Juan 4:34-44

³⁴Minikagi si Jesus, “Iling te kànen ko se pegtoman ko te ibeg te simogò kanak aw peg-epos ko te sogò din kanak.

³⁵Eg-ikegiyen niyo te doen epat se bolan te eked pa peglegani. Meneng mikagi a den kenyo te dimateng den se aldaw te peglegani. Tengtengi niyo se medita otaw seini meibeg memenal, so iling dan te tinanem neketagad den geniyen.

³⁶Doen ontong kinewaen te otaw meglegani te otaw memenal, aw kaling pedowan wedad temanan se ibegay te Timanem diyà te otaw memenal. Pengkey sebad otaw se menanem, aw doma otaw se meglegani te pongo niyan, meneng se kedita dan eleg meluba.

³⁷Yan benal se eg-ikegiyen, ‘Menanem se sebad, meneng meglegani se doma.’

³⁸Isogò ko den sikiyo meglegani kidoen te pawà wedà niyo tenemi. Meneng tandà te pagod te doma otaw, medita se otaw geniyen niyo megpesakop diyà te peglowan te Timanem.”

³⁹Doen medita tege Samarya nemenal diyà ki Jesus tandà te peg-ikagi te bayi, “Inindanan a din te kedita te ininang ko.”

⁴⁰Yan pegdateng te menge tege Samarya doton ki Jesus, ontò dan nemoyò kandin te meg-ogpà kidoen kandan. Yan mig-ogpà si Jesus kidoen te dowa se delem.

⁴¹Pegtoladà din kidoen, labi pa medita se otaw nemenal kandin.

⁴²Minikagi dan diyà te bayi, “Nemenal kay den kenà olò pineokit te inikagi no kenami, meneng nemenal kay den so nenenalan kay den kandin, aw netegahan day den te ontò sikandin se megpelowà te kedita te otaw.”

⁴³Nayan, pegkepenga te dowa se delem, nesayo si Jesus aw dimoton te probinsya te Galiliya.

⁴⁴Tapay minikagi si Jesus te kenà egsegmanen se menge telekeliwat te kagi te Timanem kidoen te probinsya tinebawan dan.