Juan 21:2-19

²Jesús pijimonae tatsi nacaetuta. Barapo matabʉxʉyobe meje: Simón Pedro, irʉ Tomás pon icha wʉn Gemelo, irʉ Natanael Caná tomarapin, po tomara eca Galilea nacuatha, irʉ xan, Juan, irʉ taeweicho xua Zebedeo pexantobe tatsi panbe, irʉ ichʉnberʉ. Daxita barapo matabʉxʉyobe pan panacaetutan Tiberias pucua itapatha.

³Simón Pedro pana jei: —Tha duwei yamonaetsi, jei. Paxan pajanje: —Paxan irʉ paca puna ponaeinchi, pajan. Bapoxonae jeratha daxita panonobabiyan. Ichitha barapo merawitha jopa duwei pataeinyo, bequein payamonan.

⁴Poxonae baya pentha tsina, Jesús pana tsita naitʉta pitapathiya, tuwʉtha payana dubendenan. Ichitha paxan jopa payaitaeinyo xua bapon apara Jesús.

⁵Nexata Jesús pana nebarai: —Incane, ¿jopa pataem duwei? jei Jesús. —Jume, duwei aibi, pajan.

⁶Nexata Jesús pana barai, jeye: —Jera coxa beya bara bepaxoyama peyacamonaewa. Bapoxonae pacapirenaename duwei, jei Jesús. Baxua paexanan. Pirapae jopa pana itacʉpaeyo xua patajutaxorenaewa peyacamonaewa, poxoru pin duwei tunto pacapirenan.

⁷Nexata xan, Juan, ponxaein bichocono Jesús neantobe, Simón Pedro baran, janje: —Apara bapon Jesús, pon Wanacanamataxeinaein, jan. Poxonae Simón Pedro nejume taeba, bapoxonae paparuwa xua nama xuenabota nainya yacuinaya nama xatataba. Bapoxonae mene weitata jopiya.

⁸Ichitha paxan pomonae jopa paraichinyo jeratha pajebounan. Barapo jera be conotha tajʉ tuwʉtha berucuarena saya cien metrobe xeina. Bewayo pajeboundenan tsipei peyacamonaewa mentha yawa ducuapona pin duwei tunto.

⁹Poxonae jera wepanonobabiyan, bapoxonae isoto patan xua barapo isototha duwein yʉtaboya yawano xua pan boquiya.

¹⁰Jesús pana barai, jeye: —Painta xawena duwei xuaunxuae pacaebouname, pana jei.

¹¹Simón Pedro jeratha nontabiya. Yawa taetabo itapa bejutabotsina peyamonaewa xua bichocono wʉnca duwei. Ciento cincuenta y tres po duwei matabʉxʉmonaebe. Bequein duwei bichocono wʉnca daichitha jopa ucupanayiyo peyacamonaewa.

¹²Nexata Jesús pana barai, jeye: —Antha matha paxaema, pana jei. Paxan jiwana dapon aibi pon peyainyabinexa, pon pejeinexa: “¿Jintam xamda?” pon jei, tsipei daxita paxan payaitan xua bapon apara pon Patatanecanamataxeinaein.

¹³Bapoxonae Jesús isoto bepoinya pepichinexa pan. Bapoxonae pana necatsiba yawa duwei pana necatsiba.

¹⁴Baxua exana poxonae nama acoibi po cuiyobe xua Jesús pana netsita naitʉta xua poxonae equeicha asʉ popona petʉpae cuiru coyene weya.

¹⁵Poxonae pana nain wetan xua Jesús pana apata, bapoxonae Simón Pedro, Jesús yainyaba, jeye: —Simón, pon Juan pexantom, ¿bichocono neantobem, beyacaincha xua po pebiwe neantobe? jei. —Aa, Tanecanamataxeinaem, bara caena bayatha neyaputaneme xua tacaantobewatsi bichocono, jei Pedro. Jesús barai, jei: —Icha neantobem, inta tamonae tana nejume cowʉntsiwi yawende, icha pon ovejaxi pe-eenaein ichi xua yawena ovejaxi, jei Jesús.

¹⁶Equeicha Jesús barai Pedrotha, jeye: —Simón, pon Juan pexantom, ¿bichocono neantobem? jei. —Aa, Tanecanamataxeinaem, bara caena bayatha neyaputaneme xua bichocono tacaantobewatsi, jei Pedro. Jesús jume nota, jeye: —Icha neantobem, inta tamonae tana nejume cowʉntsiwi yawende, icha pon ovejamonae pe-eenaein ichi xua yawena ovejamonae, jei Jesús.

¹⁷Equeicha acoibi po jume cuiyobe Jesús barai Pedrotha, jeye: —Simón, pon Juan pexantom, ¿bichocono neantobem? jei. Pedro jʉntʉ coyene wecoyei yaitama Jesús yainyaba acoibi po jume cuiyobetha. Pedro jeye Jesustha: —Tanecanamataxeinaem, bayatha caena daxita yaputaibame. Mataʉtano yaputanemeno xua tacaantobewatsi, jei Pedro. Jesús jume nota, jeye: —Icha neantobem, inta tamonae pomonae tana nejume cowʉntsiwi yawende, icha pon ovejamonae pe-eenaein ichi xua yawena ovejamonae.

¹⁸Xaniyan catsipaebatsi poxonae matha cataunxuae pewowim jinya paparuwa bara jincoutha namaxatabeibame. Mataʉtano matha bara poneibame xua ichaxota ba ichichipa neponaewa. Ichitha poxonae perum tsane, ichamonae camaxʉ cʉbiya yotsina. Ichʉn paparuwa cama xatatsina. Ichamonae camaxʉ caponaena ichaxota jopa ichipaem xua neponaewa, jei Jesús.

¹⁹Poxonae Jesús baxua paeba Pedro wʉnae tsiwanaya cui yaputane exainchi xua jiwi eta bichi tsane poxonae Pedro bexubinchi. Mataʉtano Jesús tsiwanaya cui yaputane exana xua jiwi Nacom wʉnae jainchinchi xua poxonae jiwi taena xua po coyene cuirutha xua poxonae Pedro tʉpaena peexanaexae pocotsiwa Nacom itoroba. Bapoxonae Jesús jeye Pedrotha: —¡Bara ataya yacuiya poponare xua tamonae jitom! jei Jesús.