Juan 20:15-30

¹⁵Tacan tan tsica̱ tuhun ra Jesús tsi ña: ―¿Nacuenda tsacú un? ¿Yóo nanducú un? ―catyí ra tsihin ña. Cuñí maa ña tyin ra jahá cuenda cora yutun tata can cuví ra. Tan catyí ña: ―Tatta, tatun yooho quihi̱n tsi ra Jesús, ca̱han tsihin yu nu maa tsindaca̱ un tsi ra, tyin cunaquihin yu tsi ra ―catyí ña tsihin ra.

¹⁶Tacan tan catyí ra Jesús tsihin ña: ―¡María! ―catyí ra tsihin ña. Tan nanyehe̱ ña tan caha̱n ña tsihin ra tsihin yuhu hebreo, tan catyí ña: ―¡Raboni! ―Tan cuñí tsi catyí can: “Maestro”.

¹⁷Tan catyí ra Jesús tsihin ña: ―Ña tɨ̱ɨn un tsi yu, tyin ñaha ca cuhun yu nu nyaá Jutu yu. Maa tyin cu̱aahan tan ca̱han un tsihin tandɨhɨ yañi yu tyin cuahan yu nu nyaá Jutu yu, tan juvin ñi Jutu ndɨhɨ ndo cuví tsi ra. Cuahan yu nu nyaá Nyoo yu, tan juvin ñi Nyoo ndo cuví tsi ra ―catyí ra Jesús tsihin ña.

¹⁸Tacan tan tsaha̱n ña María ñuu Magdala can tsijacoto̱ ña tsi ra tsica̱ tsihin ra Jesús tyin nyehe̱ ña tsi ra tan caha̱n ra yacan tsihin ña.

¹⁹Juvin ñi maa quɨvɨ can nu quitsaha vitya, tsa cua cuaa tan ndu ii̱n ra tsica̱ tsihin ra Jesús. Tan ndasɨ vaha yuvehe nu yucú ra naha tsa cuenda tsa yuuhví ra naha tsi ra cuví ityi nuu tsihin nyɨvɨ Israel. Tan ra Jesús quituvi̱ ra tan tsinyaa̱ nyityi ra mahñu ra naha. Tan tsaha̱ ra nacumi tsi ra naha, tan catyí ra: ―Na coo tsa taxin añima ndo ―catyí ra.

²⁰Tsa yaha̱ tsa caha̱n ra yacan tan janaha̱ ra ndaha ra tan xiin ra tsi ra naha. Tan ra ican naha ra sɨɨ xaan cuñí ra naha tsa nyehe̱ ra naha tsi Jutu Mañi yo.

²¹Tan catyí nyico ra Jesús inga tsaha tsihin ra naha: ―Na coo tsa taxin añima ndo. Tumaa tsa tava̱ Jutu yu tyiñu tsi yu, tacan tavá nyico tucu yuhu tyiñu tsi nyooho ―catyí ra tsihin ra naha.

²²Tacan tan tɨvɨ̱ ra tsi ra naha tan catyí ra tsihin ra naha: ―Na̱quihin ndo Tatyi Ii Nyoo.

²³Nyɨvɨ tsa jahá ndo tucahnu iñi, iyó tucahnu iñi tsi ñi. Tan nyɨvɨ tsa ña jahá ndo tucahnu iñi, nduve tucahnu iñi iyó tsi ñi ―catyí ra Jesús tsihin ra naha.

²⁴Maa tyin ra Tomás, iin rq tsica̱ tsihin ra Jesús, ra tsa catyí ñi: “ra tɨnɨhɨ”, yoñi ra nyií tsihin ra naha tsa tsaha̱n ra Jesús.

²⁵Yaha̱ can tan nacatyi̱ tuhun ra tsica̱ tsihin ra Jesús tsihin ra: ―Nyehe̱ ndi tsi Jutu Mañi yo ―catyí ra naha tsihin ra. Maa tyin ra Tomás catyí ra: ―Tun ña nyehe yu ndaha ra nu caahví nu quɨhvɨ nduyu, tan ña cuaxin yu nundaha yu nu yɨhɨ̱ nduyu can, tan ña cuaxin yu ndaha yu yɨquɨ naha ra, ña cua tsinu iñi yu ―catyí ra Tomás.

²⁶Tsa yaha̱ una quɨvɨ yucú nyico ra tsica̱ tsihin ra Jesús tsitsi iin vehe. Tan nyií ra Tomás tsihin ra naha. Tacan tan vasu ndi maa ndasɨ vaha yuvehe, maa tyin ra Jesús quɨhvɨ̱ ra tan tsinyaa̱ nyityi ra mahñu ra naha. Tan tsaha̱ ra nacumi tsi ra naha tan catyí ra: ―Na coo tsa taxin añima ndo.

²⁷Tacan tan quitsaha̱ catyí ra tsihin ra Tomás: ―Cu̱axin nundaha un nu caahví ndaha yu ihya. Tan cu̱axin ndaha un yɨquɨ naha yu. Tan ña cuvi un ra ndava iñi. Tsi̱nu iñi ―catyí ra Jesús tsihin ra Tomás.

²⁸Tacan tan nacaha̱n ra Tomás tan catyí ra: ―¡Jutu Mañi yu! ¡Tan Nyoo yu! ―catyí ra Tomás.

²⁹Tan catyí ra Jesús tsihin ra: ―Yooho Tomás, vityin tsinú iñi un tyin nyehé un tsi yu. Sɨɨ ca cuñí nyɨvɨ tsa nduve tsa nyehe̱ tan tsinú iñi ñi ―catyí ra Jesús tsihin ra Tomás.

³⁰Cuaha ca tsa iyo javaha̱ ra Jesús nuu ra tsica̱ tsihin ra, maa tyin ña tandɨhɨ tsi nyaá nu libru ihya.