Juan 20:2-28

²Entonces ixin e María ajner tuaꞌ acꞌotoy tut e Pedro y tut inteꞌ ajcanuar xeꞌ chojresbꞌir ut meyra umen e Jesús y che: —Ayan chi ulocse ucuerpo Cawinquirar macuir e chꞌen y machi canata tiaꞌ qꞌuejcha ixin, che e María.

³Entonces locꞌoy wacchetaca e Pedro taca e ajcanuar era tuaꞌ axiobꞌ esto tiaꞌ mujca e Jesús.

⁴Y war aꞌjniobꞌ chatertiobꞌ era, pero más ajni e ajcanuar era, y tamar era cꞌotoy tut e mujr bꞌajxan que e Pedro.

⁵Y jaxir pacwan uchꞌujcu macuir e chꞌen y uwira que ajtaquix ubꞌajqꞌuibꞌir turu, pero machi ochoy macuir e chꞌen.

⁶Y de allí cꞌotoy e Simón Pedro. Pero jaxir machi quetpa patir sino que ochoy wacchetaca macuir e chꞌen, y uwira ubꞌan que ajtaquix e bꞌajqꞌuibꞌir turu.

⁷Pero uwira que ujobꞌ jor e Jesús quetpa najtir y que tzꞌotbꞌir turu y que majax tacar e bꞌujc xeꞌ bꞌacꞌar ani ucuerpo e Jesús tamar.

⁸Y nacpat era ochoy e ajcanuar xeꞌ cꞌotoy bꞌajxan tama e chꞌen. Y uwira tunor era y cay cꞌupseyan tama e Jesús que jaxir sutpa bꞌixcꞌa tujam e chamenobꞌ.

⁹Pues tama e hora era machito unatobꞌ tucꞌa war che uyojroner e Dios tiaꞌ che que e Jesús cꞌani asutpa abꞌixcꞌa tujam e chamenobꞌ.

¹⁰Entonces sutpa ixiobꞌ esto tama uyototobꞌ otronyajr.

¹¹Pero e María xeꞌ tuaꞌ e chinam Magdala quetpa wawan patir tutiꞌ e chꞌen era, war aꞌru. Y conda warto aꞌru pacwan uchꞌujcu macuir e chꞌen.

¹²Y uwira que ayan chateꞌ ángel xeꞌ sacsac ut ubꞌujcobꞌ, y uwira que turobꞌ tiaꞌ chꞌar ani ucuerpo e Jesús: inteꞌ tiaꞌ chꞌar ani ujor y otronteꞌ tiaꞌ aquetpa ani unuc uyoc.

¹³Entonces ojronobꞌ e angelobꞌ y chenobꞌ: —Ixic, ¿tucꞌa tuaꞌ war iyaru? che e angelobꞌ. Y che e María: —Pues umen que qꞌuejcha ixin Niwinquirar, y machi innata tiaꞌ ixin chꞌabꞌna, che e María.

¹⁴Y wacchetaca sutpa eron tupat y uwira ut e Jesús, pero machi unata jay jax e Jesús era.

¹⁵Entonces e Jesús uyubꞌi tuaꞌ e María y che: —Ixic, ¿tucꞌa tuaꞌ war iyaru? Y ¿chi war asajca? che e Jesús. Pues e María uchebꞌe que e Jesús jax e ajcojc huerto. Y tamar era uyare y che: —¿O net ca xeꞌ aqꞌueche ixin ucuerpo e Jesús? Arenen tiaꞌ ixiet achꞌabꞌu tuaꞌ erer inxin impojro tuaꞌ inqꞌueche axin, che e María.

¹⁶Entonces ojron e Jesús y che: —María, che e Jesús. Y wacchetaca e María sutpa uwira e Jesús y ojron tama e ojroner hebreo y che: —Raboni, che e María. Pues e ojroner raboni war che Niwajcanseyajet.

