JUAN 2:4-20

⁴Wke Jesus, re Jesus: ―Wnaae, ¿penak na de zegwa lo noo? Gardet ydxiin or ne ylaa noo ne ryal ylaa noo.

⁵Per re xnaa Jesus lo yra men ne rlaa dxiin nga: ―Gulaa yra ne yna Jesus lo de.

⁶Nga zu xuup gyus gye ne rdaa nis ne raa nya yra men-Israel no ne raa nii men, zegnak xkoxtumber men. Te te gyus guin rdaa we zeg tebgwyuu liter nis.

⁷Lex re Jesus lo men ne rlaa dxiin nga: ―Gusezaa nis yra gyusree. Orguin wsezadoo meno.

⁸Zhich guin re Jesus lo men: ―Orrenaa gukoo we tebruu we, gutsadee we lo mén ne zudíp lo dooy. Lex wano meno.

⁹Chene le mén guin ne zudíp lo dooy wzeeno, le we che wak bin, no ni nandet men pa wzaa we. Nonchee men ne rlaa dxiin nga nano, porke laa men waxii nis. Orguin wbëz mén guin ne zudíp lo dooy men ne kayak xdooy,

¹⁰lex re men lo men: ―Yrandxee mén, primer rgyiiz men bin ne mazre wendee; chene che kesentyent woo mén bin ne mazre wendee, lex rgyiiz men bin ne nguudxdee. Per le laa de wgutsoow de bin ne mazre wendee, axtegue orree wboo do.

¹¹Laa primer gyelmilaguer ne wlaa Jesus nee, gyëz-Caná ne nak lo lyu ne la Galilea wlaa No. Zenga wbonyoo Ne xgyelenzoon Ne, ne le yra xpén Ne wlaleedxre Ne.

¹²Wluzh wak neree, za Ne Capernaum yra Ne bech Ne, no le yra xpén Ne, no le xnaa Ne. Nga wkaa Ne yra Ne men txup tson gbiz.

¹³Chene che wyob pask lni ne rlaa men-Israel, za Jesus Jerusalén.

¹⁴Wdxiin Ne ruxeydoo Dëdyuzh, le yra mén ne katoo yuz, mén ne katoo mëkzhiil, mén ne katoo mëër, ndxin nga rtoo yra maa guin, no zob ke mén ne rtsaa medzit.

¹⁵Ne wii Ne ne ndxin yra mén guin nga, wzhexkwaa Ne tebla duu, lex kon duu guin wboo Ne men nga yra men xyuz men no le xpëkzhiil men, no wtxëëts Ne yrandxee xmed mén ne rtsaa medzit, no wnekantaa Ne yra xmezh men,

¹⁶le lo yra mén ne rtoo mëër re Ne: ―¡Gukoo neree nee! ¡Ylaadet de xyuu Xuz noo zegnak lgyeey!

¹⁷Orguin wnileedx yra xpén Jesus ne ka lo xgyiich Dëdyuzh ledne re: “Tant rlaan noo ganchi noo xyuu de, rlayaa noo ne rzaknondet méno.”

¹⁸Lex re men-Israel lo Ne: ―Gulaa te gyelmilaguer kwii noo chen gyen ne rap de derech ne rlaa de neree.

¹⁹Wke Ne re Ne: ―Gulitla ydooree, tsonegue gbiz ylep ke noo we ste.

²⁰Lex re men: ―Txuplalno-xuup iz wkalep mén ydooree. ¿Le laa de naa ne ylepo tsonegue gbiz?