Juan 20:12-25

¹²Kinità din kidoen se didowa anghil nenaol te mepotì. Nenenoo dan kidoen te linebengan ki Jesus, sebad se lenged te olo, aw sebad se lenged te benis.

¹³Mig-insà dan, “Atà, nengà lay migkelag ka?” Timaba sikandin, “So neabat se lawa te Pengolo ko, aw wedà ko ketegahi aw kenan iyan soli.”

¹⁴Penga te peg-ikagi din kenyan, miniling sikandin aw kimità ki Jesus timindeg kidoen te lowà te lebeng, meneng wedà kilala kandin.

¹⁵Mig-insà si Jesus, “Atà, nengà lay migkelag ka? Sinu lay se inahà nikaw?” Meneng mig-aneng-aneng si Maria te sikandin se otaw egtonggò te kekeyowan sìyan, aw yan se doun te minikagi sikandin, “Sir, aw sikona se nengabat te lawa din, indani a aw kenan iyan soli, so ibingen ko.”

¹⁶Minikagi si Jesus, “Maria.” Yan siminalo si Maria diyà kandin aw minikagi te kagi te Hebreo, “Raboni.” (Se kelebadan niyan, “Menenoladà.”)

¹⁷Minikagi si Jesus, “Ikà eg-awid kanak, so wedà a pa pegpeengat doton te Amay ko. Meneng doton ka te menge kedowa ko, aw peg-indan ka kandan te molì a pa doton te Amay ko, doton te Timanem ko. Sikandin se Amay niyo heman aw Timanem niyo.”

¹⁸Penga niyan, dimoton si Maria tege Magdala te menge tinoledaan i Jesus aw minikagi, “Kinità ko den gina se Pengolo.” Penga niyan, in-indan din diyà kandan se kedita te inikagi i Jesus diyà kandin.

¹⁹Pegkedelem te Linggo sìyan, netipon se menge tinoledaan i Jesus kidoen te sebad balay, aw tinakep dan se lelebangan niyan amon eked dan kitai, so nelemitan dan te menge obanen te Judiyo. Pengkey netakep se lelebangan, meneng pegketà dimateng si Jesus timindeg kidoen te tengà-tengà dan, aw minikagi, “Ibeg ko melinaw se pedowan niyo.”

²⁰Penga niyan, impekità din diyà kandan se menge palì diyà te belad din aw kilid din. Ontò neluba se menge tinoledaan din te pegkità dan te Pengolo.

²¹Penga niyan, todà minikagi si Jesus, “Ibeg ko melinaw se pedowan niyo. Iling te pegsogò te Amay ko kanak, yan isogò ko den heman sikiyo.”

²²Penga te peg-ikagi din kenyan, mig-edop sikandin diyà kandan aw minikagi, “Domateng se Espiritu Santo kenyo.

²³Aw pegwedaden niyo se salà te doma otaw, pegwedaden iyan te Timanem. Meneng aw eked niyo pegwedadi se salà te doma otaw, eked iyan pegwedadi te Timanem.”

²⁴Nayan, si Tomas, se doma ngadan din si Pingin, sikandin se sebad diyà te sempolò teg dowa tinoledaan i Jesus. Pegpekità i Jesus diyà kandan, wedad kidoen si Tomas.

²⁵Yan minikagi se doma tinoledaan diyà ki Tomas, “Migpekità se Pengolo kenami.” Meneng minikagi si Tomas, “Eked a pemenal te neantay sikandin lekat te nematay singed aw onà ko kitaen se palì te lansang diyà te belad din, aw isawol ko se intetodò ko diyà te awang niyan, aw ilamen ko heman se kilid din.”