Juan 19:5-20

⁵Fey nentungepatuy Jesus fey ti wayngechi pülliñ korona tukuniey kisu ñi longko mew ka tukutuwküley tüyechi kurü kelü takuwün mew. Pilato feypi: —¡Tüfey tañi mülen tamün wültukupaelchi wentru!

⁶Feymew peetew ti pu longkolelu pu saserdote mew ka ti pu llüwatulekelu ti ngillatuwe ruka mew, eluwi engün ñi wirarael: —¡Langümngepe kürus mew! ¡Langümngepe kürus mew! Fey Pilato feypi: —Yefimün may ka langümfimün ta kürus mew, welu iñche peñmalafiñ chem yafkan no rume kisu mew.

⁷Feymew ti pu judiu llowdungueyew: —Tüfachi wentru feley ñi layael, iñchiñ am nielu kiñe ley dungu, fey ñi chem pilen taiñ ley dungu feley ñi layael, ‘iñche ta Ngünechen ñi Fotüm’ pikelu am ―pi engün.

⁸Fey allkülu tüfachi dungu, Pilato rume llükay.

⁹Wiñome konputuy ñi ülmen ruka mew, fey ramtufi ta Jesus: —¿Chew anta tuwimi ta eymi? Welu Jesus llowdungulaeyew chem dungu rume.

¹⁰Fey Pilato feypifi ta Jesus: —¿Chumngelu am llowdungulaen? ¿Kimlaymi anta iñche ñi nien ta awtoridad tami langümafiel ta kürus mew ka femngechi tami lifrekünutuafiel?

¹¹Feymew Jesus feypieyew: —Nielayafuymi chem awtoridad no rume ta iñche mew, fey Ngünechen elunofelmew, feymew tüfey tañi wültukuetew ta eymi mew doy fütra welulkay.

¹²Fey tüyechi lelen mew müten, Pilato rakiduamfuy chumngechi ñi lifrekünutuafiel ta Jesus, welu ti pu judiu wirareleyew: —¡Fey lifrekünutufilmi, weniyelafimi tati emperador! ¡Iney rume longko ülmenkünuwle, fey ta kayñeyefi tati emperador! ―pi engün.

¹³Pilato allkülu tüfachi dungu, werküy ñi nentungeael ta Jesus, ka pürüm anükünuwi kiñe kues reke tati fütra wangku mew, (fey aramewdungun mew Gabata pingerkey), fey tüfa feypin ürke llüdümkülelu kura mew.

¹⁴Petu kiñelewechi antü ñi akuael ta Paskua, epe rangiantülu, fey Pilato feypifi ti pu judiu: —¡Tüfa ta eymün tamün nieelchi longko ülmen!

¹⁵Welu kisu engün wirari: —¡Langümngepe! ¡Langümngepe! ¡Langümngepe ta kürus mew! Fey Pilato ramtuy: —¿Iñche anta langümafun tamün longko ülmen? Fey ti pu longkolelu tati pu saserdote mew llowdungueyew: —¡Iñchiñ ta nielaiñ kangelu longko ülmen, tati emperador müten!

¹⁶Feymew Pilato wültukufi ta Jesus ñi langümngeael ta kürus mew, fey ti pu judiu yetufi engün ta Jesus.

¹⁷Jesus nentungelu, yeniey ñi kürus tañi amuael tati Kalafera pingechi lelfün mew (fey aramewdungun mew Golgota pingey).

¹⁸Tüye mew langümngepuy wente kürus ka epu weñefe engün, kiñe Jesus ñi man püle, kangelu kisu ñi wele püle elngey.

¹⁹Pilato werküy ñi elkünulngeael kiñe letreru Jesus ñi longko püle ti kürus mew, feypilelu chem mew ñi langümngen:

²⁰Rume fentren pu judiu pefi engün tüyechi letreru ñi wirin dungu, fey ti lelfün chew ñi langümngemum ta Jesus püllelerkey ti waria mew, fey tüyechi dungu wiriley ta külarume dungun mew: aramew, latin ka griegu.