Text copied!
CopyCompare
Uyojroner e Dios xeꞌ Tzꞌijbꞌabꞌir Tama e Onian Tiempo - Juan - Juan 19

Juan 19:4-31

Help us?
Click on verse(s) to share them!
4Entonces e Pilato locꞌoy patir otronyajr y cay ojron y che: —Ubꞌinic tunorox, intares e Jesús tara tiut tuaꞌ inwirsiox que matucꞌa intajwi tamar xeꞌ erer achamesna tamar, che e Pilato.
5Entonces locꞌoy e Jesús patir taca inteꞌ corona tama ujor xeꞌ jarbꞌir tama e tꞌix y bꞌujcsebꞌir taca inteꞌ bꞌujc xeꞌ chacpurem ut bꞌan cocha inteꞌ bꞌujc tuaꞌ inteꞌ rey. Entonces ojron e Pilato y che: —Iranic, jaxto era e winic, che e Pilato.
6Pero conda irna e Jesús umen uwinquir e inmojr sacerdotiobꞌ y umen e sian policía tuaꞌ e templo cay aruobꞌ taca inteꞌ nuxi nuc y chenobꞌ: —Chamsenic, chamsenic, che e nuquir winicobꞌ era. Y che e Pilato: —Qꞌuechic chic y chamsenic nox, porque nen matucꞌa intajwi tamar, che e Pilato.
7Pero e nuquir winicobꞌ chenobꞌ: —Non ayan caley xeꞌ chꞌar tzꞌijbꞌabꞌir que che que ucꞌani tuaꞌ achamesna e winic era umen que jaxir war uche ubꞌa que jax Uyunen e Dios, che e nuquir winicobꞌ era.
8Pero conda e Pilato uyubꞌi tunor e ojroner era más bꞌacta.
9Entonces sutpa ochoy macu otronyajr y uyubꞌi tuaꞌ e Jesús y che: —¿Y tiaꞌ ajlugaret net? che e Pilato. Pero e Jesús machi ojron.
10Entonces ojron e Pilato otronyajr y che: —¿O machi ca cꞌani apejquen? ¿Machi ca anata que nen ayan nicꞌotorer tuaꞌ inware ichamesna y ayan nicꞌotorer ubꞌan tuaꞌ inwactet iꞌxin bꞌan taca? che e Pilato.
11Entonces ojron e Jesús y che: —Matucꞌa nien imbꞌijc acꞌotorer tanijor nen jay e Dios machi ani uyajqꞌuet. Pero tin e uqꞌuechien tarien toit jax tin e ucojco más e mabꞌambꞌanir, che e Jesús.
12Y tamar era e Pilato cay usicbꞌa cocha tuaꞌ ubꞌani axin e Jesús. Pero e gente tuaꞌ e Israel cay aruobꞌ otronyajr y chenobꞌ: —Jay abꞌani axin e Jesús bꞌan taca machi war iquetpa intera taca e rey tama e chinam Roma. Porque tunor tin e axin uche ubꞌa que jax inteꞌ rey war aqꞌuijna uwira e rey romano, che e sian gente era taca inteꞌ nuxi nuc.
13Entonces conda e Pilato cꞌapa uyubꞌi tunor e ojroner era uyare tuaꞌ aloqꞌuesna e Jesús patir tuaꞌ achena juzgar. Y de allí locꞌoy e Pilato turuan tor uturtar tiaꞌ aturuan tuaꞌ uche juzgar. Pues e lugar era ucꞌabꞌa Gabata tama e ojroner hebreo y war che: “Sorbꞌir tun” tama cawojroner.
14Pues e día era jax conda e gente tuaꞌ e Israel uyustes ubꞌobꞌ tuaꞌ uyubꞌi oꞌchoyobꞌ tama e nojqꞌuin pascua. Y e hora era jaxix tama uyuxin e día. Entonces e Pilato uyare e gente era y che: —Tara war Irey, che e Pilato.
15Pero jaxirobꞌ aruobꞌ taca inteꞌ nuxi nuc otronyajr y chenobꞌ: —Chamsenic, chamsenic. Chꞌubꞌanic tut e cruz, che e gente era. Pero e Pilato che: —¿O icꞌani ca tuaꞌ inchꞌubꞌa Irey era tut e cruz? che e Pilato. Pero uwinquir e inmojr sacerdotiobꞌ ojron y che: —Non matucꞌa otronteꞌ carey, sino que jax taca carey xeꞌ turu tama e chinam Roma, che uwinquir e inmojr sacerdotiobꞌ era.
16Entonces e Pilato uyajcꞌu e Jesús tama ucꞌabꞌobꞌ tuaꞌ uchꞌubꞌobꞌ tut e cruz. Y e gente era cay uquerejbꞌobꞌ uqꞌuechiobꞌ ixin e Jesús.
17Entonces e Jesús ubꞌiti ucruz tor uquejrebꞌ y ixin tama inteꞌ lugar xeꞌ ucꞌabꞌa Calvario xeꞌ jax or inteꞌ witzir xeꞌ bꞌan uwirnar cocha ubꞌaquer ujor e gente. Y ucꞌabꞌa or e witzir era Gólgota tama e ojroner hebreo.
