Juan 2:7-20

⁷Tegin Jesús neg-ibed-e-mosmalga chogal: —Imi we mete-kwanerkwad pél pe taka-taka ti enzhemalo. Tegin neg-ibed-e-mosmal metegin pél ti enzhasmalzhun.

⁸Tegin Jesús neg-ibed-e-mosmalga chogalbal: —Imisgin pe iche wis weido, itoged-tummadzhe chedgal, we tummad itogal, igi itole-dewa. Tenal neg-ibed-e-mosmal Jesús-chogzhadyob pél immal imasmal.

⁹Tegin tule-itoged-tummad mosmal-kobed-chejad itosgu, pato itogal, vino. Tenal tule-itoged-tummad wichul pia vino tani. Tenal neg-ibed-mosmal-ti-wesmaladdin wismal, vino ti-akar tani. Tegin tule-itoged-tummad machi-ome-nikujadzhe kocha,

¹⁰tegin machiga chogal: —Imi meke-ibi-tule keg-chulgu vino-pul-nugu-kobleged-inzhel mimimal. Tegin tulemal pela-pela vino kobalmalal, kep vino istar-kobleged tulemalga mimilegalbal. Tenal pegadin teob kwen kuszhul. Tenal pedin imisgwadzhe pe pul vino-nued chabos.

¹¹Imi Jesús weob Caná-Galileagin kepe immal-taktijulid imas. Tenal Jesús aga oyosdo, ede kannaleged nika. Tegin e-chapingan kep Jesúsgin ibzhenonimalzhun.

¹²Tegin Jesús vinoga-ti-opinnijad-cholbal Jesús tegin e-nan, tegin e-urpamal, tegin e-chapingan Capernaumzhe nadmalzhun. Tegin Jesúsmal Capernaumgin ipókwajal wis ampagusmal.

¹³Imi Judiomalga-Pab-Najad-Itoged omodanikidgin, Jesús Jerusalén-neg-kweburzhe nad.

¹⁴Tegin Jesús Jerusalénzhe nonigu, ilagwen Pab-Tummadzhe-koled-negzhe nad. Tegin Jesús Pabzhe-koled-negzhe tognonigu, taknatap tulemal moli-peb-nikad, ovejamal tegin numal-ukpukmal. Tegin tulemal mesa-nabal pukwamalbal, tulemalga mani-pid Judio-mani-chunnadbak ogwananimalbal.

¹⁵Tegidgin Jesús tulemal-takchagu immal-ukpukmal, Jesús tub-kwilomakaled amis. Tegin Jesús tub-kwilomakaledgin Pabzhe-koled-neg-akar ovejamal, moli-peb-nikmalad-pukwad-onis. Tegin Jesús tulemal-mani-ogwananimalad-e-mani misbal, tegin e-mesa okpisbal.

¹⁶Tegin Jesús tule-nu-ukpukmaladga chogal: —¡Pe magadbal numal-onimalo! ¡Imi an pal kwen peichul, pemal immal-uked-negga an-Pabzhe-koled-neg imamalgal!

¹⁷Tegin Jesús-e-chapingan Jesús-chogzhad itosgu, kep itos-nadmal akpene Pab-kartagin nermakal mai: Imi an Peje-koled-neg nudagal an pela-pela arpanaidbal, an neg-owed.

¹⁸Tegin Judio-tummagan Jesúszhe ekichialmalzhun: —¿Imi pede ibi-tule-ade? ¿Pe igi anka oyogo, pe igal-nika weob immal-tulgan-onigal, tegin mani migalbal? Pe anmalga immal-taktijulid oyogenabgweldo, anmal wisgal pe Pab-Tummad-akar tani o chul-dewa.

¹⁹Tegin Jesús tule-tummaganga chogal: —Imi pemal iti-Pabzhe-koled-neg opelojal, antin ibapágin kannan iti-neg okwisbalo.

²⁰Tegin Judiomal Jesúsga chogalmal: —Pe melle anka yosgu chunmama. Imi iti-neg pirka-tulabo-kakanerkwa kales chobgal. ¿Tenal pe chog: “An ibapágin kannan chobneé?” Chulá, an pegin kwen ibzhejulá.