Juan 21:10-21

¹⁰Inchen Jesúsbe trenchibig køn: —Mamdø tru ñim møi wesruim peskaumeran srua amrruy— cha.

¹¹Inchen Simón Pedrobe barcoyu nebya, atarrayan nørrø peskaumeratø ciento cincuenta y tres netsiig tøgaigwan pi mendagatig keetab srua ibig køn. Inchen maya nu kuingucha, atarrayabe kølsrømíig køn.

¹²Inchene Jesúsbe nømun trenchibig køn: —Manrrab amrruy— cha. Inchen møikkucha kusrenanøb pera uniiløbe: “¿Ñibe mu kugu?” cha payamig kørig kui inchibelø køn, kaguende nømbe Señor kui asha kua.

¹³Inchene Jesúsbe kemalla, pirriwan nui tasku srua pasramisrabe, nømun srørrøbig køn, katø peskauwan chigucha.

¹⁴Iibabe chabguen pønmay købig køn, Jesús kwailai utugurri katøle øsiirawa kurra, nui kusrenanøb pera uniilan nø kui ashchai kenamisrig.

¹⁵Yandø chab mabe, Jesúsbe Simón Pedron payibig køn: —Simón, Juanwei nusrkai, ¿iilø lataguen kømø, nan mas undaguig kuguh?— cha. Inchen Pedrobe trenchibig køn: —Øø, Señor, nabe ñun undaguig kui ñibe ashibig køn— cha. Inchene Jesúsbe trenchibig køn: —Nai ubisha-ureemeran mannøb ashib tøgagørrunrrig— cha.

¹⁶Katøle Jesúsbe payibig køn: —Simón, Juanwei nusrkai, ¿nan undaguig kuguh?— cha. Inchen Pedrobe trenchibig køn: —Øø, Señor, nabe ñun undaguig kui ñibe ashibig køn— cha. Inchene Jesúsbe trenchibig køn: —Trube, nai ubishameran tab ashib tøgagørrunrrig— cha.

¹⁷Pønmay kønrrabyu katøle payibig køn: —Simón, Juanwei nusrkai, ¿nan undaguig kuguh?— cha. Inchen Pedrobe kullaarab isui inchibig køn, kaguende chabguen pønmayguen: “¿Nan undaguig kuguh?” chib payen. Inchen nøbe trenchibig køn: —Señor, ñibe chiwandøgucha kerrigu ashibig køn cha. Nabe ñun undaguig kui ñibe ashibig køn— cha. Inchene Jesúsbe trenchibig køn: —Nai ubishameran mannøb ashib tøgagørrunrrig cha.

¹⁸Nabe ñun isa kømø, cierton trendamønrrun cha: Ñibe matsinøtiig køb urasbe, ñui pørønaigwan ñiasiitø pørønawa, ñun chuikkøben ibig kuig køn cha. Inchendø yandø ñi køllig misrene, ñui kwalmeran ñi larrøbichen, katøgan mendaig ñune pørønana, ñi ig kømui indiisrømay srua inrrun— cha.

¹⁹Øyan chippe, Pedro nø mandø kwamig nebuben, treeg kwaitøga Tiuswan maya nuguen tabig indig kønrrai martrab køn cha, trendaig køn Jesúsbe. Inchabe Pedrone trenchibig køn: —Nai mendig amø— cha.

²⁰Inchen Pedrobe keesha ashene, Jesús tru kusrenanøb pera unig undaaraibe nui wendau arri ashibig køn. (Truibe tru mab purrab uras Jesúswan pechoyu ne tsumisra: “Señor, ¿ñun ashig kømui inchibelan trannrrabiibe mu køh?” cha, payibig, truig købig køn.)

²¹Inchen Pedrobe truigwan ashabe, Jesúswan payibig køn: —Señor ¿inchen øigwane ñibe mandø inchainchigu?— cha.