Juan 19:21-28

²¹Incha treekkurri judío sacerdotesmeran karubeløbe Pilatone trenchibelø køn: —“Judíosmerai rey køn” cha pøra mesrømøta cha. Treeg kømøtø: “ ‘Nabe judíosmerai rey kur’ cha, nø trendaig køn” chibig, treeg pør— cha.

²²Inchen Pilatobe trencha løtabig køn: —Na pøriibe, pørig megabasay— cha.

²³Incha suldaumerabe Jesúswan kurusyu chab mesrabe, nui kewagúigwan kusrawa, pippalø pirishibelø køn, kanui kan kangue. Incha trugurrimbe tru pala kewagúigwangucha kusrabelø køn. Inchen truibe kemesra tsusaimíig kørrappa kandiig pasrig købig køn.

²⁴Suldaumerabe kangurrin kangurri trenchibelø køn: —Kølsrømugun cha. Trembe tru kewagúigwan muin kørrømisrtashchab suerte kucha ashkun— cha. Øyeeg maren, Tiuswei wamwan pørigu øyah chibig truig nebuig køn: “Nai kewagúilan nømdø pirisha, tru nai pala itøgueigwane muin kørrømisrtashchab suerte kucha asan” taig. Suldaumerabe øyeeg marig købig køn.

²⁵Jesúswei kurus pulube nui usrin køben, nui usrai numøsrain køben, Cleofaswei srai María køben, katø María Magdalena køben pønrrabelø køn.

²⁶Inchen Jesúsbe nui usran ashib, katø nui undaaraig kusrenanøb pera uniibe nui usraim pulu pasrai ashib inchabe, usrane trenchibig køn: —Au, ñui nusrkai lataigwan uyu ñi pera pasran— cha.

²⁷Inchabe katø tru nui kusrenanøb pera unigwan trenchibig køn: —Ñui usri lataigwane uyu ñibe pera pasran— cha. Indig tru uraskurrimbunø tru kusrenanøb pera unig købiibe nui yau pera kørrømisrøbig køn.

²⁸Yandø øyeeg chab puraiben, Jesúsbe kerrigu treeg chab nebui ashabe, Tiuswei wamwan pørigu øyah taig nebunrrai trenchibig køn: —Pimulgwatan— cha.