¹⁷Y che e Jesús: —Actanen era. Irix ameqꞌuen más era, porque merato inxin tut Nitata. Pero quiqui aren tunor niwermanuobꞌ que nen cꞌani intꞌabꞌay inxin tut Nitata xeꞌ jax Itata nox ubꞌan, y tut Nidiosir xeꞌ jax Idiosir nox ubꞌan, che e Jesús.

¹⁸Entonces e María xeꞌ tuaꞌ e chinam Magdala ixin tuaꞌ uyare uyajcanuarobꞌ e Jesús que uwira ut Cawinquirar y uchecsu tutobꞌ tunor lo que arobꞌna umener.

¹⁹Pues entonces tama e día era xeꞌ jax inteꞌ día domingo conda war acbꞌare, ya morojsebꞌir turobꞌ uyajcanuarobꞌ e Jesús tama inteꞌ otot tiaꞌ umaqui ubꞌobꞌ umen que war ubꞌacriobꞌ e gente tuaꞌ e Israel. Y wacchetaca checta wawan e Jesús tujamobꞌ y che: —Chꞌamic e jiriar, che e Jesús.

²⁰Y conda cꞌapa ojron cocha era e Jesús cay uwirse ucꞌabꞌ y uchejchec tiaꞌ xejcꞌa. Y conda uyajcanuarobꞌ uwirobꞌ tunor era tzayobꞌ meyra porque uwirobꞌ ut Cawinquirar.

²¹Entonces ojron e Jesús otronyajr y che: —Chꞌamic e jiriar. Bꞌan cocha Nitata uyebꞌta tarien, y bꞌan ixto nen war inwebꞌtox ixixin ubꞌan tuaꞌ ichecsu niwojroner tut tunor e gente tara tor e rum, che e Jesús.

²²Y de allí uyujta umusic tamarobꞌ y che: —Chꞌamic Unawalir e Dios.

²³Inwajcꞌox e cꞌotorer tuaꞌ iware e gente que: “Cꞌumpix e Dios tacarox tama tunor imabꞌambꞌanir.” Pues conda iware cocha era Cadiosir axin ixto acꞌumpa tacarobꞌ. Y inwajcꞌox e cꞌotorer ubꞌan tuaꞌ iware e gente que machito war acꞌumpa e Dios tacarobꞌ tamar e mabꞌambꞌanir lo que cay uchiobꞌ. Y conda iware cocha era war che que aquetpato tama ujorobꞌ e mabꞌambꞌanir lo que cay uchiobꞌ, che e Jesús.

²⁴Pues entonces e Tomás xeꞌ arobꞌna Cuach xeꞌ jax inteꞌ tujam e once ajcanuarobꞌ machi turu conda checta e Jesús tujam e inmojr era tama inteꞌ acbꞌar.

²⁵Pero e inmojr ajcanuarobꞌ uyareobꞌ e Tomás y chenobꞌ: —Non cawira ut Cawinquirar, che e ajcanuarobꞌ era. Pero e Tomás che: —Jay machi inwira uchꞌenar e clavo tama ucꞌabꞌ machi tuaꞌ incꞌupse. Y jay machi onse nicꞌabꞌ tama uchꞌenar e clavo, y onse nicꞌabꞌ tama uchejchec, machi tuaꞌ incꞌupse, che e Tomás.

²⁶Entonces conda numuy ocho día sutpa umorojse ubꞌobꞌ uyajcanuarobꞌ e Jesús otronyajr tama inteꞌ otot. Y yixto turu e Tomás tacarobꞌ. Y macar e puerta tupatobꞌ conda wacchetaca checta wawan e Jesús tutobꞌ otronyajr y che: —Chꞌamic e jiriar, che e Jesús.

²⁷Y wacchetaca uyare e Tomás y che: —Chꞌujcun awira nicꞌabꞌ y osen or acꞌabꞌ tama uchꞌenar e clavo, y tares acꞌabꞌ era y osen tama nichejchec. Ira ache abꞌa que machi icꞌupseyan, sino que cꞌupsen que sutpa bꞌixqꞌuen, che e Jesús.

²⁸Entonces che e Tomás: —Net jax Niwinquiraret y jax Nidiosiret, che e Tomás.