Juan 3:2-28

²xeꞌ ixin tuaꞌ uwarajse e Jesús acbꞌar porque war asubꞌajra. Entonces ojron jaxir y che: —Ajcanseyajet, war canata que net ebꞌetbꞌir tariet umen e Dios tuaꞌ acansion, porque mamajchi uyubꞌi uche e sian milagro lo que war ache net jay machi turu e Dios tacar, che e Nicodemo.

³Entonces ojron e Jesús y che: —Cꞌani inwaret que tin e machi asutpa acuxpa otronyajr machi uyubꞌi uwira uchinam e Dios, che e Jesús.

⁴Entonces e Nicodemo uyubꞌi tuaꞌ e Jesús y che: —¿Y cocha tuaꞌ asutpa acuxpa otronyajr inteꞌ xeꞌ winiquix uwirnar? ¿O ererto ca asutpa oꞌchoy inteꞌ macuir unac utuꞌ tuaꞌ asutpa acuxpa otronyajr? che e Nicodemo.

⁵Y che e Jesús: —Cꞌani inwaret que tunor tin e cꞌani oꞌchoy tama uchinam e Dios ucꞌani tuaꞌ acuxpa taca e jaꞌ tama uwerir y ucꞌani tuaꞌ acuxpa otronyajr taca Unawalir e Dios.

⁶Pues tin e acuxpa tara tor e rum aquetpa bꞌan cocha e gente tara tor e rum. Y tin e acuxpa tama Unawalir e Dios aquetpa taca e cuxtar xeꞌ tuaꞌ uqꞌueche axin inteꞌ tut e qꞌuin.

⁷Pero ira ibꞌacta que inwaret que ucꞌani tuaꞌ icuxpa otronyajr.

⁸Pues e icꞌar ajicna axin y ajicna watar y coybꞌi que war ajicna axin, pero machi cawira tiaꞌ watar y nien machi cawira tiaꞌ war axin. Y bꞌan ubꞌan tin e acuxpa tama Unawalir e Dios, machi cawira tucꞌa anumuy conda axin uchꞌami e cuxtar xeꞌ machi tuaꞌ acꞌapa, che e Jesús.

⁹Y che e Nicodemo: —Machi innata tucꞌa war awaren era, che e Nicodemo.

¹⁰Y che e Jesús: —Pues net nuxi ajcanseyajet tama e gente tuaꞌ e Israel y ¿tucꞌa tuaꞌ machi war anata tama tunor era?

¹¹Cꞌani inwaret era que war cawaret tamar taca lo que war canata porque war cachecsu toit jax taca lo que cay cawira, pero nox xeꞌ fariseox machi cꞌani ixcꞌupseyan tamar lo que war cawareox.

¹²Y jay machi cꞌani ixcꞌupseyan tamar lo que inwareox conda war incansiox tamar lo que ayan tara tor e rum ¿cocha tuaꞌ ixcꞌupseyan tamar lo que inwareox jay inxin incansiox tamar lo que ayan tut e qꞌuin tichan?

¹³’Mamajchi tꞌabꞌay ixin tut e qꞌuin sino que ajtaca nen xeꞌ jax Uyunenen e winic xeꞌ ecmay tarien tichan.

¹⁴Pues bꞌan cocha e Moisés utꞌabꞌse uturbꞌa tichan incojt chan tama e choquem lugar tama e onian tiempo, y bꞌan ixto tuaꞌ achena tamaren xeꞌ Uyunenen e winic que cꞌani intꞌabꞌesna inchꞌubꞌna tut inteꞌ teꞌ.

¹⁵Y tamar era tunor tin e axin acꞌupseyan tamaren cꞌani uchꞌamiobꞌ e cuxtar xeꞌ machi tuaꞌ acꞌapa, che e Jesús.

¹⁶Entonces che e Jesús: —E Dios meyra uyajta utobꞌ e gente tara tor e rum y umen era uyebꞌta tari Uyunen xeꞌ inteꞌ taca ayan tuaꞌ achamay tamarobꞌ, y tamar era tunor tin e acꞌotoy acꞌupseyanobꞌ tamar machi tuaꞌ asatpobꞌ sino que cꞌani uchꞌamiobꞌ e cuxtar xeꞌ machi tuaꞌ acꞌapa.

¹⁷Porque conda Catata Dios uyebꞌta tari Uyunen tara tor e rum, machi uyare Uyunen tuaꞌ utijres tin e turobꞌ tara tor e rum, sino que uyare tuaꞌ watar acorpesian.

¹⁸’Pues tin e war acꞌupseyan tama Uyunen e Dios machi tuaꞌ asatpa, pero tin e machi acꞌupseyan tamar satrem ixto, porque machi cꞌotoy cꞌupseyan tama Uyunen e Dios xeꞌ inteꞌ taca ayan.

¹⁹Y tamar era tunor tin e machi cꞌani acꞌupseyanobꞌ tamar aquetpobꞌ satrem inyajrer, porque conda uwirobꞌ e janchꞌaquenar xeꞌ jax Uyunen e Dios xeꞌ tari tara tor e rum, machi ucꞌaniobꞌ, sino que más war ucꞌaniobꞌ e incsibꞌaner porque mabꞌambꞌan tunor lo que war uchiobꞌ.

²⁰Tunor tin e war uchiobꞌ e mabꞌambꞌanir war uxejbꞌiobꞌ ut e janchꞌaquenar, y tamar era machi acꞌotoyobꞌ tut e janchꞌaquenar porque machi ucꞌaniobꞌ tuaꞌ achectesna que mabꞌambꞌan tunor lo que war uchiobꞌ.

²¹Pero tunor tin e war uchiobꞌ lo que erach acꞌotoy awawanobꞌ tiaꞌ janchꞌaquen tuaꞌ achectesna que war atacarnobꞌ umen e Dios tuaꞌ uchiobꞌ ajtaca lo que ucꞌani jaxir, che e Jesús.

²²Pues nacpat era ixin e Jesús taca uyajcanuarobꞌ esto tama e departamento Judea tiaꞌ cay chꞌuymobꞌ tama inteꞌ tiempo.

²³Y e Juan ubꞌan war achꞌuyma ya taca tuyejtzꞌer e chinam Enón xeꞌ majax innajt tut e chinam Salim porque ayan meyra e jaꞌ. Y war acꞌotoyobꞌ e gente iraj iraj tuaꞌ achꞌujyobꞌ umen e Juan.

²⁴Pues tunor era cay numuy conda ne mato ayajra e Juan tama e cárcel.

²⁵Entonces cay ojronobꞌ taca cora winicobꞌ xeꞌ tuobꞌ e Israel y taca uyajcanuarobꞌ e Juan y chenobꞌ: —¿Tucꞌa chꞌuymar xeꞌ más erach? chenobꞌ.

²⁶Entonces ixiobꞌ uyajcanuarobꞌ era tut e Juan y chenobꞌ: —Ajcanseyajet, e winic xeꞌ turet tacar conda turon teinxejr e xucur Jordán que awareon que jax e Cristo war achꞌuyma ubꞌan y tunor e gente war axin tupat, che uyajcanuarobꞌ e Juan era.

²⁷Pero e Juan che: —Matucꞌa tuaꞌ uchꞌami inteꞌ winic jay majax ajcꞌubꞌir umen e Dios.

²⁸Pues nox ajchecsuyajox que nen cay inware que majaxen e Cristo sino que ebꞌetbꞌir tarien tuaꞌ unstes e bꞌir tut jaxir.