Juan 4:16-41

¹⁶Y che e Jesús: —Quiqui pejcan aviejo y sutpen lar otronyajr, che e Jesús.

¹⁷Y che e ixic: —Pero matucꞌa niviejo, che e ixic. Y che e Jesús: —Erach lo que awaren era que matucꞌa aviejo.

¹⁸Porque nen innata que cinco ut ani aviejo, pero xeꞌ qꞌuecher amener coner ajxambꞌar winic taca y majax aviejo. Y tamar era chequer que majax majresiaj lo que war ache tacaren, che e Jesús.

¹⁹Y che e ixic: —Chequer taniut tamar awojroner que net jax inteꞌ profeta tuaꞌ e Dios.

²⁰Tunor catata viejobꞌir tara tama e Samaria cay uyujtzꞌiobꞌ ut e Dios tor e witzir era, pero nox xeꞌ tuox e Israel war iware que jax taca tama e chinam Jerusalem tiaꞌ ucꞌani tuaꞌ cojytzꞌi ut e Dios, che e ixic.

²¹Y che e Jesús: —Cꞌupsen niwojroner era, ixic. Watar e día conda tuaꞌ ojytzna ut Catata Dios tic taca y majax tor e witzir era y majax tamar taca e chinam Jerusalem.

²²Nox xeꞌ tuox e Samaria machi inata chi xeꞌ war iyujtzꞌi ut. Pero non xeꞌ tuon e Israel war canata chi xeꞌ war cojytzꞌi ut, porque e corpesiaj watar tuaꞌ e gente xeꞌ tuobꞌ e Israel.

²³Watar e día xeꞌ jax coner conda tunor tin e cꞌani uyujtzꞌiobꞌ ut e Dios ucꞌani tuaꞌ uyujtzꞌiobꞌ ut taca tunor uyalma y ucꞌani tuaꞌ uchiobꞌ bꞌan cocha ucꞌani xeꞌ erach. Porque bꞌan ucꞌani Catata Dios.

²⁴Porque e Dios nawalbꞌir xeꞌ machi cawira ut, y tamar era tin e cꞌani uyujtzꞌiobꞌ ut e Dios ucꞌani tuaꞌ uchiobꞌ taca tunor uyalmobꞌ y ucꞌani tuaꞌ uchiobꞌ bꞌan cocha ucꞌani xeꞌ erach, che e Jesús.

²⁵Y che e ixic: —Nen innata que watar e Ajcorpesiaj tuaꞌ tunor e gente tara tor e rum xeꞌ jax e Cristo. Conda ayopa jaxir axin uchectes tunor ticoit, che e ixic.

²⁶Y e Jesús che: —Jax nen e Cristoen xeꞌ war iyojron tacar, che e Jesús.

²⁷Y tamar era cꞌotoy uyajcanuarobꞌ otronyajr. War ubꞌijnu uwirobꞌ que war oꞌjron e Jesús taca inteꞌ ixic. Pero mamajchi uyubꞌi tuaꞌ e ixic que tucꞌa ucꞌani, y nien mamajchi uyubꞌi tuaꞌ e Jesús que tucꞌa tamar war oꞌjronobꞌ.

²⁸Entonces e ixic uyacta ubꞌujr y locꞌoy ixin tama e chinam tiaꞌ cay uyare tunor e gente y che:

²⁹—Lar chꞌujcunic inteꞌ winic xeꞌ cay uyaren tunor lo que cꞌapa inche. ¿Ma ca nic jax era e Ajcorpesiaj? che e ixic.

³⁰Entonces locꞌoyobꞌ e gente tama e chinam era tuaꞌ axin uwirobꞌ e Jesús.

³¹Pero uyajcanuarobꞌ e Jesús uyareobꞌ y chenobꞌ: —Cawajcanseyajet, cꞌuxu imbꞌijc lo que catares era, che uyajcanuarobꞌ.

³²Pero che e Jesús: —Nen ayan lo que erer incꞌuxi que nox machi war inata tucꞌa, che e Jesús.

³³Entonces cay ojronobꞌ uyajcanuarobꞌ jaxobꞌ taca y chenobꞌ: —¿Ayan ca nic tucꞌa taresna lo que tuaꞌ ucꞌuxi jaxir? che uyajcanuarobꞌ.

³⁴Pero ojron e Jesús y che: —Lo que tuaꞌ incꞌuxi jax tuaꞌ inche lo que ucꞌani jaxir xeꞌ uyebꞌta tarien y tuaꞌ acꞌapa inche tunor e patnar lo que arobꞌnen umener tuaꞌ inche.

³⁵Ira iwaren que ucꞌanto cuatro mes tuaꞌ watar e cosecha. Chꞌujcunic iwira e sian gente lo que watobꞌ era. Larobꞌ tacar inteꞌ jinaj xeꞌ warix ataqui porque turobꞌix tunorobꞌ tuaꞌ uchꞌamiobꞌ niwojroner.

³⁶Pues tin e war apatnobꞌ tama e cosecha ucꞌani tuaꞌ atojyobꞌ. Y lo que war uchꞌamiobꞌ tama e cosecha era jax e cuxtar xeꞌ machi tuaꞌ acꞌapa. Y tamar era tin e cay pacma y tin e war umorojse tunor e cosecha era erer axin atzayobꞌ chatertiobꞌ tamar lo que war uchꞌamiobꞌ era.

³⁷Pues erach e ojroner xeꞌ che: “Ayan inteꞌ xeꞌ apacma y ayan otronteꞌ xeꞌ axin umorojse conda acꞌotoy e día”, che e ojroner era.

³⁸Pues nen inwareox tuaꞌ ixixin imorojse lo que pacbꞌirix umen otronteꞌ, y nox intaquix ixiox imorojse, che e Jesús.

³⁹Y tamar era meyra gente tama e chinam era tama e departamento Samaria cay cꞌupseyanobꞌ tama e Jesús umen lo que cay arobꞌnobꞌ umen e ixic xeꞌ che: “Uyaren tunor lo que inchix”, xeꞌ arobꞌnobꞌ umen e ixic.

⁴⁰Y tamar era conda cꞌotoyobꞌ tunor e gente era cay upejcobꞌ e Jesús tuaꞌ acꞌotoy tama uchinam tuaꞌ ucansiobꞌ cora. Entonces quetpa e Jesús tacarobꞌ chateꞌ día.

⁴¹Y ayanto meyra gente xeꞌ cay cꞌupseyanobꞌ tama e Jesús conda uyubꞌiobꞌ lo que che jaxir.