Juan 19:2-16

²Yey ri soldados xkikoj che rujolom ri Jesús jun corona kipachꞌum rukꞌ kꞌiix. Y xkirip jun manta morato chirij.

³Tekꞌuchiriꞌ xeqibꞌ rukꞌ y kakibꞌiꞌij: —¡Nim uqꞌij ri rey ke raj judiꞌabꞌ! —kechaꞌ. Yey kakipachꞌ qꞌabꞌ chupalaj.

⁴Ri Pilato xel tanchi uloq y xubꞌiꞌij chike raj judiꞌabꞌ: —Chilape alaq, kanwesaj lo waꞌchi chiwach alaq. Chetaꞌmaj kꞌu alaq, riꞌin na jinta juna umak kanriqo —xchaꞌ.

⁵Ekꞌuchiriꞌ xel lo ri Jesús, kꞌo ri corona re kꞌiix che rujolom y ripom ri manta morato chirij. Xubꞌiꞌij kꞌu ri Pilato chike: —¡Riꞌ rachi kꞌo chiwach alaq! —xchaꞌ.

⁶Echiriꞌ ri nimaq e aj chakunel pa Rocho Dios kukꞌ ri e chajinel re ri Rocho Dios xkil ri Jesús, xkijeq kesikꞌinik, jewaꞌ kakibꞌiꞌij: —¡Kamisax chwa cruz! ¡Kamisax chwa cruz! —kechaꞌ. Ekꞌu ri Pilato xubꞌiꞌij chike: —We e riꞌ, kꞌama bꞌi ralaq y kamisaj alaq chwa cruz, pero riꞌin na jinta juna umak kanriqo —xchaꞌ.

⁷Raj judiꞌabꞌ xkikꞌul uwach: —Riꞌoj kꞌo jun taqanik paqawiꞌ y kubꞌiꞌij kꞌu riꞌ taqal che rire kakamisaxik ma uꞌanom Ukꞌajol Dios che ribꞌ —xechaꞌ.

⁸Echiriꞌ ri Pilato xuta waꞌ, xok más xiꞌin ibꞌ rukꞌ.

⁹Xok kꞌu tanchi ubꞌi pa ri palacio y xutzꞌonoj che ri Jesús: —¿Pa lal petinaq wi rilal? —xchaꞌ. Pero ri Jesús na xukꞌul ta uwach.

¹⁰Ri Pilato xubꞌiꞌij kꞌu che: —¿E laꞌ na kakꞌul ta la uwach wa kantzꞌonoj cheꞌla? ¿Na etaꞌam ta kami la panuqꞌabꞌ riꞌin kꞌo wi kankamisaj la chwa cruz y panuqꞌabꞌ kꞌo wi kanyolopij bꞌi la? —xchaꞌ.

¹¹Ri Jesús xukꞌul uwach: —Paqatzij wi kambꞌiꞌij cheꞌla, na jinta kꞌana paqꞌabꞌ la kataqan la panuwiꞌ we tamaji e ri Dios chilaꞌ chikaj xyaꞌw cheꞌla. E uwariꞌche, china ri xinqꞌatisan paqꞌabꞌ la, e más kꞌo umak riꞌ, chiwach rilal —xchaꞌ.

¹²Chwi kꞌu riꞌ, ri Pilato lik xutzukuj suꞌanik kuyolopij bꞌi ri Jesús. Pero raj judiꞌabꞌ ko kesikꞌin che ubꞌiꞌxik: —¡We xyolopij bꞌi la, na lal ta chi ramigo riꞌ ri nimalaj taqanel re Roma; ma china ri kuꞌan rey che ribꞌ, riꞌ e tzel karil wa nimalaj taqanel! —xechaꞌ.

¹³Echiriꞌ xuta waꞌ ri Pilato, xutaq bꞌi resaxik ri Jesús y xtzꞌuyiꞌ pa ri luwar re qꞌatbꞌal tzij “Tzꞌaqom Abꞌaj” kecha che, yey pa ri chꞌaꞌtem hebreo “Gabatá” rubꞌiꞌ.

¹⁴E qꞌij riꞌ kayijbꞌax pan janipa ri kajawax pa ri nimaqꞌij Pascua. Ekꞌuchiriꞌ xuꞌan tikꞌil qꞌij, ri Pilato xubꞌiꞌij chike raj judiꞌabꞌ: —Riꞌ ri rey e alaq —xchaꞌ.

¹⁵Noꞌj raj judiꞌabꞌ ko kesikꞌin che ubꞌiꞌxik: —¡Kamisax chwa cruz! ¡Kamisax chwa cruz! —kechaꞌ. Ri Pilato xubꞌiꞌij chike: —¿Kankamisaj kami riꞌ chwa cruz ri rey e alaq? —xchaꞌ. Pero ri nimaq e aj chakunel re ri Rocho Dios xkikꞌul uwach: —Riꞌoj na jinta juna chik qarey, xew e qarey ri nimalaj taqanel re Roma —xechaꞌ.

¹⁶Ekꞌu ri Pilato xuya bꞌi ri Jesús pakiqꞌabꞌ re kakamisax chwa cruz. Ewi xkꞌam bꞌi ri Jesús.