Juan 21:1-8

¹Pues entonces nacpat era e Jesús uchectes ubꞌa otronyajr tut cora uyajcanuarobꞌ tama utiꞌ e nuxi jaꞌ xeꞌ ucꞌabꞌa Tiberias. Y lo que numuy jax era:

²Ya turu e Pedro taca e Tomás xeꞌ arobꞌna Cuach. Y turu ubꞌan e Natanael xeꞌ tari tama e chinam Caná tama e departamento Galilea. Y turobꞌ ubꞌan chateꞌ uyunenobꞌ e Zebedeo taca otro chateꞌ uyajcanuarobꞌ e Jesús.

³Entonces ojron e Pedro y che: —Nen cꞌani inxin ta chucchay era, che e Pedro. Y e inmojr che: —Caxin ubꞌan tacaret, che e inmojr era. Entonces ochoyobꞌ tama inteꞌ barco y xanobꞌ cora tor e jaꞌ y cay upojchiobꞌ uchijrobꞌ macuir e jaꞌ. Pero tama e acbꞌar era matucꞌa cꞌaxi tama uchijrobꞌ.

⁴Entonces conda cay sacojpa uwirobꞌ que ayan inteꞌ winic war tama utiꞌ e jaꞌ, pero machi unatobꞌ jay jax e Jesús era.

⁵Entonces e Jesús che cocha era: —Apaxtac, ¿cormoxix ca? che e Jesús. Y jaxirobꞌ chenobꞌ: —Mato tucꞌa cachuqui, che e ajcanuarobꞌ era.

⁶Entonces e Jesús che: —Tobꞌsenic ichijr chic teinxejr tama inojcꞌabꞌ y yajaꞌ tuaꞌ ixcorma, che e Jesús. Y bꞌan uchiobꞌ y bꞌutcꞌa uchijrobꞌ taca e sian chay este que machi uyubꞌiobꞌ uchꞌuyobꞌ alocꞌoy macuir e jaꞌ.

⁷Entonces e ajcanuar xeꞌ chojresbꞌir ut meyra umen e Jesús uyare e Pedro y che: —Jax Cawinquirar. Entonces e Pedro xeꞌ war apatna pispis tacar taca uchanex ulapi ubꞌujc wacchetaca y tobꞌoy ixin tama e jaꞌ y cay nujxi tuaꞌ acꞌotoy tama utiꞌ e jaꞌ.

⁸Pero e inmojr ajcanuarobꞌ era quetpobꞌ macuir e barco y cay uquerejbꞌobꞌ e chijr xeꞌ bꞌutcꞌa taca e sian chay esto cꞌotoyobꞌ tutiꞌ e jaꞌ, porque majax innajt e barco tutiꞌ e jaꞌ; quetpobꞌ cocha cuarenta y ocho brazada.