Juan 20:2-15

²Et nanagtag da ay emey sin kad-an da Pedro ya din pasolot Jesus ay laydelaydena. Kanan Maria en daida, “Kinaan da din awak di Apo tako sin liyang, yan adi mi ammoy nangipay-an da.”

³Isonga kalobwat et da Pedro ay emey sin kad-an di liyang.

⁴Nanagtag da et ay dowa, ngem gapo ta mabmabikas ay managtag din esa mo si Pedro, nangon-ona ay sinmawang sin liyang.

⁵Nanyakog-ong ay nangitining, et inila na din lopot ay naibotibot en Jesus, ngem adi sinenggep.

⁶Somawang pay si Pedro, kasegep et inila na din naibotibot ay lopot ay naipapayag

⁷ya din panyo ay naibedbed sin toktok Jesus. Din panyo et nalopilop ay naikasin di kad-ana.

⁸Asi aben senggep din esa ay nangon-ona. Sin nangilaana sin lopot ay wadas di, pinati na ay natago kasin si Jesus.

⁹Tan din inpaisolat Diyos ay kanana en siyat kasin matagos sisya et daan da pay laeng maawatan.

¹⁰Asi pag somaa din doway pasolot ay sana.

¹¹Ngem si Maria pay, deda ay pinmipika sin kad-an di liyang ay man-og-oga. Man-og-oga ay nanyakog-ong ay nangitining sin liyang.

¹²Kambaw et waday dowa ay anghel ay nanbabado si mankilat. Tinmotokdo da sin sigod ay naipayagan Jesus, di esa sin toktokan ya din esa sin andayan.

¹³Kanan da en sisya, “Ay iyogtan, sinoy pan-og-ogaam?” “Tan ina dan bangkay di Apok, et adiak ammo mo intoy nangieyan da,” insongbat na.

¹⁴Pag manwingi et ilaenas Jesus ay pinmipika, ngem adi na naimatonan.

¹⁵Kanan Jesus, “Iyogtan, apay nga man-og-oga ka? Sinoy an-anapem?” Ngem si Maria et kananas nemnem na en sisya din mangay-ayowan sin nais-ek sidi et kananan sisya, “Apo, mo sik-a di nanga en sisya, ibagam kod mo intoy nangipay-am ta enak kod alaen.”