Juan 21:5-20

⁵Entonces e Jesús che cocha era: —Apaxtac, ¿cormoxix ca? che e Jesús. Y jaxirobꞌ chenobꞌ: —Mato tucꞌa cachuqui, che e ajcanuarobꞌ era.

⁶Entonces e Jesús che: —Tobꞌsenic ichijr chic teinxejr tama inojcꞌabꞌ y yajaꞌ tuaꞌ ixcorma, che e Jesús. Y bꞌan uchiobꞌ y bꞌutcꞌa uchijrobꞌ taca e sian chay este que machi uyubꞌiobꞌ uchꞌuyobꞌ alocꞌoy macuir e jaꞌ.

⁷Entonces e ajcanuar xeꞌ chojresbꞌir ut meyra umen e Jesús uyare e Pedro y che: —Jax Cawinquirar. Entonces e Pedro xeꞌ war apatna pispis tacar taca uchanex ulapi ubꞌujc wacchetaca y tobꞌoy ixin tama e jaꞌ y cay nujxi tuaꞌ acꞌotoy tama utiꞌ e jaꞌ.

⁸Pero e inmojr ajcanuarobꞌ era quetpobꞌ macuir e barco y cay uquerejbꞌobꞌ e chijr xeꞌ bꞌutcꞌa taca e sian chay esto cꞌotoyobꞌ tutiꞌ e jaꞌ, porque majax innajt e barco tutiꞌ e jaꞌ; quetpobꞌ cocha cuarenta y ocho brazada.

⁹Y conda cꞌotoy, locꞌoyobꞌ tor e rum y utajwiobꞌ inteꞌ cꞌajc xeꞌ xumbꞌir tor e rum taca e siꞌ, y yajaꞌ chꞌar incojt chay tor e cꞌajc. Y ayan e pan ubꞌan.

¹⁰Y che e Jesús: —Qui taresic cora chay tama e chijr xeꞌ wartocto ichuqui, che e Jesús.

¹¹Entonces e Simón Pedro ochoy tama e barco y cay uquerejbꞌa e chijr esto tiaꞌ taquin e rum. Y ayan meyra sian chay tama e chijr era, esto 153. Y motor que ayan meyra sian chay pero machi wejrtzꞌa e chijr.

¹²Entonces ojron e Jesús y che: —Laric ixto wenic yaꞌ, che e Jesús. Y ma inteꞌ uyajcanuar cay uyubꞌiobꞌ tuaꞌ que: ¿Chiet net? porque tunorobꞌ war unatobꞌ que jax Cawinquirar.

¹³Entonces e Jesús ixin tuyejtzꞌer e cꞌajc y uchꞌami e pan y cay uxere taca inteꞌ intiobꞌ. Y bꞌan uche taca e chay ubꞌan.

¹⁴Pues jax era e uxyajr que e Jesús uwirse ubꞌa tut uyajcanuarobꞌ conda cꞌapa sutpa bꞌixcꞌa tujam e chamenobꞌ.

¹⁵Pues entonces conda cꞌapa wiobꞌ e Jesús cay uyubꞌi tuaꞌ Pedro xeꞌ ucꞌabꞌa Simón ubꞌan y che: —Net acꞌabꞌa Simón xeꞌ uyunenet e Jonás. ¿Acꞌanien ca más que e inmojr era? che e Jesús. Y ojron e Pedro y che: —Niwinquiraret, inyajta ixto oit yaꞌ. Net anata que intzay inwiret, che e Pedro. Y che e Jesús: —Quiqui cojcsanen tama tunor tin e wartocto acay acꞌupseyanobꞌ tamaren bꞌan cocha inteꞌ ajcojc oveja xeꞌ axin ucojco tunor e chuchu oveja, che e Jesús.

¹⁶Y nacpat era e Jesús uyubꞌi tuaꞌ e Pedro otronyajr y che: —Net acꞌabꞌa Simón xeꞌ uyunenet e Jonás. ¿Acꞌanien ca? che e Jesús. Y e Pedro che: —Niwinquiraret, inyajta ixto oit yaꞌ. Net anata que intzay inwiret, che e Pedro. Y che e Jesús: —Quiqui cojcsanen tama tunor tin e acꞌupseyanobꞌ tamaren bꞌan cocha inteꞌ ajcojc oveja xeꞌ axin ucojco tunor e oveja, che e Jesús.

¹⁷Entonces e Jesús sutpa uyubꞌi tuaꞌ e Pedro uxyajr y che: —Net acꞌabꞌa Simón xeꞌ uyunenet e Jonás. ¿Erachet ca que war ayajta niut? che e Jesús. Y e Pedro quetpa tzajtaca ut umen que uxyajr war ubꞌna tuaꞌ jay uyajta ut e Jesús. Y che e Pedro: —Niwinquiraret, net anata tunor, y net anata que inyajta oit, che e Pedro. Y che e Jesús: —Quiqui cojcsanen tama tunor tin acꞌupseyanobꞌ tamaren bꞌan cocha inteꞌ ajcojc oveja xeꞌ axin ucojco tunor e oveja.

¹⁸Cꞌani inwaret era que conda maxtaquetto ani alapi abꞌujc cocha acꞌani tuaꞌ iꞌxin tiaꞌ acꞌani net, pero conda iꞌxin iquetpa nojta gente cꞌani atuttzꞌi ut acꞌabꞌ tuaꞌ ibꞌujcsena umen otronteꞌ y ucꞌani tuaꞌ iqꞌuejcha iꞌxin tiaꞌ machi ani acꞌani net, che e Jesús.

¹⁹Pues tamar uyojroner era e Jesús uchecsu tut e Pedro cocha quetpa tuaꞌ achamesna tuaꞌ atajttzꞌa ucꞌabꞌa e Dios tamar. Entonces ojron e Jesús otronyajr y che: —Incoꞌ tanipat, che e Jesús.

²⁰Entonces e Pedro sutpa uwira que war axana tupat e ajcanuar xeꞌ chojresbꞌir ut meyra umen e Jesús. Pues e ajcanuar era jax xeꞌ cay weꞌ tuyejtzꞌer e Jesús conda merato achamesna y xeꞌ cay uyubꞌi tuaꞌ que: “¿Chi umen tuaꞌ atujchꞌa?”