Text copied!
CopyCompare
Se kaling peokit - Juan - Juan 4

Juan 4:14-52

Help us?
Click on verse(s) to share them!
14Meneng se otaw minem te wayeg ibegay ko kandin, yan se eked todà palos kelao. Se wayeg ibegay ko kandin, yan se meinang selep kidoen kandin egtebolan te wayeg mekebegay te kaling pedowan wedad temanan.”
15Minikagi se bayi, “Sir, peinemi a te wayeg sìyan amon eked a palos kelao, aw amon wedad den palos keilangan te todà a somalok dini.”
16Minikagi si Jesus, “Engayi se esawa no, aw likò kaw dini.”
17Minikagi se bayi, “Wedad esawa ko.” Minikagi si Jesus, “Benal se inikagi no te wedad esawa no,
18so mekelima ka pa pengognan, aw kenà ontò kamno esawa se meama migdoma kamno. Benal se inikagi nikaw.”
19Minikagi se bayi, “Sir, netegahan ko den te telekeliwat ka insogò te Timanem.
20Se menge kemonaan day tege Samarya, yan se migsimba te Timanem dini te bontod seini. Meneng sikiyo menge Judiyo, egtoladà kaw te keilangan megsimba kidon doton te Jerusalem.”
21Minikagi si Jesus, “Penenalan ka kanak. Doen aldaw domateng aw kenà olò dini te bontod seini se simbahan te otaw, aw kenà olò heman doton te Jerusalem, meneng mepakay aw simbahen se Timanem Amay pengkey kenan.
22Sikiyo tege Samarya, wedà kaw ketaga-taga aw sinu se egsimbahen niyo. Meneng sikami Judiyo, netaga-taga kay aw sinu se egsimbahen day, so pineokit kenami Judiyo, megpelowà se Timanem te kedita te otaw.
23Dimateng den se aldaw te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan, so yan se ibeg te Timanem te megsimba se otaw kandin iling kenyan.
24Wedad lawa te Timanem, aw eked heman sikandin kitai. Yan se doun te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan.”
25Minikagi se bayi, “Netegahan ko te domateng se Misiyas amon megpelowà kenitadon, sìyan isogò te Timanem iningedanan Cristo. Aw domateng sikandin, lebaden din se kedita te kebenalan diyà kenitadon.”
26Minikagi si Jesus, “Se minikagi diyà kamno, yan se insogò te Timanem.”
27Dalem pa te peg-ikagi i Jesus kandin, dimateng se menge tinoledaan din. Ontò dan nepela te minikagi si Jesus diyà te bayi. Meneng wedad palos mig-insà aw eden se ibeg te bayi kandin. Wedà dan heman peg-insà te nengà lay minikagi si Jesus diyà kandin.
28Penga niyan, tinenanan te bayi se sibolan din, aw ayas minolì doton te lonsod. Pegdateng din doton, minikagi sikandin diyà te menge otaw,
29“Taking kaw kanak amon kitaen niyo heman se otaw mig-indan kanak te kedita te ininang ko. Sikandin besi se Misiyas megpelowà kenitadon.”
30Yan nesayo dan aw dimoton dan ki Jesus.
31Pegtanan te bayi ki Jesus, minikagi se menge tinoledaan din, “Sir, kaen ka den.”
32Minikagi si Jesus, “Doen kànen ko wedà niyo ketegahi.”
33Yan migpeinsaay dan, “Doen lay lebò nemegay kandin te kànen?”
34Minikagi si Jesus, “Iling te kànen ko se pegtoman ko te ibeg te simogò kanak aw peg-epos ko te sogò din kanak.
35Eg-ikegiyen niyo te doen epat se bolan te eked pa peglegani. Meneng mikagi a den kenyo te dimateng den se aldaw te peglegani. Tengtengi niyo se medita otaw seini meibeg memenal, so iling dan te tinanem neketagad den geniyen.
36Doen ontong kinewaen te otaw meglegani te otaw memenal, aw kaling pedowan wedad temanan se ibegay te Timanem diyà te otaw memenal. Pengkey sebad otaw se menanem, aw doma otaw se meglegani te pongo niyan, meneng se kedita dan eleg meluba.
37Yan benal se eg-ikegiyen, ‘Menanem se sebad, meneng meglegani se doma.’
38Isogò ko den sikiyo meglegani kidoen te pawà wedà niyo tenemi. Meneng tandà te pagod te doma otaw, medita se otaw geniyen niyo megpesakop diyà te peglowan te Timanem.”
39Doen medita tege Samarya nemenal diyà ki Jesus tandà te peg-ikagi te bayi, “Inindanan a din te kedita te ininang ko.”
40Yan pegdateng te menge tege Samarya doton ki Jesus, ontò dan nemoyò kandin te meg-ogpà kidoen kandan. Yan mig-ogpà si Jesus kidoen te dowa se delem.
41Pegtoladà din kidoen, labi pa medita se otaw nemenal kandin.
42Minikagi dan diyà te bayi, “Nemenal kay den kenà olò pineokit te inikagi no kenami, meneng nemenal kay den so nenenalan kay den kandin, aw netegahan day den te ontò sikandin se megpelowà te kedita te otaw.”
43Nayan, pegkepenga te dowa se delem, nesayo si Jesus aw dimoton te probinsya te Galiliya.
44Tapay minikagi si Jesus te kenà egsegmanen se menge telekeliwat te kagi te Timanem kidoen te probinsya tinebawan dan.
45Meneng pegdateng din doton te probinsya te Galiliya, nepela sikandin so limiyag se menge tege Galiliya kandin, so medita dan se timanod te Pista te Pegpelowà kidoen te Jerusalem, aw kinità dan se menge kepelahan ininang din kidoen.
46Limikò si Jesus doton te lonsod te Kana sakop te Galiliya. Yan se lonsod ininangan din te kepelahan, so binaloy din bino se wayeg kidoen. Doton te doma lonsod te Kapirnaom, doen sebad opisyal te gobirno te Roma, aw nesekitan se batà din.
47Pegdineg din te nesayo den si Jesus lekat te probinsya te Judiya aw dimateng den kidoen te probinsya te Galiliya, dimoton sikandin ki Jesus, aw nemoyò te domoton sikandin te Kapirnaom amon megpegolì te batà din, so ontò den netigdaan.
48Minikagi si Jesus, “Aw wedad pengilala aw kepelahan kitaen niyo, eked kaw pemenal kanak.”
49Minikagi se opisyal, “Sir, ayas ka taking kanak te eked pa kematay se batà ko.”
50Minikagi si Jesus, “Olì ka den, so negolian den se batà nikaw.” Nemenal se opisyal te inikagi i Jesus kandin, aw nesayo.
51Te wedà pa dateng doton te balay din, pig-isongon din se menge sineligan din kidoen te dalan, aw mig-indan dan kandin te negolian den se batà din.
52Penga niyan, mig-insà sikandin aw eden orasi se pegkèpiya din. Timaba dan, “Gebenini te ala ona te meapon, minowas se keinit te lawa din.”

Read Juan 4Juan 4
Compare Juan 4:14-52Juan 4:14-52