Juan 4:29-54

²⁹“Hamos baya kamo kag kitaa kay may tawo na nagsabi sa akon san tanan ko na nahimo. Amo na kaya ini an Cristo?”

³⁰Kaya nagruluwas sinda sa lungsod kag nagpakadto kan Jesus.

³¹Myintras tanto, ginpirit si Jesus san mga disipulos, “Maestro, kaon anay tabi.”

³²Pero ginsabat pa lugod niya sinda, “Igwa akoʼn pagkaon na dili niyo aram.”

³³Pakabati sani nagpahurunga-hunga an mga disipulos, “Nano, may nagdara sa iyaʼn pagkaon?”

³⁴Didi nagpahayag si Jesus: “An akon pagkaon amo an pagtuman san kabubut-on san nagsugo sa akon kag an pagtapos san ginpahimo niya.

³⁵Nano, dili may kasabihan kamo: ‘Upat ka bulan pa kag tig-anihan na?’ Pero kitaa an iyo patalibod! Tig-anihan na baga!

³⁶An nagaani may suhol ngani kag nakatipon sin produkto para sa buhay na waraʼn katapusan agod pareho magakalipay an parasabwag kag paraani.

³⁷Kaya matuod an kasabihan, ‘An usad nagasabwag pero an iba naman nagaani sani.’

³⁸Halimbawa, ako nagsugo sa iyo agod mag-ani san dili niyo ginpaglan pagsabwag. An iba an nagpagal pero kamo an nagpulos san inda pinagalan.”

³⁹Sana mismo damo na mga Samaritano sadto na lungsod an nagtuod kan Jesus dahilan san ginsabi san babayi, “Sinabi niya an tanan ko na hinimo.”

⁴⁰Niyan, pagtulos san mga Samaritano, naghangyo na magpabilin anay si Jesus sa inda. Kaya didto siya nagpalipas sin duha ka adlaw.

⁴¹Tungod sani damo pa an nagturuod dahilan san iya mga katukduan.

⁴²Kaya ginsabihan ninda an babayi, “Niyan, dili lang kami nagatuod dahilan san imo ginsumat kundi nabatian pa gayod namon siya mismo kag naaraman na siya man gayod an Parasalbar san kinab-an.”

⁴³Pakalipas san duha ka adlaw si Jesus nagpa-Galilea,

⁴⁴kay siya mismo nagsabi na waraʼn ginagalangan na propeta sa iya sadiri na lugar.

⁴⁵Pag-abot niya didto, ginpadayon siya san mga taga-Galilea kay san nakipamyista sinda sa Jerusalem para sa Paskwa nakita ninda an tanan na ginhimo niya didto.

⁴⁶Niyan, nakabalik gihapon si Jesus sa Cana san Galilea kun diin ginhimo niya an tubig na bino. Igwa didto sa Capernaum sin opisyal na may anak na masakit.

⁴⁷Pakabati sani na opisyal na si Jesus nag-abot sa Galilea hali sa Judea, nagkadto siya sa iya sa Cana kag nakimaluoy kan Jesus na maglugsad sa Capernaum agod ayuhon an iya anak na tikamatayon.

⁴⁸Tapos ginhunga siya ni Jesus, “Nano, dili kamo magaturuod sa akon kun dili kamo nakakita sin mga tanda kag mga milagro?”

⁴⁹Ginsabihan gihapon siya san opisyal, “Ginoo, kadto man anay tabi antes mamatay an akon anak.”

⁵⁰Nagsabat si Jesus, “Uli na, maayo na an imo anak.” Nagtuod an tawo san ginsabi sa iya ni Jesus kaya naglakat na siya.

⁵¹San nagapauli na siya, sinugat siya san iya mga suruguon na nagbarita na maayo na an iya anak.

⁵²Pakabati sani, ginhunga niya sinda kun nanoʼn oras naulian an bata kag ginsabihan siya ninda, “Kagahapon na mga ala una an adlaw siya nahaw-asan san iya kalintura.”

⁵³Nadumduman san ama na sana man na kaurason siya ginsabihan ni Jesus na, “Maayo na an imo anak.” Kaya siya mismo nagtuod kag san bilog niya na panimalay.

⁵⁴Amo ini an ikaduha na milagro na ginhimo ni Jesus san pagkadto niya sa Galilea hali sa Judea.