Juaṉ 9:5-25

⁵Jú̱ nuṉkanam pujakun shuara enentái̱n tsáapnimtikratniuitjai” tímiayi.

⁶Nuna chichas nuṉká usukmi nuṉkaja̱i̱ pachimiar kusuru ji̱i̱n yakarmiayi.

⁷Nuyá chichaak “Siruí pajamtai entsanam nijiamauta” tímiayi. Siruísha nu chichamnum “akupkamu” tawai. Kusurusha we nijiamar péṉker íimiar támiayi.

⁸Nuyá ni írutkamuri̱sha nuik wáinin ármia nusha tiarmiayi “Ju̱ka pujus tuke kuítian seamniuya núchakait.”

⁹Chíkich “Ee, núkete” tiarmiayi. Chikichcha “Atsá, núchaiti; kame nuash tumainti” tiarmiayi. Tura niṉki “Ee, wiitjai” tímiayi.

¹⁰Tutai aniiniak “¿Itiurak yamaikia íimiam?” tiarmiayi.

¹¹Niisha tímiayi “Áishmaṉ Jesusa nu tsakusan jí̱i̱run yakartur “Siruí pajamtai entsanam nijiamauta” turutmiai. Takui wena nijiamaran paant iimpramjai” tímiayi.

¹²Tutai “Nu áishmaṉsha tuiṉ pujá” tiarmiayi. Niisha “Cha, nékatsjai” tímiayi.

¹³Nuyá kusuru tsuárman Pariséunam júkiarmiayi.

¹⁴Kame Jesus kusurun tsuarmia nui̱ ayampratin tsawantauyayi.

¹⁵Tuma asamtai Pariséusha itiurak íimnium tusar aniasarmiayi. Niisha tímiayi “Ji̱i̱ruin tsakusan yakaarámtai, nijiamaran paant iimjiai.”

¹⁶Nuyá chíkich Pariséu shuarnumia̱ nuamtak tunaiyar “Ju̱na tsuáruka Yúsai̱ya̱nchuiti. Kame ayampratin tsawantai̱ túraiti” tiarmiayi. Tura chikichcha “Tunáa shuaraitkiuiṉkia jú̱nisaṉ túratniun tujinkia̱a̱yi” tiarmiayi. Nuja̱i̱ akannaikiarmiayi.

¹⁷Tsuármancha ataksha aniasarmiayi “Ámin tsuármarua nu ¿warí enentáimtam?” tiarmiayi. Tutai “Wikia “Yúsnan etserniuiti” tajai” tímiayi.

¹⁸Tura Israer-shuar nekas kusuruitiat yamái íimiui tu enentáimtuscharmiayi Pariseu. Tuma ásar ni aparí̱ncha untsukar

¹⁹inintrusarmiayi “¿Ame uchiram kusuru akiinia tárumna nukait. Itiurak yamaikia iimia?” tiarmiayi.

²⁰Ni aparí̱sha tiarmiayi “Ii uchiríṉkia kusuru akiiniama nu nékaji.

²¹Tura iisha nékatsji itiurak yamaikia iimia. ¿Yátsuk péṉker tsuáruit? Niisha úuntchakait, nii aniastarum. Niṉki ujatmakarti” tiarmiayi.

²²Sapijmiak tiarmiayi. Israer-shuara úuntri̱ṉkia “Jesus Yus akupkamu asa nekas Krístuiti” tuinia núnaka Israer-shuara iruntainmaya̱ ji̱i̱ki̱ akupnakti tiniu ásarmatai tsuarma aparí̱ ashamkarmiayi.

²³Nu asamtai ni aparí̱ “Niisha úuntchakait, nii aniastarum” tiarmiayi.

²⁴Nuiṉkia Israer-shuara uuntri̱ kusuru tsuárman ataksha untsuk tiarmiayi “Yus íimmianum nekasa nu titiá, ju̱ áishmaṉkka tunaarinniuiti nékaji” tiarmiayi.

²⁵Tutai tímiayi “Kame tunaarinchashit. Nékatsjai. Antsu ju̱nak nékajai. Yaunchu kusuruitiatan yamaikia íimjiai.”