Juãw 21:2-7

²Pa mẽ ixpê 7 nẽ axpẽn wỳr akuprõ. Na pre Simãw Pêtre nẽ Tomas pihpohti nẽ Natãnaew. Natãnaewja Garirej kamã krĩ pê Kanã nhõ xwỳnh na pre. Nẽ wa pa wa ixpê Jepetew krata wa nẽ wa inhĩõ wa pijakruuta wa. Pa prem wa mẽ nhỹri axpẽn wỳr akuprõ.

³Hãmri nhũm Simãw Pêtre mẽ inhmã: —E pa jarãhã ma tep wỳr tẽ nẽ hkwỳmnê. Anẽ. Pa mẽ kuma nẽ kãm: —Tôe. Nà pa mẽ ijaxwỳja ma akôt mõ. Anẽ. Hãmri nẽ mẽ ma himô rax pê Tipeja wỳr mõ nẽ kanôre mã agjê nẽ gôx kãm kryhti rẽnh o ixkuhê. Nom tee ri ho tep õmnênh kaxyw rẽnh o ixkuhê nẽ hõmnênh kêt nẽ ixtã apkati nhũm tep amrakati kumrẽx.

⁴Tã nhũm myt kato nhũm Jejus gô mỳri xa. Pa mẽ ixpiitã omu no ãm ixprĩ hã kêp Jejus ã omunh kêt nẽ. Tã no nhũm tãm xa.

⁵Hãmri nẽ mẽ inhmã kapẽr nẽ mẽ inhmã: —Pa. E mãn ka mẽ ra tep kwỳmnênh rax nẽ nà? Anẽ. Hãmri pa mẽ kãm: —Tk. Nà mo tep? Amrakati kumrẽx kênã. Anẽ.

⁶Hãmri nhũm mẽ inhmã; —Xô wehe? Tôe. Axte mẽ axupôk rũm kryhti mẽ nẽ omu. Anẽ. Hãmri pa mẽ mar xà hkôt ho anẽ nẽ kumẽ. Hãmri nhũm kamã tep hipu rax kumrẽx nhũm utĩ rax nẽ. Pa mẽ tee ri ixte ho ixàpir kaxyw ri hkukjê.

⁷Hãmri pa kêp Jejus ã omunh kurê kumrẽx nẽ Simãw Pêtre mã kãm: —Kwa pẽr mẽ panhõ Pahihtita na. Anẽ. Hãmri nhũm inhma nẽ hkĩnh tỳx nẽ akupỹm hinôkà jaxà nẽ gôx kãm mrõ nẽ ma hwỳr ho nana ho tẽ.