JUAN 20:1-31

¹Dxe ne rzelo xman, rsildoogue wa Mli Matlen ruxbaa Jesus, wii men ne le gye ne zemzëë rubaa che zu tebkoo.

²Orguin noze rzhoon men wa men lo Simon-Bëd no le lo ste xpoxter Jesus ne kesentyent ryaan Ne, re men: ―Weey mén Jesus lenbaa; txu nan gan pazh walu mén men.

³Lex wruu Simon-Bëd za Simon-Bëd ruxbaa Ne yrup Simon-Bëd ste poxter guin.

⁴Noze rzhoon men za men yrup men; per ntozdee rzhoon ste men guin ke lo Simon-Bëd, kwlodee men wdxiin ruxbaa Ne.

⁵Lex wgyixlo men lenbaa wii men le lër ne wrël Ne zhoob nga, per wdeedet men lenbaa.

⁶Zhich guin wdxiin Simon-Bëd, wdee Simon-Bëd lenbaa no Simon-Bëd wii zhoob lër guin nga

⁷no wii ke men lër ne wrël xtoo Ne ndeebo zhoobo tebkoo, zhoobdeto tese yrupo lër ne wrël Ne.

⁸Lex wdee ste poxter guin, men ne wdxiin kwlodee; wii men neguin ne wak, wlaleedx men ne wban Ne.

⁹Per gardet ydee men kwent ne re lo xgyiich Dëdyuzh ne rap Jesus degne yban Ne.

¹⁰Orguin wberee ke men ruyuu yrup men.

¹¹Per le Mli wyan guex rubaa roon men; orguin ne kayoon men, wgyixlo men lenbaa,

¹²wii men zob txup angel ne nak lërngyich ledne waa Jesus, te ne zob ledne waa xtoo Ne, le ste ne zob ledne waa nii Ne.

¹³Lex wnabdiiz angel guin lo Mli, re ne: ―Wnaae, ¿penak roon de? Wke men re men: ―Porke weey mén Jesus, no nandet noo gan pazh walu mén men.

¹⁴Nonchee wluzh re Mli zenga, wcheree lo Mli wii men le Jesus zu nga, per wnebeeydetgue men Ne.

¹⁵Lex re Ne lo men: ―Wnaae, ¿penak roon de? ¿Txu rye de? Nuu lextoo Mli pazer men ne rapkwent yagnex guin ne, lex re Mli: ―Dechey, belne laa de weey men, guzëët gan pazh walu de men, chen tsaxii noo men.

¹⁶Lex re Ne: ―¡Mli! Wcheree lo Mli, re men lo Ne kon diz-hebreo: ―¡Raboni! (Raboni rna Maxter.)

¹⁷Orguin re Ne lo men: ―Ygaldet de noo, porke gardet gya noo lo Xuz noo. Gutsa gue de lo yra xpén noo ne le noo gya lo Dëdyuzh Xuz noo ne nak ke Xuz de yra de, lo XDëdyuzh noo ne nak ke XDëdyuzh de yra de.

¹⁸Lex waluu Mli Matlen diiz lo yra xpén Ne, re Mli Matlen: “Wii noo Jesus no wuu noo diiz yrup noo Jesus.”

¹⁹Chene wnit lyu dxe ke guin ne wzelo xman, ndxin yra xpén Jesus, zemzëë yuu nuu men por ne rdxe men xtis-Israel. Lex wlalo Ne, wzu Ne gwrooltee lad men, re Ne: ―Dëdyuzh yseleedx gyelendxi lo de yra de.

²⁰Wluzhse re Ne zenga, wluu Ne nya Ne no wluu Ne koo Ne lo men. Kesentyent wzhiilen men ne wii men Ne.

²¹Orguin re Ne lo men ste: ―Dëdyuzh yseleedx gyelendxi lo de yra de. Zegne wxaal Dëdyuzh Xuz noo noo ne zëëd noo, zenga ke yxaal noo de yra de.

²²Wluzh re Ne zenga, lex wleb Ne led men yra men, re Ne lo men: ―Gukakwent Espíritu Sant.

²³Belne gun de mén perdon, che wak men perdon; per belne gundet de men perdon, gakdet men perdon.

²⁴Chene wlalo Jesus lo yra xpén Ne, yët Tmazh ne rnii men Mzhoz, te ke men ne nak xpén Ne chibtxup nak Tmazh.

²⁵Lex re stebëd xpén Ne lo Tmazh: ―Wii noo Jesus. Wke Tmazh, re Tmazh: ―Belne kwiidet noo xbeey klab nya Ne no belne yseedet xkwen noo ledne wgyiich klab no belne yseedet nya noo koo Ne ledne wleedx lans, ylaleedxdet noo we.

²⁶Chene wluzh xun gbiz, ndxin yra xpén Ne ste, cheguin si no Tmazh zu lad men; mase zemzëë yuu nuu men, per wlalo Ne, wzu Ne gwrooltee lad men yra men, re Ne lo men: ―Dëdyuzh yseleedx gyelendxi lo de yra de.

²⁷Orguin re Ne lo Tmazh: ―Gukwii ledxnya noo, gusee xkwen do, no gubig gusee nya de koo noo. Tsutxupdetre lextoo de, gulaleedxo.

²⁸Lex wke Tmazh, re Tmazh lo Ne: ―Dechey, laa de nak XDëdyuzh noo.

²⁹Re Ne lo Tmazh: ―Rlaleedx de noo porke che wii de noo; nzoon men ne rlaleedx noo mase rwiidet men noo.

³⁰Ndal gyelmilaguer ne wlaa Jesus nes lo yra xpén Ne wkaadet lo liberree.

³¹Per wkaa yra neree chen ylaleedx de yra de ne Jesus nak Crist XPee Dëdyuzh no chen chene ylaleedx de Ne, gap de gyelembán ne nunk luzhdet.