Josue 7:19-24

¹⁹Ne migkaǥi si Josue ziyà te ki Acan te, “Mama, beǥayi nu te zengeg is Nengazen he Megbevayà te Israel; keǥiya nu is tutuu ziyà te etuvangan din. Keǥiya nu kayi te kediey ke hengkey is mibeelan nu? Kenè nu heini ieles kediey.”

²⁰Ne midtavak si Acan te, “Tutuu he nekesalà a ziyà te Nengazen he Megbevayà te Israel. Iyan heini mibeelan ku:

²¹Duen te menge azen he netavan tew, duen ku neehè he mekempet he visti he ebpuun diyà te Babilonia, pelata he menge dezuwa he kilu wey tengà, wey senge verita he vulawan he menge tengà te kilu. Utew ku neimahi heini he menge azen, umbe migkuwa ku. Ne inleveng ku heini ziyà te tanà he seled te tulda ku, ne ziyà te kinezizeleman sikan is pelata.”

²²Umbe, duen menge etew he midsuǥù ni Josue he megaanggaan medhendiyà te tulda ni Acan. Ne neehè dan iyan dutun is menge azen he inleveng, sumalà is nekaǥi ni Acan.

²³Ne mid-uwit dan heini ziyà te ki Josue wey te langun he menge Israilihanen, ne insavuk dan diyà te etuvangan te Nengazen.

²⁴Ne zutun mid-uwit ni Josue wey te langun he menge Israilihanen si Acan diyà te Suǥud te Acor, ragkes sikan is pelata, bisti, wey senge verita he vulawan, wey is menge anak din, menge vaka zin, menge asnu zin, menge kerehidu zin, tulda zin, wey is langun he azen din.