Juan 19:15-38

¹⁵Meneng migbelobansag dan, “Imetayi sikandin. Imetayi. Lensangi diyà te kros.” Minikagi si Pilato, “Meibeg kaw lay te ipelansang ko se selotan niyo diyà te kros?” Timaba se menge pengolo te simbahan, “Sebad olò se selotan day, aw yan si Cesar.”

¹⁶Penga niyan, impeibing i Pilato si Jesus amon ilansang diyà te kros.

¹⁷Nayan, inibing si Jesus te menge sondalo, aw impetiang dan kandin se kros lensangan kandin. Nesayo dan lekat te Jerusalem aw dimoton dan te bontod iningedanan Golgota te otaw eg-ikagi te Hebreo, meneng se kelebadan niyan, “Tòlan te Olo.”

¹⁸Pegdateng dan doton, inlansang dan sikandin diyà te kros. Doen heman dowa otaw doma din inlansang diyà te kros intollok diyà te tangkil din, aw si Jesus diyà te tengà-tengà.

¹⁹Doen insolat i Pilato aw impesawol din iyan doton diatas te olo i Jesus, kagi niyan, “Seini si Jesus tege Nasarit, Selotan te menge Judiyo.”

²⁰Medita se Judiyo migbasa kenyan, so medapag kidoen se lonsod te Jerusalem. Insolat iyan te telo kemolò te kagi, Hebreo, aw Latin, aw Griego.

²¹Minikagi se menge pengolo te simbahan te Judiyo diyà ki Pilato, kagi dan, “Mèpiya aw eked no solati se kagi, ‘Seini se Selotan te menge Judiyo.’ Keilangan iselilin no se kagi, ‘Migpelingo-lingo se otaw seini Selotan te menge Judiyo.’”

²²Timaba si Pilato, “Eked ko den todai se insolat ko.”

²³Penga te peglansang te menge sondalo ki Jesus diyà te kros, inabat dan se penenaktun linowas din. Pigtalad-talad dan iyan te epat talad amon doen meabat te teg sebad-sebad kandan. Inabat dan heman se melayat saol i Jesus tinibok se inabel wedà palos tebili.

²⁴Yan se doun te minikagi dan, “Mèpiya aw eked tadon lisii se saol din. Meneng labi pa mèpiya aw megbonot kidon aw sinu se mekeabat kenyan.” Pegbonot dan kenyan, yan netoman se pakang insolat diyà te kagi te Timanem, “Megtalad-talad dan te penenaktun ko, aw megbonot dan heman tepad te saol ko.”

²⁵Yan se ininang te menge sondalo. Dalem niyan, doen menge bayi timindeg kidoen medapag te kros linensangan ki Jesus. Yan se inay din, aw kedowa te inay din, aw esawa i Clopas si Maria, aw si Maria tege Magdala.

²⁶Pegkità i Jesus te inay din aw sìyan sebad tinoledaan nedekelan din te pedowan, minikagi diyà te inay din, “Inà, sìyà den se batà nikaw.”

²⁷Penga niyan, minikagi heman si Jesus diyà te sìyan tinoledaan din, “Sìyà den se inay nikaw.” Lekat te aldaw sìyan, impeogpà te tinoledaan sìyan se inay i Jesus kidoen te balay din.

²⁸Penga niyan, netegahan i Jesus te nepenga din den se kedita te insogò te Amay din kandin, aw minikagi, “Nelao a.” Pineokit kenyan, netoman se pakang tepad kandin tapay insolat diyà te kagi te Timanem.

²⁹Doen sibolan sinolan te bino sinengedan te wayeg. Inagem dan se ispongha intangen diyà te panga te kayo hisopo, aw impesopsop dan iyan ki Jesus.

³⁰Penga te pegsopsop din, minikagi, “Nepenga den.” Penga niyan, timikelong sikandin aw nematay.

³¹Nayan, neinang iyan te meapon te aldaw te pegtegilan dan te Pista te Peglaklak. Ibeg te menge obanen te Judiyo, meabat lekat te kros se lawa te otaw nematay te eked pa sallep se aldaw, so se keeldawan niyan, yan se Sebado ontò melangkaw aldaw diyà te menge Judiyo. Yan se doun te nemoyò dan ki Pilato te pentigen te sondalo se benis te menge otaw inlansang diyà te kros amon ayas dan matay.

³²Yan insogò din se menge sondalo, aw pigpantig dan se benis te sebad otaw inlansang diyà te tangkil i Jesus, aw penga niyan diyà heman te sebad tangkil din.

³³Meneng pegdateng dan doton ki Jesus, kinità dan te nematay den sikandin, aw yan se doun te wedà dan pentigi se kandin benis.

³⁴Meneng doen sebad sondalo nenogseng te kilid din te dilek, aw yan dimelog se dipanog aw wayeg lekat te kilid din.

³⁵Kinità ko se kedita nini in-indan ko den kenyo, aw benal se kagi ko. Netegahan ko te benal iyan neinang, aw ibeg ko memenal kaw heman.

³⁶Peg-inang te menge sondalo kenyan, netoman se pakang tapay insolat diyà te kagi te Timanem, “Wedad palos tòlan din pentigen.”

³⁷Doen heman doma pakang tapay insolat diyà te kagi te Timanem tepad te menge Judiyo, “Kitaen dan sikandin tapay dan dogsengen.”

³⁸Nayan, doen sebad otaw si Jose tege Arimatiya timaking ki Jesus, meneng mig-eles-eles te pegtaking din kandin so nelemitan sikandin te menge obanen te Judiyo. Dimoton si Jose ki Pilato aw mig-insà aw mepakay aw ebaten din se lawa i Jesus lekat te kros amon ilebeng din. Mepakay iyan diyà ki Pilato, aw yan dimoton aw inabat din se lawa.