Juan 21:15-21

¹⁵Iono l̈ok pjir ga Jesús tjl̈ẽ Simón Pedro kong ga «Simón, Juan wa, ¿tja woydaga ara l̈i ë? ¿E pjare?» «Ëng, Tjl̈apga. Miydëp ga pja woydër» l̈e ba kong. Kuya ga tjl̈ẽ ba kong ga «Eni ga bor tjl̈õkwo kjragaga dëp yõtso, öng wl̈ẽp ushko so de ba dagarë sorë ga eni» l̈e.

¹⁶Eshko ga Jesús tjl̈ẽ ba kong obi ga «Simón, Juan wa, ¿tja woydëp ara jl̈õkoyore?» «Ëng, Tjl̈apga. Miydëp ga pja woydër» l̈e ba kong. Kuya ga tjl̈ẽ ba kong ga «Eni ga bor tjl̈õkwo kjragaga dëp, öng wl̈ẽp ushko so de ba dagarë sorë ga eni» l̈e.

¹⁷Era eni ga Jesús tjl̈ẽno ba kong obi, öötong pjl̈ogl̈o mya. Tjl̈ẽ ga «Simón, Juan wa, ¿tja woydëp jl̈õkoyore?» l̈e. Kuya ga woydë ara, kjakrokara ba kong pjl̈ogl̈o mya kjĩshko. Eni ga tjl̈ẽ ba kong ga «Tjl̈apga, l̇l̇ëbo tjeng kës l̈i miydëp shäng pjl̈úe. Miydëp ga pja woydër» l̈e. Kuya ga tjl̈ẽ ba kong ga «Eni ga bor tjl̈õkwo kjragaga dëp, öng wl̈ẽp ushko so de ba dagarë sorë ga eni.

¹⁸L̈ër bop kong jl̈õkoyo ga dënashko ga pja mite obishko ga pja opdoyë tjoksa, pja jek äär woydëp kjone l̈ishko. Gueniyo l̇l̇ono ga pja öötong këguë ga pja orkwo ië ber l̈ok bek, pja doyëba wl̈o, ga pja sökoba jek äär woydëp kjone l̇l̇ëm l̈ishko» l̈e.

¹⁹L̈ara eni l̈i, e Pedro wol̈on sorë l̈i l̈okl̈o, ga Sbö ber kësbang, tjwl̈õ ara e kjĩshko. Eshko ga Jesús tjl̈ẽ ba kong ga «Tja rayëp l̇l̇ëme. Tja opshäryono sorë ga pja opshäryë eni bakoe» l̈e.

²⁰Eshko ga Pedro bojono iröng, ga ĩya ga Jesús oppingga woyde Jesúsdë ara ba kjl̈ara wl̈eni l̈i tek shäng ba irgo. (Dënashko ga l̈öng iëshko ga «Tjl̈apga, ¿pja soynega l̈i ë?» l̈aga Jesús kong ba kwomsoshko l̈i e.)

²¹Ĩya Pedrorë ga tjl̈ẽ Jesús kong ga «Tjl̈apga, ¿e ga kjwe, l̇l̇ëye shäryëba ba tjok?»