Juan 20:8-23

⁸Inchen tru kusrenanøb pera unig tru sørinug nømerrig merrab pubikkucha, yandø umbøsrøngatig kebya, ashabe, kørebig køn.

⁹Pøs katøgucha nømbe tru Tiuswei wamwan pørigu Jesúsbe kwabelai utugurri katøle øsiiramig palønrrab køn taigwane chigúi mørmuin købig køn.

¹⁰Incha tru kusrenanøb pera uniiløbe nømui yamay katø ambubelø køn.

¹¹Inchen Maríabe sørim pulu wambig kishib pasramisrabe, kishib sørin trabyu trarraasha ashene,

¹²pagatø ángelesmera puliig kørrabig kewar, tru Jesúswei asrwan wayig købigube kane turgabøryu, kane katsigu purrai ashiptinchibig køn.

¹³Inchen ángelesmerabe payibelø køn: —Ishug, ¿chindimba kishku?— cha. Inchene nøbe trenchibig køn: —Pøs nai Señorwan srua ambin køn cha. Incha chu wayig mørmur— cha.

¹⁴Iigwan chab trencha, nø keesha ashene, truyu Jesúsbe pasraptinchibig køn. Inchendø, nøbe Jesús kuitamappe isumíig køn.

¹⁵Inchene Jesúsbe payibig køn: —Ishug, ¿chindimba kishku? cha. ¿Mun lagu?— cha. Inchene nøbe tru tulyu ellmarig ashibig kuitamab isua, trenchibig køn: —Au, kasuku, inchippa ñi srua yabe, trube, chu wayigwan eshkarra cha. Na srua inrrab— cha.

¹⁶Inchene Jesúsbe trenchiptinchibig køn: —¡María!— cha. Inchene nøbe keesha ashabe, hebreomay: —¡Rabuni!— chibig køn, (trenchippe, “Kusrennøbig” chib).

¹⁷Inchene Jesúsbe trenchibig køn: —¡Elatcha! cha. Kaguende nabe nai Møskai waisrø nebimø srø pasrar cha. Inchendø ñibe ya, nai nunelan trenchinrrig cha: “Naimba, ñimuimba Møskaweisrømay, naimba, ñimuimba Tiusweisrømay nabe inrrab kur tan” cha, eshkanrrab.—

¹⁸Inchen María Magdalenabe yabe, tru kusrenanøb pera uniilan: —¡Nabe Señorwan ashar!— chibig køn. Incha Señor nun maig tailangucha nømun eshkabig køn.

¹⁹Tru truaalømdøwei yandø yem misren, Jesúswei kusrenanøb pera uniiløbe tulundzuna purrabelø køn, yaskabmerane mu kurtraingaig kasra pønsra, judíosmeran kørig køb. Inchene Jesúsbe truyu kebib, nømuin tøbøtag pasramisrøb, trenchibig køn: —¡Chi isumgaig tab købiibe ñimba kønrrain!— cha.

²⁰Incha chab trenchabe tasiimeranba, nui tømbulwanba kenamarene, nui kusrenanøb pera uniiløbe Señorwan ashippe, truba truba kasraarabelø køn.

²¹Inchen Jesúsbe katøle trenchibig køn: —¡Chi isumgaig tab købiibe ñimba kønrrain! cha. Nabe ñimun karua ørar cha, nai Møskai nan karua ørøb lataitøwei.—

²²Incha iigwan chab trenchabe, Jesúsbe nømuim pala urra, trenchibig køn: —Espíritu Santon utay cha.

²³Ñim møilan køben nømui kaig mariilan ulø paymø kagøbashene, truilai kaig mariiløbe ulø payamig kømíig kørrømisran cha. Inchen ñim truilai kaig mariilan pesannamø ulø payene, nømune pesannamø ulø payamig kønrrun— chibig køn.