Juan 4:15-38

¹⁵Minikagi se bayi, “Sir, peinemi a te wayeg sìyan amon eked a palos kelao, aw amon wedad den palos keilangan te todà a somalok dini.”

¹⁶Minikagi si Jesus, “Engayi se esawa no, aw likò kaw dini.”

¹⁷Minikagi se bayi, “Wedad esawa ko.” Minikagi si Jesus, “Benal se inikagi no te wedad esawa no,

¹⁸so mekelima ka pa pengognan, aw kenà ontò kamno esawa se meama migdoma kamno. Benal se inikagi nikaw.”

¹⁹Minikagi se bayi, “Sir, netegahan ko den te telekeliwat ka insogò te Timanem.

²⁰Se menge kemonaan day tege Samarya, yan se migsimba te Timanem dini te bontod seini. Meneng sikiyo menge Judiyo, egtoladà kaw te keilangan megsimba kidon doton te Jerusalem.”

²¹Minikagi si Jesus, “Penenalan ka kanak. Doen aldaw domateng aw kenà olò dini te bontod seini se simbahan te otaw, aw kenà olò heman doton te Jerusalem, meneng mepakay aw simbahen se Timanem Amay pengkey kenan.

²²Sikiyo tege Samarya, wedà kaw ketaga-taga aw sinu se egsimbahen niyo. Meneng sikami Judiyo, netaga-taga kay aw sinu se egsimbahen day, so pineokit kenami Judiyo, megpelowà se Timanem te kedita te otaw.

²³Dimateng den se aldaw te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan, so yan se ibeg te Timanem te megsimba se otaw kandin iling kenyan.

²⁴Wedad lawa te Timanem, aw eked heman sikandin kitai. Yan se doun te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan.”

²⁵Minikagi se bayi, “Netegahan ko te domateng se Misiyas amon megpelowà kenitadon, sìyan isogò te Timanem iningedanan Cristo. Aw domateng sikandin, lebaden din se kedita te kebenalan diyà kenitadon.”

²⁶Minikagi si Jesus, “Se minikagi diyà kamno, yan se insogò te Timanem.”

²⁷Dalem pa te peg-ikagi i Jesus kandin, dimateng se menge tinoledaan din. Ontò dan nepela te minikagi si Jesus diyà te bayi. Meneng wedad palos mig-insà aw eden se ibeg te bayi kandin. Wedà dan heman peg-insà te nengà lay minikagi si Jesus diyà kandin.

²⁸Penga niyan, tinenanan te bayi se sibolan din, aw ayas minolì doton te lonsod. Pegdateng din doton, minikagi sikandin diyà te menge otaw,

²⁹“Taking kaw kanak amon kitaen niyo heman se otaw mig-indan kanak te kedita te ininang ko. Sikandin besi se Misiyas megpelowà kenitadon.”

³⁰Yan nesayo dan aw dimoton dan ki Jesus.

³¹Pegtanan te bayi ki Jesus, minikagi se menge tinoledaan din, “Sir, kaen ka den.”

³²Minikagi si Jesus, “Doen kànen ko wedà niyo ketegahi.”

³³Yan migpeinsaay dan, “Doen lay lebò nemegay kandin te kànen?”

³⁴Minikagi si Jesus, “Iling te kànen ko se pegtoman ko te ibeg te simogò kanak aw peg-epos ko te sogò din kanak.

³⁵Eg-ikegiyen niyo te doen epat se bolan te eked pa peglegani. Meneng mikagi a den kenyo te dimateng den se aldaw te peglegani. Tengtengi niyo se medita otaw seini meibeg memenal, so iling dan te tinanem neketagad den geniyen.

³⁶Doen ontong kinewaen te otaw meglegani te otaw memenal, aw kaling pedowan wedad temanan se ibegay te Timanem diyà te otaw memenal. Pengkey sebad otaw se menanem, aw doma otaw se meglegani te pongo niyan, meneng se kedita dan eleg meluba.

³⁷Yan benal se eg-ikegiyen, ‘Menanem se sebad, meneng meglegani se doma.’

³⁸Isogò ko den sikiyo meglegani kidoen te pawà wedà niyo tenemi. Meneng tandà te pagod te doma otaw, medita se otaw geniyen niyo megpesakop diyà te peglowan te Timanem.”