Juan 3:25-32

²⁵Chui gbaite kwian geru jwannga Juan-Bautistage ulita kira batu kwian israelita gdaite ole kwian ñe chiske giti, kwian geru jwannga Juan-Bautistage gerudu Juan-Bautista giti Juan-Bautista kwian ñe chiske kwian chege ma trate, kwian israelita gerudu Jesu giti kwian geru jwannga Jesuge kwian ñe chiske kwian chege ma trate.

²⁶Kwian geru jwannga Juan-Bautistage ulita jo gerule Juan-Bautista ole: —Cha tkanga tangle geruge, cha gerule ba ole kwian gdaite giti kledu ba ole chi Jordánge tanglegu, ama giti ba gerudu no cha ole, ama ngwadi kwian ulita kle joge, ama kle kwian geru jwannga amage ulita gbe kwian ñe chiske, nege kwian ulita kle chage ama nate.

²⁷Juan-Bautista gerudu kwian geru jwannga amage ole: —Chube me kle kwian ole kwian me ñage age Chube kiralla giti.

²⁸Cha gerudu kwian ole ba gwa giti, ba ulita cha keruchugu gerule trate mau giti cha me Cristo, Chube cha kagu Cristo ngeru kwian ulita ta gbe ama gai ngwange no.

²⁹Nege ama chku, kwian kle chage ule ama ole, e giti nga chege suga no no chadi. E salengwli kwian onbre be mo jwen chuialla gbe, ama be skatemanalla gdaite gbe lle ulita gbe biale mo jwen chuiage alin. Mo jwen chuia chke gire onbre, muire kle ule, ulita kle no. E giti skatemanalladi nga be chege suga no no. Ene kaire nga suga no chadi Cristo chku kwian kle chage ule ama ole.

³⁰Cha takalin Cristo chege ma kweri chage kwian gwa giti, cha chege soli kwian gwa giti.

³¹Cristo chiu nga ngaña giti Chube kle ngwadi chku nga dba ai giti, ama kwian ulita mauña. Kwian nga dba ai giti nga dba aimu, ama gerule lle nga dba ai giti alin giti. Cristo chiu nga ngaña giti Chube kle ngwadi, ama kwian ulita mauña nga ulita mauña, ama geru nga ngaña giti alin trage kwian ole,

³²amage ulita uñale ama gwagedudi ama keruchugu nga ngaña giti Chube kle ngwadige, ama geru e alin trage kwian ole, kwian bedre alin ama kerua gai ulia ama kle gerule kare.