JUAN 4:43-53

⁴³Zeeṉe goc chop ngbidz co, laa no briee ga gza no me, laa no bdzio nëz stib zio no nëz Galilé.

⁴⁴Niicle ne bzeetle me: grëse zha ne ziadteed xtiidz Dios, ib raṉdzed miech zho zaatne nac ladz zho; per

⁴⁵zeeṉe bzëëb me grë guiedz ne ngab Galilé, wen pcaania grë miech co me. Nzian zho güey lni Pascw co Jerusalén, goṉ zho grëtaa milagr ne beeṉ me ga.

⁴⁶Nëz no no bdziṉ no Caná, zaatne sca bzaalo me nis vin. Ga bdzieelo me tib zha Capernaum, tib zha ne rquia dziin lo rey; lëëtaque leṉ dze co rzacnë xpëëd me.

⁴⁷Bin me laa Jesús briee xtan meṉ Judé, laa me no gdziṉ Galilé. Dzigo biaad me biaddzieelo me Jesús ga, bnab me lo Jesús tsienaḻ Jesús zhits me Capernaum, tsieguṉguiac Jesús xpëëd me; sac nzhoo rac win.

⁴⁸Dzigo rëbchaa Jesús lo me: ―¿Pe haxta gaṉ to dzigo guṉ naa milagr, dzigoraa gliladz to naa?

⁴⁹―Beeṉ tib guieḻnzaac gotsaa guioniob ne ―rëb meṉ co―, nend znuse lozh xpëëd naa.

⁵⁰Rëbchaa Jesús: ―Bzë, tsod luu guieḻnë. ¡Laa xpëëd luu biacle! Dib zdoo meṉ co bliladz me xtiidz Jesús, laa me bio nëz laa me zey.

⁵¹Zhilew gdziṉ me lidz me, zeeṉe bdzieelo me bla zha ne quia xtsiiṉ me, rëb zho laa xpëëd me biacle.

⁵²Dzigo bnabdiidz me lo zho, maase pa hor biac win. Rëbchaa zho: ―Nieeg, zig rwe ngbidza, tibaque znuse briee zhixlëë win.

⁵³Dzigo psoladz me zig hor cotaque rëb Jesús lo me, laa xpëëd me biacle. Dzigo dib zdoo me bliladz me Jesús, tsieel me, xpëëd me, meṉlidz me ne, grëse zho dib zdoo zho bliladz zho Jesús.