Juan 20:2-28

²Zee mrexonn me ngwa me pa nzo rop na Simón Pér, na nak xaa nkedoola Jesús, nu né me lo rop nu: —¡Mloo xaa Xaa Nabeyy leen baa nu nanet nu pa naz ngulaa xaa xaa!

³Zee lee rop na Pér mroo nu ngwa roo baa.

⁴Tubka mrexonn rop nu, per lee na mas nxonnra ke Pér nu yilo na mzhin na roo baa.

⁵Mkichyek na nu mwii na nu myun re ler kwaan mral Jesús lo na, per namzeebt na.

⁶Nu zeera mzhin Simón Pér, zee mzeeb xaa leen baa. Noka lo lee xaa myun ler kwaan mral Jesús;

⁷nu noka myun lo xaa lee ler kwaan mral yek Jesús, nanaxt gax lo stub naz ler, sinka leeya nduuzh nax stub pa.

⁸Zee noka mrep na, nu myun lo na re kwaan ngok, nu mle na krer lee Jesús mroban.

⁹Nel zeeraka la yek re nu kwaan nzhé Xkyech Dios, lee xaa nzhaal roban.

¹⁰Zee mbare rop nu garli nu.

¹¹Per lee Mari mlake naz jwer, gax roo baa nu nzhonn me, nu mkichyek me zee ngwii me naz leen baa,

¹²nu myun chop mandad cheen Dios lo me, xaa kwaan nak ler rus, nzobsa paro mzhib xaa kwerp cheen Jesús; tub xaa nzob paro ngot yek Jesús nu stub xaa nzob pa naz mrib nii xaa.

¹³Lee rop mandad ngunabdizh lo me: —¿Chozhiin nzhonn lu? Lee me nzhé: —Nel mbe xaa Xaa Nabeyy na nu nanet na pa naz ngulaa xaa xaa.

¹⁴Nebse ngulo nzhé me kwaane, nu mzere me yenn me, ta myun Jesús lo me, per nanet me chelee xaaya.

¹⁵Zee mnabdizh Jesús lo me: —¿Chozhiin nzhonn lu? ¿Cho xaa nkwaan lu? Lee me mle xgab xaa nkanap yilo ngunii lo me, zee nzhé me: —Chelee lee lu mbe xaa, né lo na pa naz ngulaa lu xaa, zee wee na xaa.

¹⁶Zee lee Jesús nzhé lo me: —¡Mari! Lee me mzere yenn, nu nzhé me kwaan wdizh hebreo lo xaa: —¡Maestr!

¹⁷Jesús nzhé: —Nakeezht lu na, nel zer nya na lo Xuz na. Gwa nu guzh lo re wech na lee na nya zhaal kwaan Xuz na, xaa nak Xuz re gu, nu xaa kwaan nak Xdios na, nu xaa nak Xdios re gu.

¹⁸Zee lee Mari, me yezh Magdala, nya nu nzhé me ngune me lo Xaa Nabeyy, nu noka nzhé me lo re xaa, kwaan nzhé Xaa Nabeyy lo me.

¹⁹Gorna mzhel yizhyo zhe zee, zhe dming, lee nu, xaa mseed lo Jesús, mkasa leen tub yoo nu msaaw nu roo yoo nel nzheb nu ne nu re xaa sawlazh nu. Zee lee Jesús mzeeb nu mzo xsaww lo re nu, nu né xaa: —Dix. Chul kwi re gu.

²⁰Gorna ngulo nguné xaa kwaane, mlu xaa yaa xaa nu roo lextoo xaa lo re nu. Zee lee re nu chul doo ngok lextoo ngune lo Xaa Nabeyy stub welt.

²¹Zee lee Jesús né lo re nu stub welt: —¡Chul kwi re gu! Modxa mxaal Xuz na na, sbaaka xaal na re gu.

²²Nu mzebi xaa lo re nu, nu né xaa: —Bkayaa gu Mbi Naban.

²³Loka xaa yenlazh jwalt cheen wechxinn, Dios chee jwalt cheen xaa zee; nu loka xaa nayenlazht jwalt cheen wechxinn, Dios nacheet jwalt cheen xaa zee.

²⁴Max, tub lo re chiibchop nu, xaa mseed lo Jesús, xaa nii re xaa lo “Kwech”, nanzot baa gorna mzhin Jesús.

²⁵Gwluzh nzhé re nu lo xaa: —Ngune nu lo Xaa Nabeyy. Per lee Max mkeb né: —Chelee nawiit na lo yaa xaa paro mzob re xaa klab nu nachebt na kwen yaa na pa mzob klab, nu nachebt na yaa na roo lextoo xaa, nalet na krer mroban xaa.

²⁶Xon mbizh gwluzh, lee re nu mkasa leen yoo stub welt, nu welt ne noka Max nzo kwaan re nu. Nyaww roo yoo kwaan leyaw pa nzho re nu, per lee Jesús mzeeb nu mzoli xsaww lo re nu, nu né xaa: —Dix. Chul kwi re gu.

²⁷Zee nzhé xaa lo Max: —Bwii yaa na nu bchep kwen yaa lu; nu bchep yaa lu leen laz na. Nagakt lu tant ned. ¡Ble krer lee na mroban!

²⁸Zee lee Max nzhé: —¡Lu nak Xaa Nabeyy lo na nu Xdios na!