Juan 21:7-17

⁷Zee nzhé na, xaa tant nkela xaa, lo Pér: —¡Xaa Nabeyy beya! Gorna mbin Simón Pér, Xaa Nabeyy beya, ngok xaa xab xaa (nel mkiib xaa xab xaa zee kee xaa zhiin), nu mzeeb xaa leen nistoo.

⁸Lee stub naz re nu nyaad leen kano, kwaan yeez nyazhe mbal, nel nzo re nu kan tub gayoo metr roo nistoo.

⁹Nu mzhin nu roo nistoo nze tub bal, nu kayeex mbal loya, noka mlu pan lo nu,

¹⁰Jesús né lo re nu: —Teno gu lak mbal, ma nguga lo gu nal.

¹¹Simón Pér nguxoob leen kano nu mdobxex xaa yeez nyazhe kwaan re mbal naro axta roo nistoo; nu leen yeez nzho tub gayoo choobchiibchon mbal, nu nixa zyen doo ma nu namrazt yeez.

¹²Jesús né lo nu: —Te gawren gu. Nu rese nu mzheb ngnabdizh lo xaa: “¿Cho nak lu?”, nel ne nu lee xaa nak Xaa Nabeyy.

¹³Zee lee Jesús mbii gax nu mzen pan nu mdiiz xaaya lo nu, nu sneeka mle xaa kwaan mbal.

¹⁴Kwaane ngok yonn welt mlu Jesús lo nu, gorna ngulo mroban xaa.

¹⁵Gorna ngulo ndawren re nu, Jesús mnabdizh lo Simón Pér: —Simón, xgann Juan, ¿che nkela lu na mas ke re xaa ne? Pér mkeb nzhé: —Aja, Xaa Nabeyy, lu ne xmig be. Jesús nzhé: —Bkanap re xmbakxiil na.

¹⁶Mbare xaa mnabdizh xaa stub welt, nzhé xaa: —Simón, xgann Juan, ¿che nkela lu na? Pér mkeb nzhé: —Aja, Xaa Nabeyy, lu ne xmig be. Jesús nzhé: —Bkano re xmbakxiilta.

¹⁷Ngok yonn welt mnabdizh xaa lo xaa nu nzhé xaa: —Simón, xgann Juan, ¿che xmig be? —Lee Pér nales doo ngok lextoo nel mnabdizh xaa lo xaa chon welt che nkela xaa xaa, nu lee xaa mkeb nzhé: —Xaa Nabeyy, lu ne rese kwaan, lu ne xmig be. Jesús nzhé: —Bkanap re xmbakxiilta.