Juan 4:9-24

⁹Tegin Samaritano-ome Jesúsga chogal: —An pega ti kwen uknejul. ¿Imi pe Judio-tulejulzhí, tede pe igi anche ti ekisneé? ¿Pe wiszhulzhí, antin Samaritano-tule? (Imi teun Judio-tulemal Samaritano-tulemalbak kusgu aga istar takmal.)

¹⁰Tegin Jesús Samaritano-omega chogal: —Imi pe wisgujalen Pab tulega ibi uko, tegin pe wisgusbalilen toa peje ti ekisnai, pe anka kwen chogzhajulin: ‘An pega ti kwen ukojul.’ Tenal pe anche ti ekichijalen, antin pega ti-ilagwen-nadgu-tule-otuloged ukoen.

¹¹Tegin Samaritano-ome Jesúsga chogalzhun: —Tummad, pe pormo nikchul ti weigal, tenal ti-ya-akial-chiid-orojulbali. Al pe unnijul ti weigal. ¿Tede pe pia ti-tule-otuloged onogo-adé?

¹²¿Ade pede anmal-tadgan-Jacobga pul tule-tummadzhí? Imi Jacob aga we ya akis aga ti kobgal. Tegin Jacob-e-nuskan ampa we yagin ti kobzhamalmo, tegin e-immalmal-tulgan ampa we yagin ti kobzhamalmo.

¹³Tegin Jesús Samaritano-omega chogalbal: —Imi meke-ibi-tule we ti kobzhal, ampa kannan-kannan ukul-ukul itononibalo.

¹⁴Tenal meke-ibi-tule an-ti-ukchad kobzhal, ukul-ukul pal kwen itononikojul. Tenal an-pega-chogzhad-ti tule-ulubgin ti-kammubal ti-ilagwen-nadgu-ariomaidyob kunoniko, tule ilagwen-nadgu tullegal.

¹⁵Tegin Samaritano-ome Jesúsga chogalbal: —¿Teobí? Tummad, tegil pe anka te ti udado, an melle ukul-ukul pal itogal, tegin an itije, melle ti pal weinonigalbal.

¹⁶Tegin Jesús omega chogalbal: —Nabir. Tegil pe aga macheredzhe kolnaddo. Tegin pe kannan tagbalo.

¹⁷Tegin ome Jesúsga chogal: —Ani, an machered-kwen-nikchuli. ¿Tede an igi naga macheredzhe kolnao? Tegin Jesús omega chogal: —Nabir pe chogendo: ‘An machered-kwen-nikchul.’

¹⁸Tenal pe machered-walatalgus-nikugus. Tenal pe-machered-nikad ampa pe-machered-chunchunnad chulbal. Al pe anka chogzhad, ib-chunchunnaddo: ‘An machered-kwen-nikchul.’

¹⁹Tegin ome Jesúsga chogal: —¿Tummad, igi pe an-wisgus-ade, an machered-nika? ¿Tegil pe Pab-Tummad-kaka-palchogeddé? ¿Al pe weob an-wisyé?

²⁰Imi anmal-tadgan iti-yal-kwichidgin Pab Tummadzhe kochamal, tenal pemal-Judiomal chogmal, anmal Jerusalénginbi Pab Tummadzhe koled-wilubmal. ¿Tegidde pe igi chogmójun?

²¹Tegin Jesús omega chogal: “Ome, pe melle ankin-penguma. Tenal ibe kujal nonikodo, meke iti-yal-kwichidgin, meke Jerusaléngin, pemal Pab Tummadzhe kwen kolojulmal.

²²Tenal pemal-Samaritano-tulemal Pab-Tummad-wichulmaladbal Pab Tummadzhe kolnanimal. Tenal anmal-Judiomal Pab-Tummad-wijiidbal Pab Tummadzhe kolnanimal. Imi Pab-Tummad-tule-abonoged-igal unnila Judiomalbalbi noni.

²³“Tenal ibe noniko, tenal imi ibe pato iche-iche kunai, tule-chunchunnad-Pab-otummonanimalad purpal, tegin ib-chunchunnadgin Pab Tummadzhe kolnanimal, tenal Pabzhe-koled negginbijul. Tenal Pab Tummad tule-purpal-eje-kolmalad-ami, eje-koledgin e-otummogal.

²⁴Tenal Pab Tummad purpaled-choggu, al tulemal chunchunnadgin purpal Pab Tummadzhe kolenabmal Pab-Tummad-otummogal.”