Juan 2:5-19

⁵Jadya tura aya ama buchatu ecuaquera quijimereti puji cuana acuare: —Ecue ebacuara cuejaya equedya nejucue.

⁶Anicuaretu tuhua shucuta sura tumu bucha pajie ea cuanaque. Aridatu sura cuana jucuare. Quimisacarucu tunca jadya ama juatsu cien litro tunajatu sura cuanaju ena isha bahue junenicuare. Israelita cuanajatu ena tuhua eishaque tsume bahue junenicuare emetucu cuana cutsati ishu, emaricaca cuana jadya, tunaja bahue utsa ishu.

⁷Tudyatu Jesúsra quijimeretiya cuanaque acuare: —Nejequeshabarecue jida ena tsehue tumeque sura cuana, —jadya tujatu ecana acuare. Jequeshacuaredya tunara. Jida cuachacuacha tuna sura cuana ena tsehue jequeshabarecuare.

⁸Amena tunara jequeshahua baatsu tuna Jesúsra acuare: —Iyacua netsehuacue riya piji. Nechibamereticue chine metseque. Tura jadya ahuaju, tunajatu riya piji tsehuacuare. Tsehuatsu tunajatu chibamereticuare chine metseque.

⁹Enatu cabapeticuare uva nacaca esasanashaque. Chine metseratu chibatsacuare. Tuquetu baecua jucuare eje bucha juhuaque, aira ena uva nacaca esasanashaque cabapetishahuaque. Quijimereti puji cuana camadya tuna bahue jucuare, tunaradya sura cuanaju ena jequeshabarehua tibu. Dyaque jida cuita baatsu tujatu huanequi juhuaque ihuaracuare.

¹⁰Amena huanequi juhuaque jutihuajutu chine metsera atsacuare: —Icuene cuita tuque ecuanaja eihuara cuanaque uva nacaca esasanashaque dyaque jidaque ijimere bahue. Tunara amena nime tupu ijihuaju tuque ecuana amena uva nacaca jida cuitaque ama ijimere bahue. Mira taa ecana jadya ama ahua. Chine terehuie jutidyami uva nacaca dyaque jidaque cuinanashahua, —jadya tujatu acuare.

¹¹Jesúsra jadya ahuaque baatsu, ecuana tura mepehua cuanara tuque ecuana ejenecuare tuja Yusuja casa aniyaque. Caná Galilea yahuajutu Jesúsra ena cabapetishacuare uva nacaca esasanashaque. Tuhua tujatu ametse acuare ni ejeque ecuitaja ataquique ama. Tuhuatu cabameretimetse jucuare tuque Yusuja casa tsehueque.

¹²Jadya juatsutu Jesús Capernaumju dirucuare. Ecuaque, tuatsehuequi cuana tsehue jadya tuna dirucuare. Ecuana tumebaedya dirucuare tuna tsehue. Tuhua ecuana anidirucuare eje uma huecaca cuana.

¹³Pascua chine bacanitu piji dyane cuita jucuare, ecuanaja baba cuana Yusura Egipto juque cuinanashacuareque adeba ishuque. Jadya tibudyatu Jesús cuacuare Jerusalénju. Ecuanaratu tajiajecuare.

¹⁴Tuhua junatitsutu Jesús cuacuare Yusuja etareju. Nubinatitsu tujatu ecana banaticuare jetiama Yusu tyaishu juye, uhuisha, huei jadya catyati juya cuanaque. Tumebaedyatu bacuare chipiru cuare juya cuanaque. Tume cuanaratu peya epu cuana juque chipiru cuarecuare. Yusu mui ishuju, jadya jutaquiju ama tuna jadya jucuare.

¹⁵Jadya baatsutu Jesús tuna tsehue cahuaiticuare. Cahuaititsutu capicaticuare huacabiti. Huacabiti tsehue tujatu ecana pana ijehuecuinatilla acuare tuhua Yusuja etareju catyati juya cuanaque. Tumebaedyatu juye, uhuisha cuana catyati juya cuanaque ijehuecuinacuare. Dacashatillacuare tujatu chipiru amena cuarehua cuanaque. Tipacatillacuaretu mesa cuana.

¹⁶Jadya tujatu acuare huei catyati puji cuana: —Nedujutillacue micuanaja dutya ai rehua aniya cuanaque. Riyaque etare ri ecue Etata mui ishuque. Mercado ama riya. Catyati, bacabaca jadya ishuque ama riya, —jadya tujatu ecana acuare.

¹⁷Jadya juya bacatsu, ecuana tura mepehua cuanara tuque ecuana adebacuare Yusuja quisarati jadya ehueneque: “Yusu, micue etare tuque dyaque muibaya. Ejequeja buchique tuque bijidamaduramerecarama aya” jadya.

¹⁸Jadya Jesúsra ahuaque baatsutu israelita cuanaja huaraji tuhua jucuare cuanara Jesús acuare: —¿Airami casa tyahua Yusuja etare juque ijehuecuinatilla ishu? Acue Yusuja casa bamere ishu yuneridya tura mique jadya aishu cuatsashahuaque ecuana ejenemere ishu, —jadya tunajatu Jesús acuare.

¹⁹Jesúsra tuna quemitsacuare: —Arepa micuanara Yusuja etare rihuishaya ama bucha, eratu quimisha huecacaju nityatsuradadinucaya, —jadya tuna Jesúsra acuare.