Juan 19:15-37

¹⁵Welu kisu engün wirari: —¡Langümngepe! ¡Langümngepe! ¡Langümngepe ta kürus mew! Fey Pilato ramtuy: —¿Iñche anta langümafun tamün longko ülmen? Fey ti pu longkolelu tati pu saserdote mew llowdungueyew: —¡Iñchiñ ta nielaiñ kangelu longko ülmen, tati emperador müten!

¹⁶Feymew Pilato wültukufi ta Jesus ñi langümngeael ta kürus mew, fey ti pu judiu yetufi engün ta Jesus.

¹⁷Jesus nentungelu, yeniey ñi kürus tañi amuael tati Kalafera pingechi lelfün mew (fey aramewdungun mew Golgota pingey).

¹⁸Tüye mew langümngepuy wente kürus ka epu weñefe engün, kiñe Jesus ñi man püle, kangelu kisu ñi wele püle elngey.

¹⁹Pilato werküy ñi elkünulngeael kiñe letreru Jesus ñi longko püle ti kürus mew, feypilelu chem mew ñi langümngen:

²⁰Rume fentren pu judiu pefi engün tüyechi letreru ñi wirin dungu, fey ti lelfün chew ñi langümngemum ta Jesus püllelerkey ti waria mew, fey tüyechi dungu wiriley ta külarume dungun mew: aramew, latin ka griegu.

²¹Feymew ti pu longkolelu pu saserdote chillkatulelu ti letreru mew, feypifingün ta Pilato: —‘Tati pu judiu ñi longko ülmen’ pintukukilnge, welu may ‘Tati pu judiu ñi longko ülmenngen pikelu’ pintukuafimi.

²²Welu Pilato llowdungueyew: —Tañi wirintukuelchi dungu ta iñche, femngechi wirilepe müten.

²³Feyti pu soltaw dew külafantukufilu kürus mew ta Jesus, ñimituñmafingün ñi takuwün, fey wüdamkañmafingün ñi meli takuwün, kake kiñeke soltawngealu. Ka nüfingün ñi puñumtukunieelchi takuwün, tüfa am ñüdüfkülenolu, kiñe wiftun mew müten dewkülelu.

²⁴Feymew ti pu soltaw welukonkechi feypiwingün: —Wikürlayafiyiñ. Suertiayafiyiñ iñchiñ taiñ kimael ñi ineyngeael ti takuwün. Famngechi mupiy tati Wirin Chillka feypilelu: “Kisukengealu engün wüdamkañmaenew ñi takuwün, ka suertiañmaenew iñche ñi takuwün.” Fey tüfa ürke tañi femün tati pu soltaw.

²⁵Jesus ñi inafül mew mülerkey kisu ñi ñuke, ka kisu ñi ñuke ñi lamngen, Maria, Kleofa tañi kure, ka Maria Magdalena.

²⁶Feymew Jesus pefilu ñi ñuke, mülelu kisu ñi inafül mew, feypifi ñi ñuke: —Iñche ñi ñuke, tüfachi disipulu iñche tañi rume piwkeyenieel, eymi tami püñeñngeay tami piwkeyeaetew.

²⁷Ka pürüm feypifi ñi piwkeyenieelchi disipulu: —Tüfachi domo eymi tami ñukengeay. Feymew, üyechi disipulu llowfi kisu ñi ruka mew ta Maria.

²⁸Fey dew rupalu tüfachi dungu, Jesus am dew kimnielu itrokom ñi dew mupin ti dungu, ka femngechi tañi mupin tati Wirin Chillka, feypi: —“Wüywün ta iñche.”

²⁹Mülerkey üye mew kiñe fasu apolelu ti füre pulku mew. Ifokünulfi engün kiñe esponja tati füre pulku mew ka trarintukufi engün kiñe pichirumechi mamüll mew, fey fülümelpufingün ñi wün mew.

³⁰Jesus putufi ti füre pulku, fey feypi: —Itrokom dungu dew mupiy. Fey pürüm potrong nagümi ñi longko ta Jesus, fey ka müten lay.

³¹Fey umañngewelu ñi akuael tati Paskua kawiñ, fey ti pu judiu ayürkelay engün ti kuerpu ñi müleweael ti kürus mew tati ürkütun antü mew, fey tüyechi ürkütun antü am doy küme dullin antü ürke. Feymew feypifingün ta Pilato ñi werküael tañi trafoñmamengeael ñi chang tati langümel kürus mew ka ñi nentungetuael ti pu kuerpu tati kürus mew.

³²Feymew ti pu soltaw amuy engün, fey trafoñmapufi ñi chang tati wüne pepuel, kangelu kafey tati langümel kürus mew Jesus ñi inafül mew.

³³Welu fülpulu Jesus mew engün, pefingün ñi dew lan. Feymew trafoñmangelay ñi chang.

³⁴Welu ka femngechi, kiñe ti pu soltaw nülañmafi kiñe püle ta Jesus ñi kadi kiñe wayki mew, feymew müten wütrutripay ko ka mollfüñ.

³⁵Fey ti wirilu tüfachi chillka pefi ñi famngechi femngen ta Jesus, feymew kisu nütramyefi tüfachi dungu, fey feypi ti rüfngechi dungu. Kisu kimniey ñi feypin ti rüfngechi dungu, femngechi eymün tamün feyentuael tatey.

³⁶Fey tüfachi dungu femngechi felerpuy tañi mupiael tati Wirin Chillka ta feypilelu: “Kiñe foro no rume ta trafoñmangelayay.”

³⁷Fey kangelu püle tati Wirin Chillka feypi: “Leliwülafingün tüfey tañi rulmelelchi wayki kisu ñi kuerpu mew.”