Josue 19:22-40

²²Is dulunà nekeuma ziyà te Tabor, diyà te Shahazuma, wey te Bet Shemesh, ne ziyà metaman te Wahig he Jordan: ne 16 he menge inged is nesakup te Isacar, ne ebpekeuman kayi is dezeisey he menge inged diyà te peliǥuy kayi he menge inged.

²³Iyan heini nepengevilin te tribu ni Isachar he mibahin diyà te kada pemilya zan.

²⁴Is ikelima he mibehinan te tanà pinaaǥi te kedripa iyan is menge pemilya te tribu ni Asher.

²⁵Iyan heini menge inged he nesakup dan: Helkat, Hali, Beten, Acshaf,

²⁶Alamelec, Amad, wey Mishal. Is dulunà kayi ziyà te edsenlepan mibpuun te Carmel wey te Shihor Libnat.

²⁷Ne mibulegku heini ziyà te edsilaan pehendiyà te Bet Dagon ne nekeuma ziyà te Zebulun wey te Suǥud-suǥud te Ifta El. Ne mibpehendiyà heini te zizaya pehendiyà te Bet Emek wey Neil. Ne midlaus heini ziyà te zizaya pehendiyà te Cabul,

²⁸Ebron, Rehob, Hamon, Kana, taman te Zekelà he Sidon.

²⁹Ne mibulegku heini pehendiyà te Rama, ne midlaus heini ziyà te vinerengbeng he inged he Tyre, ne mibpehendiyà te Hosa, ne ziyà metaman te Daǥat he Mediteraneo. Is duma pa he menge inged he nesakup dan iyan is: Mahabal, Aczib,

³⁰Umma, Afek, wey Rehob: ne 22 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged.

³¹Iyan heini menge inged he nepengevilin te tribu ni Asher he mibahin diyà te kada pemilya zan.

³²Is ikeenem he mibehinan te tanà pinaaǥi te kedripa iyan is menge pemilya te tribu ni Naftali.

³³Is dulunè dan mibpuun te Helef wey te kayu he ulayan diyà te Zaananim, mibpehendiyà te Adami Nekeb wey Jabneel midlaus diyà te Lakum, ne ziyà metaman te Wahig he Jordan.

³⁴Puun dutun mibulegkù heini ziyà te edsenlepan, pehendiyà te Aznot Tabor, ne zutun mibpehendiyà te Hukok taman te dulunà te Zebulun diyà te zivavà, diyà te dulunà te Asher ziyà te edsenlepan, wey te Wahig he Jordan diyà te edsilaan.

³⁵Is duma he vinerengbeng he menge inged he nesakup kayi iyan is: Zidim, Zer, Hammat, Rakat, Kineret,

³⁶Adama, Rama, Hazor,

³⁷Kedesh, Edrei, En Hazor,

³⁸Iron, Migdal El, Horem, Bet Anat, wey Bet Shemesh: ne 19 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged.

³⁹Iyan heini menge inged he nepengevilin te tribu ni Naftali, he mibahin diyà te kada pemilya zan.

⁴⁰Is ikepitu he mibehinan te tanà pinaaǥi te kedripa iyan is menge pemilya te tribu ni Dan.