Juan 20:7-17

⁷Kinità din heman se kelobaw intenges diyà te olo. Wedà iyan pesipati diyà te sapot, meneng linepì aw tinani.

⁸Penga niyan, minawop heman se tinoledaan nekeonà dimateng. Pegkità din te kedita niyan, nemenal sikandin te ontò benal neantay si Jesus lekat te nematay,

⁹so lamig te aldaw sìyan, wedà pa kelebeti te menge tinoledaan se pakang tapay insolat diyà te kagi te Timanem, te keilangan meantay si Jesus lekat te nematay.

¹⁰Penga niyan, minolì se didowa tinoledaan i Jesus doton te balay dan.

¹¹Nayan, mig-ogpà pa si Maria tege Magdala doton te lowà te lebeng aw migkelag. Dalem te pegkelag din, simelib amon tomengteng doton didalem.

¹²Kinità din kidoen se didowa anghil nenaol te mepotì. Nenenoo dan kidoen te linebengan ki Jesus, sebad se lenged te olo, aw sebad se lenged te benis.

¹³Mig-insà dan, “Atà, nengà lay migkelag ka?” Timaba sikandin, “So neabat se lawa te Pengolo ko, aw wedà ko ketegahi aw kenan iyan soli.”

¹⁴Penga te peg-ikagi din kenyan, miniling sikandin aw kimità ki Jesus timindeg kidoen te lowà te lebeng, meneng wedà kilala kandin.

¹⁵Mig-insà si Jesus, “Atà, nengà lay migkelag ka? Sinu lay se inahà nikaw?” Meneng mig-aneng-aneng si Maria te sikandin se otaw egtonggò te kekeyowan sìyan, aw yan se doun te minikagi sikandin, “Sir, aw sikona se nengabat te lawa din, indani a aw kenan iyan soli, so ibingen ko.”

¹⁶Minikagi si Jesus, “Maria.” Yan siminalo si Maria diyà kandin aw minikagi te kagi te Hebreo, “Raboni.” (Se kelebadan niyan, “Menenoladà.”)

¹⁷Minikagi si Jesus, “Ikà eg-awid kanak, so wedà a pa pegpeengat doton te Amay ko. Meneng doton ka te menge kedowa ko, aw peg-indan ka kandan te molì a pa doton te Amay ko, doton te Timanem ko. Sikandin se Amay niyo heman aw Timanem niyo.”