18Y jax tama e lugar era tiaꞌ chꞌubꞌna e Jesús tama ut ucruz. Y ayan chateꞌ ajxujch xeꞌ chꞌubꞌna tuyejtzꞌer e Jesús ubꞌan xeꞌ chꞌubꞌnobꞌ tama ut inteꞌ inteꞌ ucruz y ya chꞌubꞌna e Jesús tuyuxin tama ut ucruz.
19Entonces e Pilato uyare tuaꞌ aturbꞌana inteꞌ pachpachteꞌ tujor ucruz e Jesús tiaꞌ chꞌar tzꞌijbꞌabꞌir y che: JAX ERA E JESÚS XEꞌ TUAꞌ E CHINAM NAZARET XEꞌ JAX E REY TUAꞌ E GENTE TUAꞌ E ISRAEL. Bꞌan chꞌar tzꞌijbꞌabꞌir tujor ucruz e Jesús.
20Y meyra gente tuaꞌ e Israel ixiobꞌ y uchiobꞌ leer lo que quetpa tzꞌijbꞌabꞌir tujor ucruz e Jesús, cocha e lugar era majax innajt tut e chinam Jerusalem. Y e ojroner tama e pachpachteꞌ era chꞌar tzꞌijbꞌabꞌir uxyajr, inyajr tama e ojroner hebreo, inyajr tama e ojroner latín, y inyajr tama e ojroner griego.
21Y tamar era cay qꞌuecranobꞌ uwinquirobꞌ e inmojr sacerdotiobꞌ y uyareobꞌ e Pilato y che: —Ira atzꞌijbꞌa que ‘Jax e Rey tuaꞌ e gente tuaꞌ e Israel’ sino que tzꞌijbꞌan que: “Jaxir che que nen e Rey tuaꞌ e gente tuaꞌ e Israel”, che e nuquir winicobꞌ era.
22Pero ojron e Pilato y che: —Lo que intzꞌijbꞌix intzꞌijbꞌix, y bꞌan taca tuaꞌ aquetpa, che e Pilato.
23Pues entonces conda e soldadobꞌ cꞌapa uchꞌubꞌobꞌ e Jesús tut e cruz, cay uxixiobꞌ ubꞌujc tuaꞌ alocꞌoy cuatro tájo tamar. Y tamar era inteꞌ inteꞌ soldado uchꞌami inteꞌ tájo. Pero ayan otronteꞌ ubꞌujc e Jesús xeꞌ galan jarbꞌir xeꞌ intera taca bꞌujc.
24Entonces ojronobꞌ e soldadobꞌ era jaxobꞌ taca y chenobꞌ: —Ma erer cawejru e bꞌujc era. ¿Ma ca nic más bueno tuaꞌ catzꞌijbꞌa inteꞌ inteꞌ cacꞌabꞌa tama inteꞌ inteꞌ tun tuaꞌ cawira chi tuaꞌ uchꞌami e bꞌujc era? che e soldadobꞌ. Y bꞌan uchiobꞌ tuaꞌ acꞌapa achempa bꞌan cocha chꞌar tzꞌijbꞌabꞌir tama uyojroner e Dios tiaꞌ che que: “Uxere ubꞌobꞌ tama nibꞌujc, y utzꞌijbꞌobꞌ ucꞌabꞌobꞌ tama cora tun tuaꞌ uwirobꞌ chi tacar tuaꞌ aquetpa.”
25Y tuyejtzꞌer e cruz tiaꞌ chꞌubꞌna e Jesús ya warobꞌ cora ixictac xeꞌ jax utuꞌ e Jesús taca ucꞌojna, y e María xeꞌ jax uwixcar e Cleofas, y e María xeꞌ tari tama e chinam Magdala.
26Y conda e Jesús uwira utuꞌ y que ya war uyajcanuar xeꞌ war uchojres ut meyra tacar, uyare utuꞌ y che: —Ixic, niwajcanuar era tuaꞌ aquetpa bꞌan cocha inteꞌ asitz, che e Jesús.
27Y nacpat era ojron e Jesús otronyajr y uyare e ajcanuar era y che: —Nituꞌ era tuaꞌ aquetpa bꞌan cocha atuꞌ coner, che e Jesús. Y tama e día era e ajcanuar era uqꞌueche ixin utuꞌ e Jesús tuaꞌ aquetpa tama uyotot.
28Entonces conda e Jesús unata que cꞌapa tunor upatnar cay ojron y che: —Ataqui nitiꞌ, che e Jesús. Bꞌan uche tuaꞌ acꞌapa achempa tunor lo que chꞌar tzꞌijbꞌabꞌir tama uyojroner e Dios tamar jaxir.
29Y ayan ingojr bꞌejt xeꞌ bꞌutꞌur taca e vino xeꞌ inchꞌaj ut. Entonces uchꞌaquiobꞌ inteꞌ teꞌ y ucachiobꞌ cora tinam tama upunto e teꞌ y umuquiobꞌ tama e vino y utꞌabꞌsiobꞌ tuaꞌ uyariobꞌ tuyej e Jesús.
30Entonces e Jesús uyuchꞌi imbꞌijc e vino era xeꞌ inchꞌaj ut y che: —Cꞌapa ixto yaꞌ tunor nipatnar, che e Jesús. Entonces luccha ujor y chamay.
31Pues e día era jax e día conda war uyustes ubꞌobꞌ e gente tama e Israel tuaꞌ oꞌchoy awiobꞌ tama e nojqꞌuin pascua. Y tamar era machix cꞌani uwirobꞌ tin e chꞌurobꞌ tut e cruz tama inteꞌ nuxi día tuaꞌ e jiriar cocha era. Y tamar era e nuquir winicobꞌ tuaꞌ e Israel ucꞌajtiobꞌ tuaꞌ e Pilato tuaꞌ uyare acꞌocchina ut uyaꞌ tin e chꞌubꞌna tut e cruz tuaꞌ achamayobꞌ inyajrer tuaꞌ erer uyemsiobꞌ wacchetaca.

Read Juan 19Juan 19
Compare Juan 19:4-31Juan 19:4-31