Juan 21:1-8

¹E irgo ga Jesús weno shäng ba oppinggaga kong obi, di bäng buk kësbang, shkung, so dl̈ung kjoyo ko Tiberias l̈i sor go. Shäryono eni.

²Eshko ga l̈öng Simón Pedro, Tomás (e kowëba Kjl̈ö), Natanael (e Caná so, Caná kjokyo, e Galilea kjokyo obi), Zebedeo wapga do pjök, ba oppinggaga do pjök obi.

³Ga Simón Pedro tjl̈ẽ l̇l̇amo l̈öng l̈i kong ga «Tja to mã shak» l̈e. Kuya l̈ok ga tjl̈ẽ ba kong ga «Tjawa ëmdë ga jek bop tjok bebi» l̈e. Eni ga uunkong l̈i opyono l̈ok jek kjyong roshko, gueniyo e shkëyo ga mã shano l̇l̇ëme.

⁴Wẽshko kjok shröngto ga ĩya l̈ok ga Jesús weno shäng di bäng l̈i sor go, gueniyo e ë miyde l̈öng l̇l̇ëme.

⁵Eni ga Jesús tjl̈ẽ ba kong l̈ok dbo go ga «Pjeyoga, ¿mã sharomire?» «L̇l̇ëme» l̈e l̈ok ba kong.

⁶Kuya ga tjl̈ẽ ba kong l̈ok ga «Bomi mã shakkl̈o kjwe dbuzĩ jer orkwo kël̈ëkong, ga mã shami dani» l̈e. Kuya l̈ok ga shäryara eni, ga ba shakkl̈o l̈i poyõya ga ä, roshko mã ara kjĩshko.

⁷Eshko ga Jesús oppingga woyde ara ba kjl̈ara wl̈eni l̈i tjl̈ẽ ga «¡Tjl̈apga l̈i shängdo!» l̈e. Kuya Simón Pedrorë ga ba shwong kop l̈ëkong skwara l̈unashko l̈i pjuna jekdo, ga optono jer dishko chuw erä.

⁸Eshko ga kjyong l̈i buk këm di rong wop tjok. Eni ga l̇l̇amo l̈öng l̈i jek ba irgo kjyong l̈i go, mã shakkl̈o roy mã tjung l̈i dopshiya jek öötong l̈öng pjöshko l̈ëkong. Opshino l̈ok kjyong l̈i roy dwayoshko ga ĩya l̈ok ga iök jong kjrina ri ri, ga iökgwo l̈i kjing go mã buk kjl̈ara, pjl̈ung shosho suk pjir buk kjwara bakoe.