Juan 2:1-22

¹Te iketelo te aldaw, doen peipid kidoen te Kana sakop te probinsya te Galiliya. Timanod se inay i Jesus te peipid.

²Dimoton heman si Jesus aw menge tinoledaan din, so impeangay dan.

³Pegkeamin te bino, minikagi se inay i Jesus diyà kandin, “Neamin den se bino.”

⁴Minikagi si Jesus, “Inà, ikà egpunù kanak, so wedà pa dateng se oras aw ipekità ko se tolos ko.”

⁵Minikagi se inay din diyà te menge sineligan, “Pengkey eden se ipunù din kenyo, tolò kaw.”

⁶Kidoen se enem dedakel sibolan egsolan te wayeg ipeglinis dan, so yan se ketanem te menge Judiyo. Menge lima lata se awop te teg sebad-sebad kenyan.

⁷Minikagi si Jesus diyà te menge sineligan, “Ipenoi niyo te wayeg se sibolan.” Yan inipenò dan se enem sibolan taman te sìsì.

⁸Penga niyan, minikagi heman si Jesus, “Segadi niyo aw ibingi niyo doton te pengolo niyo.” Yan inibing dan iyan diyà kandin.

⁹Timimtim se pengolo te wayeg ininang bino. Wedà din ketegahi aw kenan lekat se bino, meneng netaga-taga se menge sineligan so simalok dan te wayeg. Pegtimtim din kenyan, tinawal din se meama, sìyan impeipid,

¹⁰aw minikagi, “Tepad te ketanem tadon, se onà ipeinem, yan se bino ontò mèpiya nanam. Meneng penga te peg-inem te otaw te dakel bino, yan ipeinem dan te bino kenà ontò mèpiya. Yan nepela a, so sebad se pegpeinem no seini, so tinemengan nikaw kedì se ontò mèpiya bino lamig seini.”

¹¹Peg-inang i Jesus kenyan kidoen te Kana sakop te probinsya te Galiliya, yan se tagnà kepelahan ininang din amon ipekità din te doen kelangkaw din. Nemenal se menge tinoledaan din kandin.

¹²Penga te peipid, dimoton si Jesus te Kapirnaom tinekingan te inay din, aw menge kedowa din, aw menge tinoledaan din. Mig-ogpà dan kidoen te wedà kenamay.

¹³Agpet den domateng se aldaw te Pista te Pegpelowà, aw yan dimoton si Jesus te Jerusalem.

¹⁴Pegdateng din doton, doen menge otaw kinità din kidoen te dowangen te dakel simbahan te Judiyo, menge otaw egpemeligyà te menge baka sonogen aw ibegay diyà te Timanem, aw karniro, aw selepati. Doen heman menge otaw kinità din nenenoo kidoen egliwan te kwarta.

¹⁵Pegkità din kenyan, ininang din se olisi lobid, aw impekadas din se kedita dan sipat menge karniro aw baka lekat te dowangen te dakel simbahan. Impelias din se menge lemisa dan, aw in-olà din heman se kwarta te menge otaw egliwan.

¹⁶Minikagi heman diyà te menge otaw egpemeligyà te selepati, “Ibingi niyo iyan lekat dini. Ikà niyo eg-inang pedyanan te balay te Amay ko Timanem.”

¹⁷Pegkità te menge tinoledaan din te ininang din, neeneng-enengan dan se kagi insolat kidoen te kagi te Timanem gebii, “E Timanem, ontò meinit se pedowan ko, so ontò meelagà se balay no diyà kanak.”

¹⁸Penga niyan, mig-insà se menge obanen te Judiyo, “Doen lay pengilala ipekità no kenami amon ketegahan day te insogò ka meg-inang kenyan?”

¹⁹Timaba si Jesus, “Aw pegbàtan niyo se balay seini eg-ogpaan te Timanem, penga niyan todà ko iyan ipetindeg dalem te telo se aldaw.”

²⁰Minikagi dan, “Kepatan teg enem se omay te peg-inang te balay te Timanem seini. Eked no iyan petindegi dalem te telo se aldaw.”

²¹Meneng wedà dan ketegahi te lawa din se balay sìyan inikagi din.

²²Meneng penga te pegkeantay i Jesus lekat te nematay, neeneng-enengan te tinoledaan din se inikagi din sìyan, aw nemenal dan te netoman se kagi te Timanem tapay insolat te meantay sikandin lekat te nematay, aw benal heman se inikagi i Jesus.