Juan 4:1-17

¹Pues entonces tama e tiempo era meyra gente cay chꞌujyobꞌ tuaꞌ aquetpobꞌ uyajcanuarobꞌ e Jesús. Y e Juan war achꞌuyma ubꞌan pero majax meyra gente cocha war uche e Jesús y uyajcanuarobꞌ. Y conda cꞌotoy unatobꞌ tunor era tin e fariseobꞌ, cay ojronobꞌ.

²Pero e Jesús machi war achꞌuyma sino que jax taca uyajcanuarobꞌ.

³Y conda Cawinquirar cay uyubꞌi lo que war aꞌrobꞌna umen e fariseobꞌ locꞌoy tama e departamento Judea y sutpa ixin esto tama e departamento Galilea otronyajr.

⁴Pero tamar uxambꞌar era quetpa tuaꞌ unumse e departamento Samaria tuaꞌ acꞌotoy tama e departamento Galilea.

⁵Y bꞌan war axin e Jesús conda cꞌotoy tama inteꞌ chinam tama e departamento Samaria xeꞌ ucꞌabꞌa Sicar xeꞌ majax innajt tiaꞌ turu e rum lo que e Jacob cay uyacta taca e José xeꞌ jax inteꞌ uyunen tama e onian tiempo.

⁶Y conda qꞌuix acꞌotoy uyuxin e día cꞌotoy e Jesús tiaꞌ turu ut e jaꞌ xeꞌ chembꞌir umen e Jacob tama e onian tiempo. Entonces turuan tama utiꞌ ut e jaꞌ era cocha war acꞌoy meyra umen e xambꞌar.

⁷Y tama e hora era cꞌotoy inteꞌ ixic xeꞌ tuaꞌ e departamento Samaria xeꞌ cꞌani ubꞌutꞌi ubꞌujr taca e jaꞌ. Entonces ojron e Jesús taca e ixic y che: —Ajcꞌunen e jaꞌ, cꞌani unchꞌi, che e Jesús.

⁸Pues turu e Jesús ubꞌajner cocha ixiobꞌ uyajcanuarobꞌ tama e chinam yajaꞌ tuaꞌ usajca umaniobꞌ lo que tuaꞌ ucꞌuxiobꞌ.

⁹Pero cocha e gente tuaꞌ e Israel machi upejca ubꞌobꞌ taca e gente tuaꞌ e Samaria, ojron e ixic y che: —Nen ajlugaren tama e departamento Samaria, y net ajlugaret tama e lugar Israel. ¿Y tucꞌa tuaꞌ war acꞌajti e jaꞌ tanibꞌa? che e ixic.

¹⁰Entonces che e Jesús: —Jay net anata ani cobꞌa erer achꞌami tuaꞌ e Dios, o jay anata ani chi xeꞌ war ucꞌajti e jaꞌ tacaret, net acꞌajti ani tacar y jaxir uyajqꞌuet ani e jaꞌ xeꞌ bꞌixir xeꞌ machi tuaꞌ acꞌapa, che e Jesús.

¹¹Y che e ixic: —¿Pero tucꞌa tamar tuaꞌ alocse e jaꞌ? Porque matucꞌa nien inteꞌ aruch xeꞌ qꞌuecher amen tuaꞌ alocse jaꞌ tamar, y intam e nuxi chꞌen era. ¿Y tiaꞌ tuaꞌ atajwi e jaꞌ awajqꞌuen xeꞌ bꞌixir?

¹²¿Más ca anata net que catata viejobꞌir Jacob? Porque jax jaxir xeꞌ upasi e chꞌen era tuaꞌ utajwi e jaꞌ y tiaꞌ cay uyuchꞌi jaxir taca umaxtac y taca tunor uyarac ubꞌan, che e ixic.

¹³Y che e Jesús: —Tunor tin e uyuchꞌi e jaꞌ era axinto asutpa ataqui utiꞌ otronyajr.

¹⁴Pero tin e axin uyuchꞌi e jaꞌ xeꞌ cꞌani inwajcꞌu nen machi tuaꞌ asutpa ataqui utiꞌ otronyajr. Porque e jaꞌ xeꞌ tuaꞌ inwajcꞌu nen aquetpa tama uyalma inteꞌ bꞌan cocha inteꞌ jaꞌ xeꞌ abꞌocbꞌa alocꞌoy macuir e rum xeꞌ tuaꞌ uyajcꞌu e cuxtar xeꞌ machi tuaꞌ acꞌapa, che e Jesús.

¹⁵Entonces ojron e ixic otronyajr y che: —Ajcꞌunen ixto e jaꞌ era tuaꞌ machi asutpa ataqui nitiꞌ otronyajr y tuaꞌ machi insutpa waten tuaꞌ inlocse e jaꞌ lo que ayan tama e chꞌen era, che e ixic.

¹⁶Y che e Jesús: —Quiqui pejcan aviejo y sutpen lar otronyajr, che e Jesús.

¹⁷Y che e ixic: —Pero matucꞌa niviejo, che e ixic. Y che e Jesús: —Erach lo que awaren era que matucꞌa aviejo.