman aw sinu se nemoyò te wayeg diyà kamno, sikona se memoyò diyà kanak, aw begayan ta te wayeg egpemegay te pedowan.”

¹¹Minikagi se bayi, “Sir, wedad kamno segaday, aw mediyò heman se wayeg doton didalem te sokian. Kenan no lay ebati se wayeg egpemegay te pedowan?

¹²Kemonaan tadon gebii si Jacob se nemangbang te sokian seini egselokan tadon. Seini se eg-ineman din, aw kedita te batà din, aw ayam-ayam din. Labi ka lay pa melangkaw diyà kandin?”

¹³Timaba si Jesus, “Aw minem se otaw te wayeg seini, todà sikandin melao.

¹⁴Meneng se otaw minem te wayeg ibegay ko kandin, yan se eked todà palos kelao. Se wayeg ibegay ko kandin, yan se meinang selep kidoen kandin egtebolan te wayeg mekebegay te kaling pedowan wedad temanan.”

¹⁵Minikagi se bayi, “Sir, peinemi a te wayeg sìyan amon eked a palos kelao, aw amon wedad den palos keilangan te todà a somalok dini.”

¹⁶Minikagi si Jesus, “Engayi se esawa no, aw likò kaw dini.”

¹⁷Minikagi se bayi, “Wedad esawa ko.” Minikagi si Jesus, “Benal se inikagi no te wedad esawa no,

¹⁸so mekelima ka pa pengognan, aw kenà ontò kamno esawa se meama migdoma kamno. Benal se inikagi nikaw.”

¹⁹Minikagi se bayi, “Sir, netegahan ko den te telekeliwat ka insogò te Timanem.

²⁰Se menge kemonaan day tege Samarya, yan se migsimba te Timanem dini te bontod seini. Meneng sikiyo menge Judiyo, egtoladà kaw te keilangan megsimba kidon doton te Jerusalem.”

²¹Minikagi si Jesus, “Penenalan ka kanak. Doen aldaw domateng aw kenà olò dini te bontod seini se simbahan te otaw, aw kenà olò heman doton te Jerusalem, meneng mepakay aw simbahen se Timanem Amay pengkey kenan.

²²Sikiyo tege Samarya, wedà kaw ketaga-taga aw sinu se egsimbahen niyo. Meneng sikami Judiyo, netaga-taga kay aw sinu se egsimbahen day, so pineokit kenami Judiyo, megpelowà se Timanem te kedita te otaw.

²³Dimateng den se aldaw te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan, so yan se ibeg te Timanem te megsimba se otaw kandin iling kenyan.

²⁴Wedad lawa te Timanem, aw eked heman sikandin kitai. Yan se doun te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan.”

²⁵Minikagi se bayi, “Netegahan ko te domateng se Misiyas amon megpelowà kenitadon, sìyan isogò te Timanem iningedanan Cristo. Aw domateng sikandin, lebaden din se kedita te kebenalan diyà kenitadon.”

²⁶Minikagi si Jesus, “Se minikagi diyà kamno, yan se insogò te Timanem.”

²⁷Dalem pa te peg-ikagi i Jesus kandin, dimateng se menge tinoledaan din. Ontò dan nepela te minikagi si Jesus diyà te bayi. Meneng wedad palos mig-insà aw eden se ibeg te bayi kandin. Wedà dan heman peg-insà te nengà lay minikagi si Jesus diyà kandin.

²⁸Penga niyan, tinenanan te bayi se sibolan din, aw ayas minolì doton te lonsod. Pegdateng din doton, minikagi sikandin diyà te menge otaw,

²⁹“Taking kaw kanak amon kitaen niyo heman se otaw mig-indan kanak te kedita te ininang ko. Sikandin besi se Misiyas megpelowà kenitadon.”

³⁰Yan nesayo dan aw dimoton dan ki Jesus.