JUAN 4:27-53

²⁷Laatee orguin wberee yra xpén Jesus, kesentyent wzee wzak men ne wii men kayuu Ne diiz yrup Ne te wnaa; per ni te men wnabdiizdet gan pe rlaan wnaa guin o gan pe diizzhe ruu Ne yrup Ne men.

²⁸Nga wsan xree wnaa guin sya men. Wdxiin men lenlgyëz, re men lo mén:

²⁹―Gutaa gante, tsa be kwii de te mén ne wzëët yrandxee ne wlaa noo. ¿Pe let laadet Crist nga?

³⁰Lex wruu yra mén gyëz guin za men lo Jesus.

³¹Myentras ne nuu yra mén guin nëz, wzelo yra xpén Jesus re men lo Jesus: ―Maxter, gugu.

³²Wke Ne re Ne: ―Noo che rap noo ne ru noo, rnebeeydet do.

³³Lex wzelo yra xpén Jesus rnabdizlsaa men, re men: ―¿Peguin nuu txu wdxidneey ne wu Jesus?

³⁴Orguin re Jesus: ―Ne ru noo nak ne ylaa noo ne rlaan Dëdyuzh no ne yseyal noo ne wxaal Ne noo ylaa noo.

³⁵Re de yra de: “Benak rak falt tap mëëw ne ydxiin kwlaap.” Per yna noo lo de: Gulis lo de gukwii den, le we che wal, wal ylaap de.

³⁶Men ne rkaa kwlaap rezh rka men; logne rtop men por gyelembán ne nunk luzhdet nako, chen tese yzhiilen men ne rguu bni yra men men ne rkaa kwlaap.

³⁷Nli ne re lo diiz: “Wren mén ne rguu bni, wren mén ne rlaap.”

³⁸Noo wxaal de walaap de ledne wlaadet de dxiin; wren mén ne wlaa dxiin no laa de walaap ledne wlaa men dxiin.

³⁹Ndalyaa mengyëz guin wlaleedx Jesus por ne re wnaa guin lo men: “Yrandxee ne wlaa noo wzëët Jesus lo noo.”

⁴⁰Por neguin chene wdxiin yra mén guin lo Jesus, wnab men lo Ne ne ykaa Ne lo men. Lex wkaa Ne lo men txup gbiz,

⁴¹no ndalre mén wlaleedx Ne por ne won men diiz ne re Ne laa zhal Ne.

⁴²Lex re men lo wnaa guin: ―Orree si let nozdet por ne na de lo noo yra noo rlaleedx noo ménree, sinke por ne noo zhal won ne rzëët men, no nan noo ne nli laa men yselaa mengyëzlyu.

⁴³Chene wluzh txup gbiz, wruu Jesus lo lyu ne la Samaria za ke Ne lo lyu ne la Galilea.

⁴⁴No laake Ne re, ni te profet rzaknondet mén men laake laz men.

⁴⁵Le chene wdxiin Ne Galilea, kesentyent waknzebnëz mén guin lo Ne porke no men wa lni pask Jerusalén wii men yrandxee ne wlaa Ne.

⁴⁶Zhich guin wa Ne Caná ste ne nak lo lyu guin ne la Galilea, ledne wlaa Ne nis bin. Capernaum nuu te xsoldad rrey, rzhuun xpee men.

⁴⁷Chene won men ne le Jesus che wruu lo lyu ne la Judea wdxiin Ne lo lyu ne la Galilea, wa men lo Ne wanab men ne tsa Ne ruxyuu men yneseyaken Ne xpee men porke che mer mer guet mee.

⁴⁸Lex re Ne lo men: ―Laa de yra de belne bet gyelmilaguer kwiidet de, bet ylaleedxdet de.

⁴⁹Per re men: ―Dechey, yoo tsague be antes ke ne guet xpee noo.

⁵⁰Orguin re Jesus lo men: ―Guberee ruxyuu de, le xpee de che wyaken. Wlaleedx men ne re Jesus, syague men ruxyuu men.

⁵¹Chene sya men, wruu xmos men watsëlnëz men men, re men lo men: ―Le xpee de che wyaken.

⁵²Lex wnabdiiz men gan pa orzhe wzelo wruu xlaa led xpee men, re yra mén guin: ―Naag beyteb wruu xlaa led mee.

⁵³Orguin wnileedx men ne medid orke guin re Jesus: “Le xpee de che wyaken.” Lex wlaleedx men Jesus yra xfamilyendxee men.